رۆژنامەی حورییەت ڕاپۆرتی دا؛

ئەمریکا و تورکیا سەبارەت بە چوونەدەرەوی کوردەکان لە مەنبەج ڕێککەوتن

ناسەی هەواڵ: 4251251 -
میدیاکانی تورکیا بڵاویان کردەوە کە بە پێێ ڕێککەوتنی نێوان تورکیا و ئەمریکا لە میانەی دیداری ئەم دواییەی بەرپرسانی دوو وڵات، بڕیارە هێزە کوردییەکان لە شاری مەنبەجی سووریا پاشەکشێ بکەن.

بە ڕاپۆرتی ئاژانسی هەواڵی مێهر بە گێڕانەوە لە رۆژنامەی حورییەتی تورکیا، پاش دیداری بەرپرسانی ئەمریکا و تورکیا، دوو وڵات سەبارەت بە قەیرانی سووریا و باکووری ئەو وڵاتە لە سەر چەند پرسی گرینگ ڕێککەوتن.

بە گوێرەی ئەو ڕاپۆرتە، دەرچوونی هێزەکانی سووریای دیموکراتیک (هەسەدە) و یەکینەکانی پاراستنی گەل (یەپەگە) لە شاری مەنبەج لە باکووری سووریا یەکێکە لەو ڕێککەوتنانە و بڕیارە ناوەندێکی هاوبەش لە لایەن تورکیا و ئەمریکا بۆ ئیدارەی شاری مەنبەج دابمەزرێت و هێزی چەکدارایی بەرهەڵستکارانی سووریا لە ئەگەری پێویستی لەو ناوەندەدا جێگر بکرێن.

هەواڵی ڕێککەوتنی ئەمریکا و تورکیا سەبارەت بە سووریا لە کاتێکدا بڵاو دەبێتەوە کە دەوڵەتی سووریا گەلێ جار ڕایگەیاندووە کە ئۆپەراسیۆنی سەربازیی سوپای تورکیا و هێزەکانی ئەمریکی یان گرووپگەلی پاڵپشتکراوی ئەو وڵاتە لە باکووری سووریا پێشێل کردنی سەروەری نیشتمانیی سووریایە.

ئەوە لە کاتێکدایە کە دەوترێت ئەو ڕێککەوتنە بەر لە دەسپێکی ئۆپەراسیۆنی تورکیا لە عەفرین کراوە و فارۆق ئۆنساڵ نوێنەری پارتی داد و گەشە لە پەرلەمانی تورکیا بە کەناڵی ڕووداوی وتووە کە ڕووانینیان بۆ پرسی سووریا بە پێی ناوچەکانی رۆژهەڵات و رۆژئاوای فوراتە و ڕێککەوتنێک لەوبارەوە لە ئارادایە کە لە درێژەی ئۆپەراسیۆنی سەربازیی ئەم دواییەدا ڕوون بۆتەوە.

بە وتەی ئەو پەرلەمانتارەی تورکیا هێزەکانی سەر بە یەکینەکانی پاراستنی گەل (یەپەگە) لە ناوچەی رۆژئاوای فورات و لەوان لە عەفریندا نامێننەوە و بەو شێوەیە ئەگەر ڕێککەوتنێکی ئاوا لە ئارادا بێت، هێزە کوردییەکان نابێ لە مەنبەجیشدا بمێننەوە.

وەهاب جۆشکەن شرۆڤەکاری پرسی سیاسی-ش لە لێدوانێک بۆ کەناڵی ڕووداو ڕایگەیاندووە کە ئەگەری هاوکاریی ویلایەتە یەکگرتووەکانی ئەمریکا و تورکیا لە مەنبەجدا هەیە و بەوەشەوە ڕوون نییە کە ڕەوتی ئەو هاوکاریانە بە چ شێوەیەک دەبێت، بەڵام گومانێک لەوەدا نییە کە ئەمریکا و تورکیا سەبارەت بە مەنبەج پێکەوە کۆکن.

پێشتر شاندێک لە وەزیرای بەرگری و دەرەوەی تورکیا بە سەرۆکایەتی سیدات ئۆناڵ ڕاوێکاری وەزارەتی دەرەوەی تورکیا لە گەڵ بەرپرسانی ئەمریکی بۆ گفتوگۆ سەبارەت بە گۆڕانکارییەکانی سووریا، دیداریان کردبوو.

ناردنی بۆچوون

3 + 0 =