بە ڕاپۆرتی ئاژانسی هەواڵی مێهر، سەردار موحسین ڕەزایی سکرتێری ئەنجوومەنی باڵای ئاسایشی نیشتمانیی ئێران لە دیدارێکدا لەگەڵ شێخ محەممەد بن عەبدولڕەحمان ئال سانی، سەرۆکوەزیران و وەزیری دەرەوەی دەوڵەتی قەتەر، جەختی لە پێوەندی دۆستانە و برایانە لە نێوان ئێران و قەتەر کردەوە، هەروەها هۆشداریی دا لە هەر هەنگاوێکی دوژمنکارانەی ئەمریکا لە دژی ئێران.
ناوبراو بە ئاماژە بە پەیوەندییەکانی نێوان ئێران و قەتەر ڕایگەیاند: ئێران لە ڕۆژان و هەلومەرجی سەختدا یارمەتی قەتەری داوە و جەخت لەسەر دۆستایەتی و برایەتی نێوان دوو وڵات دەکاتەوە.
ڕەزایی بە ئاماژە بەوەی کە ئێران متمانەی بە ئەمریکا نییە، زیادی کرد: ئەمریکییەکان چەندین جار خیانەتیان لە دیپلۆماسی و دانوستان کردووە.
هۆشداریشی دا: ئەگەر ئەمریکا دەست بە خراپەکارییەک بکات دژی ئێران، ئێمە کارەساتێک بۆ بەرژەوەندییە سەربازی و ئابوورییەکانیان دەهێنین کە لە مێژوودا تۆمار بکرێت.
هەروەها سەبارەت بە گەرووی هورمز وتی: ئەمریکا سەرەتا دەبێت هەنگاوی کردەیی بنێت بۆ جێبەجێکردنی مەرجەکانی ئێران، دواتر ئێران بەردەوام دەبێت لە کردنەوەی گەرووی هورمز.
Your Comment