"پیاوێکی شەبقە ڕەشی پاڵتۆ ڕەشی پێڵاو شین" لە سنە دەخوێندرێتەوە

ئەنجومەنی زانستی خوێندکاریی بەشی زمان و وێژەی کوردیی زانکۆی کوردستان لە درێژەی دانیشتنەکانی دوو حەفتانەی لە گەڵ کتێب کۆڕێک بۆ خوێندنەوەی نۆڤلێتی "پیاوێکی شەبقە ڕەشی پاڵتۆ ڕەشی پێڵاو شین" لە نووسینی د. فەرهاد پیرباڵ بەڕیوە دەبات.

بە ڕاپۆرتی ئاژانسی هەواڵی مێهر، لەو دانیشتنە کە کاتژمێر ١٢ تا ١٤ی رۆژی شەممە (٩ی سەرماوەز) لە تەلاری گۆڕانی کۆلێژی زمان و وێژەی زانکۆی کوردستان بەڕێوە دەچێت، ئامادەبووان لە لای خۆیانەوە بە شێوەی گشتی لە سەر ئەو کتێبە دەدوێن و ڕای خۆیان دەردەبڕن.

هەروەها بڕیارە لە دانیشتنی ئەمجارەی دوو حەفتانەی کتێب، کلیپی تایبەتیی نێردراوی د. فەرهاد پیرباڵ بۆ ئەنجومەنی زانستی خوێندکاریی بەشی زمان و وێژەی کوردیی زانکۆی کوردستان بۆ ئامادەبووان نمایش بکرێت.

د. فەرهاد پیرباڵ نووسەر، لێکۆڵەر، شاعیر و هونەرمەندی لە دایکبووی ساڵی ١٩٦١ لە شاری ھەولێرە و لە ساڵی ١٩٨٤ لە زانکۆی سلێمانی خوێندنی بەکالۆریۆسیی تەواو کردووە و لە ساڵی ١٩٩٤ بڕوانامەی دوکتۆریی لە بواری "مێژووی ئەدەبی نوێی کوردی" لە زانکۆی سۆربۆنی فەڕەنسا وەرگرتووە و لەوساوە وەک مامۆستا لە زانکۆی سەلاحەدینی شاری هەولێر ئیش دەکات.

پیرباڵ کە بە بۆنەی دەقە تەکنیکی و سووڕیاڵەکانی ناوبانگی دەرکردووە، ھەتا وەرزی یەکەمی ساڵی ٢٠٠٩ چل و سێ کتێبی لە بوارگەلی جۆراوجۆردا بڵاو کردۆتەوە و دوو کتێبی "حەکایەتەکانی باوکم" و "قەبرێکی سێ گۆشە" دوا بەرهەمی چیرۆکی ئەو نووسەرەن.

News Code 29536

نیشانەکان

بۆچوونی ئێوە

You are replying to: .
  • 1 + 6 =