سەرکۆنسولی ئێران لە هەولێر:

ئێران هیچ کات دەوڵەت و خەڵکی هەرێمی کوردستان بە دوژمن نازانێت

ناسەی هەواڵ: 4165017 -
سەرکۆنسولی ئێران لە هەولێر وتی: سەرەڕای بوونی هەندێک جیاوازی لە ڕاوبۆچوونەکان، ئێران هیچ کات دەوڵەت و خەڵکی هەرێمی کوردستانی وەک دوژمنی خۆی نازانێت.

بە ڕاپۆرتی ئاژانسی هەواڵی مێهر بە گێڕانەوە ماڵپەڕی فەرمی پارتی، هوشیار سیوەیلی بەرپرسی پەیوەندییە دەرەکییەکانی پارتی لە گەڵ مورتەزا عەبادی سەرکۆنسولی ئێران لە هەولێر و شاندی یاوەری کۆبووەوە و گفتوگۆی کرد.

لەو دیدارەدا پەیوەندییە دەرەکییەکانی پارتی و ڕووداوەکانی چەند مانگی ڕابردوو و پاشهات و کاریگەرییەکانی تاوتوێ کرا.

سیوەیلی بە داکۆکی لە جوگرافیا و سنووری هاوبەشی نێوان هەرێمی کوردستان و ئێران و مێژوو و بەرژەوەندییە هاوبەشەکانی نێوان هەر دوولا، وتی: پاراستنی پەیوەندیی دۆستانەی نێوان ئێران و هەرێمی کوردستان و تۆکمەکردنی ئەو پەیوەندیانە زەروورەتێکە، هەر وەک پێشتر لە سەنگەرێکدا لە دژی دوژمنی هاوبەشی تێهەڵچووینە و قوربانیمان داوە.

وتیشی: کۆماری ئیسلامی ئێران لە قۆناغە گرینگ و جۆراوجۆرەکاندا هاوکار و پاڵپشتی هەرێمی کوردستان بووە و پێویستە بۆ گەیشتن بە داهاتوویەکی ڕووناک و بەرژەوەندیی هاوبەش هەر دوولا لە پێناو متمانەبەخشین و تێگەیشتنی بەرامبەر هەوڵ بدەن.

سیوەیلی جەختی لەوەش کردەوە کە هەرێمی کوردستان خوازیاری پەیوەندیی دۆستانە و نیازپاکانە و هاوئاهەنگیی زیاتر لە گەڵ ئێرانە و هیوادارین کە تارانیش بۆچوونێکی لەو شێوەیەی هەبێت.

لە بەرامبەردا مورتەزا عەنادیش جەختی لەوە کردەوە کە ئێران هیچکات دەوڵەت و خەڵکی هەرێمی کوردستانی وەک دوژمنی خۆی نەزانیووە و نەیبینیوە و بێ شک سەبارەت بە هەندێک پرس جیاوازیی ڕابۆچوونمان هەبووە، بەڵام ئەو جیاوازیانە هیچکات نەبۆتە هۆی ناکۆکی و دوورکەوتنەوەی ئێران و هەرێمی کوردستان.

ناوبراو ئاماژەی بە پەیوەندیی دۆستانە و پێشووی هێزەکانی هەردوولا کرد و ڕایگایەند: کۆماری ئیسلامی ئێران ئامادەیی خۆی بۆ هەرجۆرە یارمەتی گەیاندن و هاوکاری و کەڵک وەرگرتن لە پەیوەندییەکانی خۆی لە پێناو چارەسەریی ناکۆکی و کێشەی نێوان هەولێر و بەغدا دەردەبڕێت و لە سەر ئەو بڕوایەیە کە تاقە رێگەچارەی ئەو ناکۆکیانە گفتوگۆ و دانوستانە.

لایەنەکان لەم دیدارەدا جەختیان لەوەش کردەوە کە پێویستە بۆ نزیککردنەوەی ڕاوبۆچوونەکان و تۆکمەی پەیوەندییەکانی هەولێر و تاران لە پێناو سەقامگیریی ناوچەکە هەوڵ بدرێت.

ناردنی بۆچوون

1 + 1 =