ئیمام ئۆغڵۆ بە هۆی کوردەوە دەستبەسەر کراوە

بە پێی ڕاپۆرتی ئاژانسی هەواڵی مێهر، ئۆزگور ئۆزەل، سەرۆکی گشتیی پارتی کۆماری گەل (جەهەپە)، دوای سەردانیکردنی ئەکرەم ئیمامئۆغڵو، سەرۆکی گەورەشارەوانی ئەستەنبوڵ لە بەندیخانەی داخراوی مەرمەرە، ئاماژەی بەوەکرد،" هەڵوێستی جەهەپە سەبارەت بە کێشەی کورد زۆر ڕونە، ئەگەر کوردەکان دەڵێن کێشەیەک هەیە ئەوا کێشەکە هەیە و چارەسەرکردنی ئەرکی هەمومانە ".

ئۆزەل وتیشی،" ئامادەین پشتگیری هەر هەنگاوێک بکەین کە لە پەرلەمانەوە زەمینەی بۆ دەڕەخسێندرێت، بەڵام دەمەوێت بڵێم ئەوانەی کوردەکان و کێشەکە ڕەتدەکەنەوە، ڕاستگۆ نین ".

لەبارەی دەستگیرکردنی ئیمامئۆغلۆش باسی لەوەکرد، بەهۆی پێشنیارکردنی پۆست بۆ کوردەکان لە ئەنجومەنی شارەوانیدا دەستگیرکراوە، ئەو عەقڵییەتەی کە کوردەکان بە شایستەی ئەنجومەنی شارەوانی نازانێت، ناتوانێت ئەم کێشەیە چارەسەر بکات.