وەزیری دەرەوەی ئیسڕائیل پەیوەندی بە بەرپرسێکی باڵای کوردی سووریا دەکات

بە پێی ڕاپۆرتی ئاژانسی هەواڵی مێهر، میدیاکانی ئیسرائیل ناوەڕۆکی پەیوەندییە تەلەفۆنییەکەی نێوان گیدیۆن سار وەزیری دەرەوەی ئیسرائیل و ئێلهام ئەحمەد، هاوسەرۆکی پەیوەندییەکانی دەرەوەی ئیدارەی دیموکراتیکی باکوور و ڕۆژهەڵاتی سوریایان بڵاوکردەوە.

ڕۆژنامەی “ئیسرائیل هوم”ی ئیسرائیلی بە پشتبەستن بە زانیاری بەرپرسانی ئیسرائیل بڵاویکردەوە، پەیوەندییەکی تەلەفۆنی ورد لە نێوان گیدیۆن سار، وەزیری دەرەوەی ئیسرائیل و ئێلهام ئەحمەد، هاوسەرۆکی بەشی پەیوەندییەکانی دەرەوەی ئیدارەی دیموکراتیکی ڕۆژئاوا و باکووری ڕۆژهەڵاتی سووریا ئەنجامدراوە.

وەک ڕۆژنامەکە ئاماژەی پێکردووە، لە پەیوەندییە تەلەفۆنییەکەدا باس له پێشهاتەکانی ناوچەکه کراوە، جگەلەوەش ئیلهام ئەحمەد سەبارەت بە پێشێلکردنی مافەکان و ڕەشەکوژی و دەستبەسەرکردنی کوردان لەلایەن گرووپە چەکدارەکانی سووریاوە زانیاری وردی بە ئیسڕائیل داوە.