ڕێز لە هونەرمەند هادی زیائەدینی دەگیردرێت

بڕیارە کۆتایی ئەم حەوتەیە بە بەشداری مامۆستایانی گەورەی هونەر و بەرپرسان لە فەرهەنگستانی هونەری تاران ڕێز لە تەمەنێک داهێنان و هەوڵی هونەری هونەرمەندی شێوەکاری و پەیکەرەتاشی کورد بگیرێت.

بە ڕاپۆرتی ئاژانسی هەواڵی مێهر، ئەمین مورادی سەرۆکی حەوزەی هونەری پارێزگای کوردستان وێرای ڕاگەیاندنی ئەو هەواڵە، وتی: ئەو ڕێوڕەسمە بە پێی ڕێککەوتنێکی نێوان حەوزەی هونەری کوردستان و ڕێکخراوی فەرهەنگی، هونەری و توێژینەوەیی سەبا وەک گەورەترین ڕێکخراوی فەرهەنگی وڵات ئەنجام دەدرێ و بە پێی ڕێککەوتنەکە وێرای ناساندنی هونەرمەندانی ناسراوەی پارێزگا لە ئاستی وڵات، هەوڵی کردنەوەی پیشانگا بۆ هونەرمەندانی کوردستانی، ڕەخساندنی هەلی پێویست بۆ ئاراستە کردنی بەرهەمەکانیان و گەشەی ئابووریی هونەر بە بەهرە وەرگرتن لە پۆتانسیەلەکانی ئەو ڕێکخراوە دەدرێت.

وتیشی: کردنەوەی پیشانگای یەک مانگە (لە ٩ی خەزەلوەر تا ٥ی سەرماوەز) لە ٤٠٠ بەرهەمی شێوەکاری، قەڵەم‌کاری و پەیکەرتاشیی مامۆستا هادی زیائەدینی لە گەلەرییەکانی ئایێنە و خەیاڵی ڕێکخراوی سەبا بە پێی پێگەی زانستی و هەنەریی مامۆستا لە ئاستی وڵات، یەکەم هەنگاوی ئێمە لە پێناو ڕاپەراندنی ڕێککەوتنی سەرەوە بووە.

مورادی ئاماژەی بەوەش دا کە بەر لە کرانەوەی پیشانگای ئاسەواری هونەریی مامۆستا زیائەدینی لە کاتژمێری ١٨ تا ٢٠ی شەوی پێنج شەممەی ئەم حەوتەیە (٩ی خەزەلوەر)، بڕیارە کاتژمێری ١٦ی هەمان رۆژە بە هاوکاریی فەرهەنگستانی هونەر لە هۆڵی ئەو فەرهەنگستانە بە ئامادەبوونی مامۆستایانی هونەر و فەرهەنگی و بەرپرسانی وڵات و پارێزگا لە ڕێوڕەسمێکدا ڕێز لە تەمەنێک هەوڵ و تێکۆشانی هونەریی مامۆستا هادی زیائەدینی بگیرێت.

مامۆستا هادی زیائەدینی لە دایکبووی ساڵی ١٣٣٥ی هەتاوی لە شاری سنەیە و ساڵی ١٣٥٦ی هەتاوی لە زانستگەی هونەرە جوانەکانی تاران خوێندنی ئاکادیمی هونەری لە بەردەست مامۆستایانێکی وەک هانیباڵ ئەلخاس دەست پێ کردووە و لە پەنای هونەرگەلی قەڵەم لێدان و پۆرترە و شێوەکاری، چەندین دەیەیە کە بە شێوەی پڕۆفێشناڵ سەرقاڵی پەیکەرەتاشییە کە پەیکەرەکانی "شەوان" (لە پارکی ئاویەری سنە)، "ئازادی" (لە مەیدانی ئازادی سنە)، "چێژی ڕزگاری" (لە مەیدانی پارکی منداڵی ئیسفەهان)، "شێخ حەسەن عەلی یان جگەر خوێن" (لە هەولێر)، "مەستوورەی ئەردەڵان" (لە شاری سنە و هەروەها لە پارکێکی هەولێر)، "مەولەوی" (لە سەقز)، "شێخ مەحموود بەرزنجە" (لە مەیدانی شێخ محەمەدی سلێمانی)، "هەژار" و "هێمن" (لە مەهاباد)، "ئەنفال" و ... بەشێکن لە داڕشتە هونەرییەکانی ئەو مامۆستایە کە بەردەوام سەرنجی لایەنگرانی هونەری بۆ لای خۆی ڕاکێشاوە.

News Code 29100

نیشانەکان

بۆچوونی ئێوە

You are replying to: .
  • 1 + 5 =