هاوپەیمانان سەرجەم هاوکارییەکانیان بۆ هەرێمی کوردستان دەوەستێنن

بە پێی ڕاپۆرتی ڕاپۆرتی ئاژانسی هەواڵی مێهر، جەبار یاوەر، ئەمینداری پێشووی وەزارەتی پێشمەرگە دەڵێت: ئەمساڵ كۆتا دەرفەتە بۆ یەكخستنی هێزەكانی پێشمەرگەو ئەگەر پڕۆسەی چاكسازیی لە هێزەكانی پێشمەرگە جێبەجێ نەكرێت كە سەرەكیترین خاڵی یەكخستنی هێزەكانی پێشمەرگەیە، ئەوا هاوپەیمانان سەرجەم هاوکارییەکانیان بۆ هەرێمی کوردستان دەوەستێنن.

جەبار یاوەر، ئەمینداری پێشوی وەزارەتی پێشمەرگە، ئەمڕۆ پێنجشەممە بە میدیای پارتی راگەیاند: یاداشتنامەی لێکتێگەشتنی ساڵانە هەیە لەنێوان وەزارەتی پێشمەرگەی حکومەتی هەرێمی کوردستان و وەزارەتی بەرگری ئەمەریکا، هەموو ساڵێک ئەو یاداشنامەیە نوێ دەکرێتەوە.

راشیگەیاند: بەپێی ئەو یاداشتنامەیە ساڵانە هاوکارییەکان لەلایەن ئەمەریکاوە پێشکەش بە هێزی پێشمەرگە دەکرێت، کە خۆی دەبینێتەوە لە هاوکاری راوێژکاری، مەشقپێکردن، چەک و تەقەمەنی، هەروەها مانگانە 20 ملیۆن دۆلار وەک موچە دەنێرن بۆ هێزەکانی پێشمەرگە، هاوکات یەکێک لە مەرجەکانی ئەو یاداشتنامەیە دەبێت هێزەکان پێشمەرگە یەکبخرێت و پڕۆسەی ریفۆڕم جێبەجێبکرێت.

ئەمینداری پێشوی وەزارەتی پێشمەرگە ئەوەشی خستەڕو، لە ساڵی 2018 پڕۆژەیەکی هاوبەش هەبو لەنێوان ئەمیندارێتی وەزارەتی پێشمەرگەی حکومەتی هەرێمی کوردستان لەگەڵ وڵاتانی ئەمەریکا، ئەڵمانیا، بەریتانیا و هۆڵەندا، کە 35 خاڵی ریفۆڕمیان بۆ پێشمەرگە خستەڕوو، لەو پڕۆژەیەش هاتووە دەبێت لەماوەی سێ تا پێنج ساڵ جێبەجێ بکرێت، کە سەرەکیترین خاڵیان یەکخستنی هێزی پێشمەرگەی هەرێمی کوردستانە.

ئاماژەی بەوەدا، ئەمەریکا و هاوپەیمانان گرنگیەکی تایبەت بە هەرێمی کوردستان دەدەن، بەهۆی ئەوەی هەرێمی کوردستان پێگەیەکی ستراتیژی لە روی جوگرافییەوە هەیە لە ناوچەکەدا، هەروەها بەرژەوەندییەکی باڵای ئەمەریکا و وڵاتان هەیە لە هەرێمی کوردستان و لە عێراق بە گشتی، ئەوان دەیانەوێت هێزی پێشمەرگەی هەرێمی کوردستان یەکگرتوو بێت، ئەوان نایانەوێت ناکۆکی لایەنە سیاسییەکانی هەرێمی کوردستان لەسەر بەڕێوەبردبی حکومەت ببێتە ناکۆکییەکی چەکداری.

جەبار یاوەر، وتیشی: ئەمساڵ کۆتا دەرفەتە بۆ یەکخستنی هێزەکانی پێشمەرگە، بەهۆی ئەوەی ئەگەر ئەمساڵ پڕۆژەکە جێبەجێ نەکرێت، ئەمەریکا و هاوپەیمانان "بڕواناکەم جارێکی دیکە یاداشتنامەی لێکتێگەشتن لەگەڵ هەرێمی کوردستان واژو بکەن"، هەروەها ئەو کات "سەرجەم هاوکارییەکانیان دەوەستێنن بۆ هەرێمی کوردستان".

باسی لەوەشکرد، "ململانێی سیاسی هۆکارە بۆ سستبون و راگرتنی پڕۆسەی یەکسختنی هێزەکانی پێشمەرگە و سەرجەم هیزەکانی دیکە"، هەروەها "دەبێت هەمو هێزە چەکدارەکان بێلایەن بن"، بەهۆی ئەوەی ئەمەریکا و هاوپەیمانان نایانەوێت پێشمەرگە بۆ ململانێی سیاسی بەکاربێت.