بەپێی ڕاپۆرتی ئاژانسی هەواڵی مێهر، ڕۆژنامەیەکی تورکی ڕایگەیاند کە لە چوارچێوەی پڕۆسەی ئاشتیدا، مەزڵوم کۆبانی، فەرماندەی گشتیی هەسەدە داوای کردووە لە زیندانی ئیمرالی لەگەڵ عەبدوڵڵا ئۆجالان، ڕێبەری زیندانیکراوی پارتی کرێکارانی کوردستان (پەکەکە) کۆببێتەوە، بەڵام تورکیا ئەو داوایەی ڕەتکردۆتەوە و تا ئێستا هیچ کۆبوونەوەیەکی فەرمی لە نێوان کۆبانی و حکومەتی تورکیا ئەنجام نەدراوە.
ڕۆژنامەی جمهوریەتى تورکى لە ڕاپۆرتێکدا ئاماژەی بەوەکردووە، مەزڵوم کۆبانی فەرماندەی گشتیی هێزی کورد لە سووریا داوای کردووە گەشت بۆ تورکیا بکات و لەگەڵ عەبدوڵا ئۆجالان ڕێبەری زیندانیکراوی پەکەکە کۆببێتەوە.
ڕۆژنامەکە ئەوەشی خستووەتەڕوو، مەبەستی مەزڵوم کۆبانی بۆ ئەم کۆبوونەوەیە لە ئیمرالی تاوتوێکردنی پرسی دانانی چەک بووە و بۆ ئەم کۆبوونەوەیە داوای مۆڵەتی لە دامودەزگا فەرمییەکانی حکومەتی تورکیا کردووە.
عومەر چەلیک، وتەبێژی پارتی داد و گەشەپێدان (ئاکە پارتی) پێشتر لە بەیاننامەیەکدا ڕایگەیاندبوو، تا ئێستا هیچ کۆبوونەوەیەکی فەرمی لەنێوان هێزەکانی (هەسەدە) و بەرپرسانی حکومەتی تورکیا ئەنجام نەدراوە و ئەگەر بڕیار بدرێت هەنگاوێک سەبارەت بە دانانی چەک و چوارچێوەی جێبەجێکردنی ئەم بابەتە، هەڵگیرێت، ئاژانسە فەرمییەکانی تورکیا لەو بارەیەوە ئاگادار دەکەنەوە.
Your Comment