بە ڕاپۆرتی ئاژانسی هەواڵی مێهر، حوجەتولئیسلام حەسەن ڕۆحانی لە دانیشتنی ئەمڕۆی لیژنەی دەوڵەت بە ئاماژە بە کوشتوبڕی موسڵمانانی میانمار ڕایگەیاند: لە میانماردا خەڵکی موسڵمان کەتوونەتە ژێر گوشار و سەدان هەزار کەس ئاوارە بوونە و ژمارێکی زۆریش کوژراون، بە چەشنێک کە تەرمی هەندێک سووتێندراون و ماڵەکانیشیان ئاگر دراوە.
ڕۆحانی بە داکۆکی لەوەی کە هیچ جیاوازییەک لە نێوان خەڵکی میانمار و موسڵمانانی دیکەی جیهان نییە، ڕاشیگەیاند: ئێمە وەک وڵاتێکی موسڵمان و شۆڕشی هەست بە بەرپرسایەتی دەکەین هەمبەر بە چەوساوە موسڵمان و تەنانەت ناموسڵمانەکانی جیهان و لەو ڕووەوە داوا لە دەوڵەتی میانمار دەکەین پێش بە جەنایەتەکان لە دژی موسڵمانانی ئەو وڵاتە بگرێت و هاوکات داوا لە وڵاتانی دراوسێ و موسڵمان دەکەین کە لەو بوارەدا بچنە هانای خەڵکی ئاوارەی میانمار.
ناوبراو ئاماژەی بەوەش دا: داوا لە ڕێکخراوی نەتەوە یەکگرتووەکانیش دەکەین کە ئەرک و بەرپرسایەتیی خۆی ڕاپەڕێنێت و جیهانی ئیسلامیش دەبێ لە باری سیاسی و مرۆییەوە یارمەتیی خەڵکی میانمار بدەن. لەو پێناوەدا کۆماری ئیسلامی ئێران و ڕێکخراوی مانگی سووری ئەم وڵاتە ئامادەیی خۆی بۆ یارمەتی گەیاندن و پێدانی شوێنی نیشتەجێتی بە ئاوارەکانی ئەو وڵاتە ڕادەگەیێنێت.
سەرۆک کۆماری ئێڕان لە کۆتاییدا هەر جۆرە ژینۆسایدێکی لە جیهانی ئەمڕۆدا بە دزێو و قبووڵ نەکراو زانی و جەختی لەوە کردەوە: ئەمڕۆکە دەبێ لە دژی ئەو جۆرە هەڵسوکەوت و ژینۆسایدانە هەڵوێستێکی یەکلاکەرەوە و جیهانی و هاوسان بگرینە بەر، بۆ ئەوەی بتوانین یارمەتیی چەوساوەکانی جیهان و خەڵکی میانمار بدەین.
Your Comment