بەغدا بە هیچ لەونێک ناتوانێ بودجەی هەرێمی کوردستان ببڕێت

پەرلەمانتارێکی کورد لە ئەنجومەنی نوێنەرانی عێراق دەڵێت: " دەبێ ڕێککەوتنی هەولێر و بەغدا شێوازێکی کۆنکرێتی و هەمیشەیی هەبێت نەک شێوازێکی کاتی و پڕ قەیران وەکوو ئەوەی ئێستا هەیە."

موسەننا ئەمین، ئەندامی پەرلەمانی عێراق لە فراکسیۆنی یەکگرتوو لە گفتوگۆ لە گەڵ هەواڵنێری مێهر، سەبارەت بە مۆڵەتی یەک مانگەی بەغدا بە دەوڵەتی عێراق بۆ ڕێککەوتن لە سەر مەلەفی نەوت و لە ئەگەری ڕێکنەکەوتن بڕینی بودجەی هەرێم، وتی: کۆکردنەوەی داهات و دابەش کردنی داهاتەکەش لە نێوان دەوڵەتی ناوەندی عێراق و هەرێمی کوردستان کارێکی گرینگە و دەبێ هەم کۆکردنەوەکەی و هەم دابەش کردنیشی و هەروەها ڕێکخستنی ئەو رێککەوتنەش لە چوارچێوەی یاسای بودجەی تەواوکاری ساڵی 2020 بە گوێرەی یاسا و دەستووری عێراق بێت و ئێمە تەنیا دەستوور بە چارەسەری ئەو قەیرانە دەزانین. 

داهاتی عێراق ئەگەر گەندەڵ نەیبات بەشی هەموان دەکات

لەبارەی ئەو پاگەندەیەی کە ئێستا هەیە و دەوترێت هەرێمی کوردستان چاوەروانی بەرزبوونەوەی نرخی نەوت دەکات و جۆرێک ساردی پێوە دیارە لەوەی وەفدێک بنێڕێتە بەغدا یان نا، موسەننا ئەمین ڕایگەیاند: هەرێمی کوردستان هیچ چارەیەکی نییە جگە لەوەی کە وەفدێک بنێرێتە بەغدا و تەنانەت ئەگەر نرخی نەوت بەرزیش بێت . چونکوو دەبێ ئەم ڕێککەوتنە شێوازێکی کۆنکرێتی و هەمیشەیی هەبێت نەک شێوازێکی کاتی و پڕ قەیران وەکوو ئەوەی ئێستا هەیە.

ئەوەشی وت کە لە گەڵ ئەوەین هەموو دەزگاکانی نەزاهەت و چاودێری لە سەر هەموو داهاتەکانی عێراق بێت بە هەرێمی کوردستانیشەوە، چونکوو داهاتەکانی عێراق زۆر زیاترە لە پێدوایستییەکانی ئەگەر گەندەڵی تێدا نەکرێت و چاودێری و نەزاهەی لەسەر ببێت بۆ کۆکردنەوە و عەدالەت ببێت لە بەش کردنی بە سەر ناوچە جیاوازەکاندا.

بەغدا و هەولێر ڕێکنەکەون دەقەومێت

موسەننا ئەمین لە وڵامی ئەو پرسیارەکەی کە ئەگەر هەولێر و بەغدا ئەمجارەش ڕێکنەکەون چ دەبێت، وتی: هەرێمی کوردستان ئامادەیە و وەرەقەی خۆی ئامادە کردووە بەڵام دەبێ چاوەڕوان بین بزانین حەوتەی داهاتووە چ دەبێت و کارەکە بە کوێ دەگات.

وتیشی: ئەگەر ڕێکنەکەون گومانی تێدا نییە کە قەیرانێکی گەورە ڕوو دەدات بەڵام لە هیچ کاتێکداحکوومەتی ئیتیحادی ناتوانێ لەو ئیلتیزامە دەستووریەی کە هەیەتی بەرانبەر مووچەخۆرانی عێراق بە هەرێمی کوردستانیشەوە کە ئێستا بەشێکە لە عێراق، نکولی بکات. و ئەگەر مووچەکەیان نەدات ئەوە خۆدزینەوەیە لە ئەرکە دەستووریەکەی.

جەختی لەوەش کردەوە کە پێویستە زەمانەتی قوت و بژێوی ژیانیی مووچەخۆران و خەڵکی هەرێمی کوردستان بکرێت و ئەمە بەرپرسیارێتیەکی هاوبەشی نێوان هەردوو حکوومەتی هەرێمی کوردستان و حکوومەتی ئیتیحادیە. مادام حکوومەتی هەرێمی کوردستان بەشێکە لە عێراق و سەربەخۆ نییە ئەوە ئەرکی حکوومەتی ناوەندی عێراقە کە بیژینێ ئەگەر داهاتەکانی ناوخۆی بەشی نەکرد.

لە وڵامی ئەو پرسیارەشدا کە گوایە بەغدا دەڵێت،، داهاتی ناوخۆیی هەرێمی کوردستان بەشی دەکات، موسەننا ئەمین زیادی کرد: با حکوومەتی عێراق دەزگا چاودێرییەکان بنێرێتە هەرێمی کوردستان لەوێ چێکی داهاتەکان بە شێوازێکی پاک و نەزیف بکات، ئەوەی کە کەمە بینڕێت و ئەوەشی کە زیادە بیباتەوە بۆ خۆی.

بەغدا ناتوانێ لاری بکات کە ناردنی بودجەی هەرێمی کوردستان

ڕاشیگەیاند کە  ناکرێت بەغدا بە بەڵگەی ئەوەی کە ئەم مانگە بودجە ئەدەم و ئەگەر تا مانگێکی دیکە ڕێکنەوکتین بودجەی هەرێمی کوردستان دەبڕم  و خواحافیز. ئەگەر بەغدا دەیەوێت بای بای و خوحافیز بکات لە بەرپرسیارێتیەکانی بەرانبەر بە هەرێمی کوردستان، ئەوا با وازی لێبێنێ سەربەخۆ بێتەوە.

ئەو ئەندامەی پەرلەمانی عێراق لە فراکسیۆنی یەکگرتوو ئاماژەیەکی بە دانوستانی نێوان ئەمریکا و عێراق دا کە بڕیارە لەم ڕۆژانەدا بەڕێوەبچێت.

گفتوگۆی عێراق و ئەمریکا گرینگە

موسەننا ئەمین ڕایگەیاند: عێراق و ئەمریکا بڕیارە گفتوگۆ بکەن بۆ بەگەڕخستنی ڕێککەوتنی ستراتێژی پێشوویان کە چەند ساڵ لەمەوپێش واژۆ کراوە. ئەمەش ڕێککەوتنی کشانەوەی هێزەکانی ئەمریکا نییە لە عێراق. ئەوە ڕێککەوتنێکی دیکە بوو کە سالێ 2011 واژۆ کرا و ئەمریکا ژمارەیەک هێزی خۆی بردەدەرەوە و  دواتر بە بیانووی شەڕی داعش هێنایەوە.

ئەوەشی وت کە ماوەیەک لەمەوپێش لە پەرلەمانی عێراقیش کۆدەنگی و بڕیارێک دەرکرا بۆ دەرکردنی هێزەکانی ئەمریکا لە عێراق بەڵام ئەم دانوستانانەی کە بڕیارە لەم ڕۆژانەدا بەڕێوەبچێت بۆ ئەوە نییە، بەڵکوو بۆ بەگەڕخستنی ڕێککەوتنە ستراتێژیەکەی پێشووە کە هەمە لایەنیە و بواری ئابووری، پەروەردە، ئەمنی و سەربازی ، تەکنۆلۆژی، دارایی و پارەی تێدایە.

موسەننا ئەمین وتی: عێراق لە گەڵ ئەوەی کە تا ئیستا قوربانی زۆری داوە لە بوونی ئەمریکا لە وڵاتەکەی بەلام دەیتوانی باشتر سوودمەند بێت لەم ڕێککەوتننامەیە. بەڵام  ئەگەر هەرکام لە لایەنەکان ئەگەر ڕابگەیێنن کە پێویستیان بەم ڕێککەوتننامە نییە و دەکشێنەوە یەک ساڵی پێویستە کە جێبەجێ بکرێت و ئەم بڕیارە بگاتە ئەنجام ئەمەش بە گوێرەی خودی ڕێککەوتنەکەیە..

جەختیشی کرد کە ئەوەی بۆ ئێمە گرینگە ئەوەیە کە ئەم بابەتە نەبێتە هۆی لە یەک دابڕانی عێراقییەکان و یەکڕیزیمان تێک نەدات و قەیران بۆ ناوخۆی عێراق دروست نەکات و خۆمان بپارێزین لە هەرچەشنە پاشهاتێکی سەلبی و نەرێنی کە بە هۆی ئەم جۆرە ڕێککەوتنانەوە یەخەی عێراق بگرن.

News Code 32754

نیشانەکان

بۆچوونی ئێوە

You are replying to: .
  • captcha