کورد و حکومەتی ناوەندیی سووریا هیچ ڕێککەوتنێکی سیاسییان نەکردووە

بە پێی راپۆرتی ئاژانسی هەواڵی مێهر، کەمال عاکیف، وتەبێژی فەرمانگەی پەیوەندییەکانی دەرەوەی بەڕێوەبەرێتی خۆسەر لە راگەیەنراوێکدا بڵاویکردەوە، ھەندێک لایەن ھەواڵێکیان بڵاوکردوەتەوە سەبارەت بە ئەنجامدانی دیدار و رێککەوتن لە نێوان بەڕێوەبەرێتی خۆسەر و حکومەتی سوریا، ھەندێکی تریش زیاتر لەوە رۆشتوون و باسیان لە مەرج و خاڵی ناکۆکی لە دیدارەکاندا کردووە.

عاكیف وتیشی: ھەموو ئەو ھەواڵ و پڕوپاگەنانەی لەوبارەوە بڵاودەکرێتەوە راست نیین و بوونی ھێزەکانی سوریاش لە منبج و کوبانێ لە چوارچێوەی رێکەوتنی ساڵی ٢٠١٩دایە.

لە دوای ھەڕەشەکانی تورکیا بۆ ئەنجامدانی ئۆپراسیۆن لە ناوچەکانی منبج و تەلڕەفعەت لە باکوری حەلەب، ھێزەکانی سوریا لەو شوێنانەی پێشتر بە رێککەوتن لەگەڵ ھێزەکانی سوریای دیموکراتی ھەبوون، خۆیان توندوتۆڵ کردووە و چەک و کەرەستەی سەربازی زیاتریان رەوانەی ئەو شوێنانە کرد.