بە ڕاپۆرتی ئاژانسی هەواڵی مێهر، رێبەر ئەحمەد، وەزیرى ناوخۆى هەرێمى کوردستان لەمیانى دەرچوونى ژمارەیەک ئەفسەرى زێرەڤانى ڕاگەیاند:" ئێمە داوا لە ئەمریکا و حکوومەتى عێراق دەکەین کە ئاگادارى زیاتر هەبێت لە نێوان پێشمەرگە و سوپاى عێراق لەو ناوچانەى تازە لەدەستى داعش رزگار کراون، چونکە هێشتا داعش لەناو نەچووە و لە هەندێ ناوچە سەریان هەڵداوەتەوە".
ڕاشیگەیاند کە هەرێمى کوردستان پابەندە بە رووبەرووبوونەوەى تیرۆر و بەتایبەت لەناوبردنى چەکدارو پاشماوەکانى داعش.
رێبەر ئەحمەد داواشى کرد کە پەلە بکرێت لە ئاساییکردنەوەى دۆخى ناوچە کێشەلەسەرەکان و گەڕانەوە پیشمەرگە بۆ ئەو ناوچانە.
وەزیرى ناوخۆ وتیشى: "چاوەڕێی حکومەتى عێراق دەکەین بۆ ئەوەى ئەو لێکتێگەیشتنەى لەنێوان هەرێم و بەغدا دروست بووە جێبەجێ بکرێت".
لەبارەى یەکخستنەوەى هێزەکانى پێشمەرگەش وەزیرى ناوخۆ جەختکردەوە لە کابینەى نۆیەمدا بەتایبەت لەلایەن سەرۆکى حکومەتەوە هەوڵى جدى هەیە بۆ رێکخستنەوەو یەکخستنەوەى هێزى پێشمەرگە و وەزارەتى پێشمەرگە.
Your Comment