بە پێی ڕاپۆرتی ئاژانسی هەواڵی مێهر، لە دیدارەکەدا جێگری وەزیری دەرەوەی ڕووسیا سڵاوی پووتین و وەزیری دەرەوەی ڕووسیای بە بارزانی گەیاند و جەختی لە بایەخ و پێگەی گەلی کوردستان و ڕۆڵی ھەرێمی کوردستان لە عێراق و ناوچەکە کردەوەو ئەوەشی خستەڕوو کە بە لای ڕووسیاوە ھەرێمی کوردستان ڕۆڵێکی گەورە لە عێراق دەگێڕێ و فاکتەری سەقامگیریە.
ھەر لەو کۆبوونەوەیەدا بیروڕا لەبارەی بارودۆخی سیاسی عێراق و ھەڵبژاردنی ئەنجوومەنی نوێنەرانی عێراق لە ئۆکتۆبەری ڕابردوو ئاڵوگۆڕکران.
لە بەشێکیتری ئەو دیدارەدا ھەڕەشەی تیرۆر لەسەر سەقامگیری ناوچەکە تاووتوێ کرا و ھەردوولا ھاوڕابوون لەسەر ئەوەی پێویستە ھۆکارەکانی سەرھەڵدانی تیرۆر ڕیشەکێش بکرێن.
بارودۆخی سوریا تەوەرێکیتری ئەو کۆبوونەوەیە بوو و ، بارزانی بۆچوون و نیگەرانییەکانی خۆی لەبارەی ئاییندەی گەلی کورد لە سوریا بە شاندی میوان گەیاند.
لە کۆتایی کۆبوونەوەکەدا جێگری وەزیری دەرەوەی ڕووسیا وێڕای ئاماژەدان بە پەیوەندیە مێژووییەکانی گەلی کوردستان و گەلی ڕووسیا، ڕۆڵی مێژوویی بنەماڵەی بارزانی لە پەرەپێدانی ئەو پەیوەندیە بەرز نرخاند و خوازیاری ئەوەش بوو کە پەیوەندی وڵاتەکەی لەگەڵ ھەرێمی کوردستان گەشەی زیاتر ببینێت.
Your Comment