هۆکارەکانی ناڕەزایەتی گەنجانی هەرێمی کوردستان/ڕەنگە شەڕی دەسەڵات و خەڵک بچێتە قۆناغێکی نوێ

کارناسێکی کورد پێیوایە کە دۆخی هاوڵاتیان بە گشتی خراپە و ڕێژەی بێكاری زۆر بەرزە و بەڕپرسەكانیش هیچ بەتەنگ خەڵكەوە نایەن و بۆ خۆیان لە ژیانێكی شاهانەدان، ئەمە وایكردوە كە خەڵك زۆر تورەبێت و داوای گۆڕانكاری بكات.

عوسمان گوڵپی، شرۆڤەکار و کارناسی پرسە سیاسییەکانی عێراق و هەریمی کوردستان لە دیمانە لە گەڵ هەواڵنێری مێهر، بە لێکدانەوەی هۆکارەکانی ناڕەزایەتی دەربڕین و خۆپیشاندانی ئەم ڕۆژانەی خوێندکاران و بەشێک لە خەڵک لە سلێمانی و هەولێر، وتی: لە ڕاستیدا لە چەند ساڵی ڕابردوودا خەڵكی هەرێمی كوردستان بە تایبەت سلێمانی دەوروبەری چەندین جار ناڕەزاییان دەربڕیوە بە تایبەت نارەزای مامۆستایان كە زۆر فراوان و مەدەنی بوو، چەند جارێكیش ناڕەزایی توند ناوچەكانی گرتۆتەوە و توندوتیژی لێ كەوتۆتەوە.

وتیشی: هۆكارەكانی ناڕەزاییەكان زۆرن لە دیارترینیان ئەو جیاوزیە تەبەقیە گەورەیەیە كە لە نێوان خەڵك و بەرپرسەكان و خێزانەكانیان دروست بووە، كە دۆخی هاووڵاتیان بە گشتی خراپە و ڕێژەی بێكاری زۆر بەرزە و بەرپرسەكانیش هیچ بەتەنگ خەڵكەوە نایەن و بۆ خۆیان لە ژیانێكی شاهانەدان، ئەمە وایكردوە كە خەڵك زۆر تورەبێت و داوای گۆڕانكاری بكات بە تایبەت خوێندكاران كە بەدەست چەندین كێشەوە گیرۆدەن چ لە بەشە ناوخۆییەكان و چ دۆخی داراییان.

بە وتەی عوسمان گوڵپی لە ڕابردوودا دەسەڵات بەدەم داخوازی مەدەنیەوە نەهاتوە بۆیە خەڵك باوەڕی بە خەباتی مەدەنی لاواز بوە یان نەماوە، كاتێكیش خەڵك باوەڕی بە خەباتی مەدەنی لاواز دەبێت لە بەرامبەردا باوەڕی بە توندوتیژی زیاد دەبێت، چونكە گەنجەكان پێیان وایە تا نەبێتە بارەگا سوتاندن و ڕووخاندن ئەم دەسەڵاتە بە خۆیدا ناچێتەوە، ئەوەی وایكرد گەنجەكان وا بیر بكەنەوە دەسەڵاتە كە وەڵامی خەباتی مەدەنی نایاتەوە، ئەگەرچی سوتاندن و ڕووخاندن كارێكی خراپە بەڵام وەڵامی هێزە ئەمنیەكان توندە و خەڵك ڕق ئەستور دەكات، گازی فرمێسك ڕێژ و گرتن و لێدان و تەقەكردن بوەتە سیمای وەڵامدانەوەی ناڕەزایی كە ئەمە ئەوەندەی تر خەڵكی نیگەران كردوە.

ئاماژەی بەوەش کرد کە لە ئێستادا جیاوازی زۆر لە نێوان خەڵك و دەسەڵاتدا دروست بوە.

ڕاشیگەیاند کە گەر سەرنجی كۆتا هەڵبژاردن بدەیت دەبینیت ئەوانەی كە بەشداری هەڵبژاردنیان كردوە لە پارێزگای سلێمانی %٣٧ لەو ڕێژەیەش لەدا %١٧ی دەنگی سوتاندوە و لە %٦٣ بایكۆتی كردوە، ئەمە دەریدەخات كە ڕێژەی %٨٠ی خەڵك ناڕازیە لە حیزبەكان و توڕەیە، ئەمە ئاماژەیەكی ڕوونە كە پێمان دەڵێت دەسەڵات و حیزبەكانیش لای خەڵك ڕەدكراونەتەوە و قبوڵكراو نین.

جەختیشی کردەوە کە گەر ئەم ناڕەزاییانەش كۆتاییان بێت ئەوا جارێكیتر و بە جۆرێكیتر ناڕەزایی سەر هەڵدەداتەوە چونكە خەڵك داخوازی هەیە و دەسەڵاتیش لە ئاست داخوازیەكاندا نیە، بۆیە ناڕەزایی گەنجەكان لە بێ هیوایی و نائومێدیەكی زۆرەوە سەرچاوەی گرتوە و بەشێكیان دەبنە خۆپیشاندەر و بەشێكیشیان كۆچ دەكەن بۆ ئەوروپا و وڵات جێدەهێڵن.

عوسمان گوڵپی سەبارەت بەوەی کە کۆتایی ئەم خۆپیشاندان و ناڕەزایەتی دەربڕینە چۆن دەبینن وتی: لە راستیدا لێرەدا كێشەیەك هەیە ئەویش ئەوەیە كە خەڵك چۆن متمانەی بە دەسەلات نیە ئاواش متمانەی بە ئۆپۆزسێۆن نیە، واتە خەڵك پێی وایە هێشتا بەدیلی ئەم دەسەڵاتە دیار نیە.

زیادیشی کرد کە بەردەوامی گرژییەكان ڕاستە دەبنە كێشەی گەورە بۆ دەسەڵات و مەترسی لەسەر دروست دەكات بەڵام لە بەر ئەوەی لە بەرامبەردا گەر گرژیەكان بەردەوامبن ئەوا دەبنە هۆی تێكچونی دۆخی ئەمنی و گرژیەكی زۆر لە ناوچەكە، چونكە هێزە دەسەڵاتدارەكان چەكدارن و چەك لەدەستی پارتی و یەكیەتیدایە نەك حكومەت بۆیە قورسە پێشبینی دۆخێك بكەی كە ڕوون نیە دەگاتە كوێ و ئەوەی ڕوونە بەریەككەوتنی بەردەوامی خەڵك و دەسەڵاتە و قوربانی زۆری لێ دەكەوێتەوە.

هۆکارەکەشی بۆ ئەوە گەڕاندەوە کە گۆڕانكاری بە ڕێگای توندوتیژی چ مانەوە بۆ دەسەڵات قورس دەكات و چ بۆ خەڵكیش قورسە بەڵام بەڕای من گەر دەسەڵات بە خۆیدا نەچێتەوە و گۆڕانكاری جدی نەكات و باوەڕی وا نەبێت كە تاكە ڕێگەی مانەوە خزمەتی خەڵكە دور نیە بگاتە بەریەككەوتنی ڕاستەقینە و خەڵك و دەسەڵات بەتەواوی بچنە سەنگەری دژایەتی یەكتر و بگەنە ڕووبەڕووبوونەوە.

News Code 40148

نیشانەکان

بۆچوونی ئێوە

You are replying to: .
  • 8 + 4 =