ئه‌مریکا داوای له‌ په‌که‌که‌  کرد چه‌ک دابنێت

وه‌زاره‌تی‌ ده‌ره‌وه‌ی‌ ئه‌مریكا داوا له‌ پارتی‌ كرێكارانی‌ كوردستان (په‌که‌که‌) ده‌كات چه‌ك دابنێت و پشتیوانی‌ وڵاته‌كه‌شی‌ بۆ حكومه‌تی‌ توركیا له‌شه‌ڕی‌ دژی‌ په‌كه‌كه‌ راگه‌یاند.

به‌ ڕاپۆرتی ئاژانسی هه‌واڵی مێهر له‌ ئاژانسی هه‌واڵی ڕۆیتێرز، مارک تۆنەر جێگری وتەبێژی وەزارەتی دەرەوەی ئەمریکا ئەوان نیگەرانیی خۆیان لەبارەی ئاڵۆزی و پێکدادانەکانی باشوری رۆژهەڵاتی تورکیا دەربڕیوە و داوا لە پارتی کرێکارانی کوردستان دەکەن کە چەکەکانیان دابنێن.

مارک تۆنەر، لە کۆنگرەی رۆژنامەوانیی رۆژانەیدا ڕایگه‌یاند که‌ "داوا لە پەکەکە دەکەین کە چەک دابنێت تاکو ئەو تورکانەی بەهۆی توندوتیژی و پێکدادانەکانەوە ناچار بە جێهێشتنی ماڵەکانیان کراون بگەڕێنەوە."

مه‌به‌ستی مارک تۆنر له‌ ده‌سته‌واژه‌ی تورک خه‌ڵکی ناوچه‌کانی باشووری ڕۆژهه‌ڵاتی تورکیا بووه‌ که‌ کورد زمانن و ئه‌مریکا به‌ تورک ناویانی بردووه‌ و ئه‌مه‌ش کاردانه‌وه‌ی ڕه‌وته‌ کوردییه‌کانی تورکیا لێکه‌وته‌وه.

رێکخراوی لێبوردنی نێودەوڵەتی رۆژی۱۷ی سه‌رماوه‌ز ڕاپۆرتێکی بڵاوکرده‌وه‌ و تیایدا ئاماژەی به‌وه‌ کرد که‌ دەیان هەزار هاوڵاتیی باشووری ڕۆژهه‌ڵاتی تورکیا بەهۆی پێکدادانی نێوان سوپای تورکیا و پارتی کرێکارانی کوردستان (پەکەکە)وە ماڵەکانی خۆیان جێهێشتووە.

شیاوی ئاماژه‌یه‌ که‌ له‌و کاته‌وه‌ شه‌ڕی PKK له‌گه‌ڵ تورکیا، له‌ ساڵی ۱۹۸۴ه‌وه‌ ده‌ستیپێكردووه، تائێستا زیاتر له‌ ۴۰ هه‌زار که‌س گیانیان له‌ده‌ستداوه.

News Code 6947

نیشانەکان

بۆچوونی ئێوە

You are replying to: .
  • 6 + 2 =