ده‌نگدانى تايبه‌ت بۆ هه‌ڵبژاردنى پەرلەمانیی له‌ هه‌رێمى كوردستان سه‌ركه‌وتوو بوو

بە پێی ڕاپۆرتی ئاژانسی هەواڵی مێهر، نێچیرڤان بارزانی لەهەژماری فەرمی خۆی لەتویتەر باسی لەوەشکردوە، "خۆشحاڵم ده‌نگدانى تايبه‌ت بۆ هه‌ڵبژاردنى ئه‌نجومه‌نى نوێنه‌ران له‌ عێراق و هه‌رێمى كوردستان سه‌ركه‌وتوانه‌ كۆتايى هات. سوپاس و ده‌ستخۆشى بۆ به‌شداريى فراوانى پێشمه‌رگه‌ و هێزه‌ ئه‌منييه‌كان و خوشك و برايانى ئاواره‌."

ئاماژەی بەوەشکردوە، "هيوادارم ده‌نگدانى گشتيش سه‌ركه‌وتوانه‌ و بێکێشە به‌ڕێوه‌ بچێت".

ئەمڕۆش کۆمسیۆنی باڵای هەڵبژاردنەکانی عێراق رایگەیاند، لەدەنگدانی تایبەتدا کە هەینی بەڕێوەچو رێژەی بەشداریکردن لە هەولێر 75٪، سلێمانی 78٪ و دهۆک 69٪ بوە.

کاتژمێر 7:00ی هەینی، لە سەرتاسەری عێراق پرۆسه‌ی ده‌نگدانی تایبه‌ت ده‌ستیپێكردو ناوه‌نده‌كانی ده‌نگدان به‌ روی هێزه‌ ئه‌منییه‌كان و ئاواره‌ و زیندانیكراوه‌كاندا كرانه‌وه.

لە تەواوی عێراق، یەک ملیۆن و 75 هەزار و 727 کەس لە هێزە ئەمنییەکان لە دەنگدانی تایبەتدا مافی دەنگدانیان هەیە. هەروەها لە زیندانەکاندا، 671 کەس ئەو مافەیان هەیە. ئەو ئاوارانەشی کە لە وەزارەتی کۆچ و کۆچبەرانی عێراق تۆمارکراون و مافی دەنگدانیان هەیە، لە 17 پارێزگا دەنگ دەدەن و ژمارەیان 120 هەزار و 126 کەسە و زۆرینەیان لە هەرێمی کوردستانن.