سه‌رۆک کۆماری ئێران: ده‌بێ خوێن ڕشتن له‌ ناوچه‌که‌ بوه‌ستێت

سه‌رۆک کۆماری ئێران به‌ ئاماژه‌ به‌وه‌ی که‌ ئێران پێیوایه‌ له‌ داهاتوودا ده‌بێت یه‌کپارچه‌یی سووریا بپارێزرێت و تیرۆریزم له‌م وڵاته‌ ڕیشه‌کیس بێت، وتی: ده‌بێ هه‌موان هه‌وڵ بده‌ین خوێن ڕشتن له‌ ناوچه‌که‌ بوه‌ستێت.

 به‌ ڕاپۆرتی ئاژانسی هه‌واڵی مێهر، حه‌سه‌ن ڕۆحانی شه‌وی ڕابردوو له‌ تاران له‌گه‌ڵ مه‌ولوود چاوش ئۆغڵۆ وه‌زیری ده‌ره‌وه‌ی تورکیا سه‌باره‌ت به‌ هه‌ندێ بابه‌تی ڕۆژه‌ڤی ئێستای ناوچه‌که‌ و جیهان له‌وانه‌ پرسی سووریا و شه‌ڕی عه‌فرین گفتوگۆی کرد.

رۆحانی له‌م دیداره‌دا جه‌ختی کرد که‌ ئێستا ویستی دوو وڵات په‌ره‌دان به‌ په‌یوه‌ندییه‌کانه‌ و ده‌بێ هه‌وڵ بدرێت بۆ گه‌یشتن به‌ ئامانجی ۳۰ میلیارد دۆلاری له‌ په‌یوه‌ندییه‌ بازرگانی و ئابوورییه‌کانی ئێران و تورکیا.

وتیشی: کۆماری ئیسلامی ئێران ئاماده‌یی هه‌یه‌ تاکوو په‌یوه‌ندی خۆی له‌گه‌ڵ تورکیا له‌ به‌شی وزه‌ په‌ره‌ پێبدات و پێشوازی له‌ هاتنی سه‌رمایه‌دانه‌رانی ئابووریی تورکیا له‌ پڕۆژه‌ی نه‌وت و گاز ده‌کات.

ڕۆحانی هه‌روه‌ها کۆبوونه‌وه‌ی سێ لایه‌نه‌ی سوچی به‌ هه‌نگاوێکی گرینگ بۆ چاره‌سه‌ریی کێشه‌ ناوچه‌ییه‌کان وه‌سف کرد و وتی: به‌خته‌وه‌رانه‌ ئه‌مڕۆ په‌یوه‌ندی سێ لایه‌نه‌ی ئێران، تورکیا و ڕووسیا له‌ هاوکێشه‌ ناوچه‌ییه‌کاندا زۆر گرینگه‌ و ئه‌مه‌ش له‌ حاڵێکدایه‌ که‌ له‌ دۆخی ئێستادا بۆ چاره‌سه‌ریی قه‌یرانی سووریا پێویسته‌ به‌رده‌وام بین له‌ هاوکاری زیاتر.

سه‌رۆک کۆماری ئێران به‌ جه‌خت له‌سه‌ر زه‌رووره‌تی درێژه‌دان به‌ خه‌بات دژی تیرۆریزم و ڕێگری له‌ هه‌نگاوی جیایی خوازانه‌ له‌ ناوچه‌که‌، ڕایگه‌یاند: به‌داخه‌وه‌ ئه‌مڕۆکه‌ هه‌ندێ که‌س ده‌یانه‌وێت سنووره‌ جوگرافیاییه‌کان له‌ ناوچه‌که‌ بگۆڕن و دوای ئه‌وه‌ی له‌ باکووری عێراق سه‌رنه‌که‌وتن ئێستا ده‌یانه‌وێت ئه‌م پیلانه‌ ببه‌نه‌ باکووری سووریا.

جه‌ختیشی کرد: ئێمه‌ پێمان وایه‌ ده‌بێ له‌ داهاتوودا یه‌کپارچه‌یی سووریا بپارێزرێت و تیرۆریزم له‌م وڵاته‌ ڕیشه‌کێش بێت تاکوو به‌ هۆی ئه‌منیه‌تی ناو سووریاوه‌ وڵاتانی ده‌وروبه‌ریشی ئاسایشیان ببێت و هاوکاری ئێران، تورکیا و ڕووسیا له‌م پێناوه‌دا زۆر گرینگه‌.

 وتیشی: ئاماده‌ین تا بۆ چاره‌سه‌ریی کێشه‌ ناوچه‌ییه‌کان هاوکارییه‌کانی خۆمان له‌گه‌ڵ تورکیا په‌ره‌ پێ بده‌ین.

ڕۆحانی وتی: ءیمه‌ ده‌بێ له‌باری ئایینی و مرۆڤیه‌وه‌ هه‌موو هه‌وڵی خۆمان بۆ وه‌ستاندنی خوێنڕێژی له‌ ناوچه‌که‌ به‌کاربێنین چونکوو ئاواره‌ بوونی خه‌ڵک هه‌رگیز قبیلی قبووڵ کردن نییه‌.

لای خۆشیه‌وه‌ چاوش ئۆغڵۆ وتی: یه‌کێک له‌ ئامانجه‌ سه‌ره‌کییه‌کانی ئه‌مریکا پیلانگێری نوی له‌ ناوچه‌که‌یه‌ و کاریگه‌ریی دانانی له‌سه‌ر په‌یوه‌ندی ئێران و تورکیا که‌ ده‌بێ به‌ پێچه‌وانه‌ی ئه‌و خواسته‌ به‌رده‌وام بین له‌ هاوکاری به‌ تایبه‌ت بۆ چاره‌ سه‌ریی کێشه‌ی سووریا.

جه‌ختیشی کرد: ئێمه‌ ده‌بێ له‌ به‌رانبه‌ر ئه‌و پیلانانه‌ی که‌ به‌ ئامانجی تێکدانی یه‌کپارچه‌یی وڵات ئه‌نجام ده‌بێت، بوه‌ستین.

 جاوش ئۆغڵۆ هه‌روه‌ها ڕایگه‌یاند که‌ ئۆپراسیۆنی سه‌ربازی تورکیا له‌ باکووری سووریا کاتیه‌ و ته‌نیا دژی تیرۆریستانه‌ له‌ ناوچه‌که‌ و ئێمه‌ هه‌رگیز نامانه‌وێت خاکی سووریا داگیر بکه‌ین.

News Code 16770

نیشانەکان

بۆچوونی ئێوە

You are replying to: .
  • 2 + 1 =