ڕیفراندۆمی هەرێم بەشێکە لە پلانی رۆژهەڵاتی ناڤینی گەورە

سەرۆکی کۆمیتەی پەیوەندییە دەرەکییەکانی مەجلیسی شۆڕای ئیسلامی، بە ئاماژەی بەوەی کە ڕیفراندۆمی هەرێمی کوردستان بەشێکە لە پلانی "رۆژهەڵاتی ناڤینی گەورە" جەختی لەوە کردەوە: لە ئەگەری تەشەنەسەندنی ئەو بابەتە، گەلی کورد یەکەمین قوربانیانی ڕووداوەکە دەبن.

مورتەزا سەفاری نەتەنزی لە وتووێژ لە گەڵ هەواڵنێری ئاژانسی مێهر بە ئاماژە بە ڕیفراندۆمی هەرێمی کوردستان ڕایگەیاند: کوردەکان نەتەوەیەکی ڕەسەنن لە ناوچەدا و لە درێژەی مێژوودا بەردەوام لە ژێر گوشار و هەڵاواردندابوون.

ناوبراو وتیشی: لە عێراقی سەردەمی سەددام کوردەکان ستەمێکی زۆریان لێ کرا و لە تورکیاشدا ساڵانێکی زۆرە نکۆڵی لە شوناسیان دەکرێت و وەک تورکی کێوی ناویان لێ‌دەبرێت.

سەرۆکی کۆمیتەی پەیوەندییە دەرەکییەکانی مەجلیس ڕوونی کردەوە: ئەو گوشارانە تا رادەیەک هاندەری پەیجۆریی کوردەکان بۆ سەربەخۆیی و جیابوونەوەینا بووە و بەڕێوەچوونی ڕیفراندۆمیش پەیوەندیی بەو کێشەگەلەوە هەیە. بەڵام ئەوەی کە لە کاتی ئێستادا کە بەرەوڕووی کێشەی داعش و پرسی بەرەنگاربوونەوەی تیرۆریستانین، بەڕێوەچوونی ڕیفراندۆمی هەرێمی کوردستان هەندێک گومانی لێ دەکەوێتەوە.

سەفاری نەتەنزی زیادی کرد: لە لایەکەوە بەرەوڕووی کێشەگەلی ناوچەیین و لە لایەکی دیکەوە دەستێوەردانەکانی ئەمریکا و زایۆنیستەکان لە ئارادایە کە هەوڵ دەدەن بە دابەزاندنی پلانی "رۆژهەڵاتی ناڤینی گەورە" لە ناوچەدا ئاژاوە بنێنەوە و وڵاتان دابەش بکەن.

ناوبراو جەختی کرد: لە هەلومەرجێکی ئاوادا نابێ ئیزن بدەین کە دیتران گۆرانکارییەکانی ناوچە بگرنە دەست و بەرژەوەندییە جەماوەرییەکانی خەڵکی ناوچە قوربانی بێت.

ئەندامی کۆمیسیۆنی ئاسایشی نیشتمانی و سیاسەتی دەرەکیی مەجلیس ڕایگەیاند: ئەوەی لە ئێستادا ئەنجام دەدرێت بە دڵنیاییەوە دەبێتە هۆی قوربانی بوونی گەلی کورد و هەلومەرجی ئێستا بۆ گەیشتنی ڕیفراندۆم بە سەربەخۆیی گونجاو نییە.

دەسەڵاتە دەرەکییەکان لە پشتی ڕیفراندۆمن

سەفاری نەتەنزی ئاشکرای کرد: لە ئێستادا ناوچەکە پڕ لە تەنگەژەیە و بە دڵنیاییەوە کوردەکان لەوبارەدا بەرەوڕووی ململانییەکی جیدی دەبنەوە؛ چونکا کوردانی تورکیا چوار ئەوەندەی حەشیمەتی دانیشتووی هەرێمی کوردستانن و ئەم ڕیفراندۆمە دەتوانێ هەڕەشەیەک بێت بۆ ئاسایشی تورکیا و سووریا.

سەرۆکی کۆمیتەی پەیوەندییە دەرەکییەکانی مەجلیس بە ئاماژە بە پاڵپشتی کردنی ڕژیمی زایۆنی لە بەڕێوەچوونی ڕیفراندۆمی هەرێمی کوردستان ڕایگەیاند: ئەو ڕیفراندۆمە دەتوانێ بەشێک بێت لە پیلانی رۆژهەڵاتی ناڤینی گەورە کە هەوڵ دەدات وڵاتانی گەورە دابەش بکات و دەسەڵاتەکانی ناوچە لاواز و ئاسایشی ڕژیمی زایۆنی بەرزتر بکاتەوە.

ڕژیمی زایۆنی بە دوای نەوت و وزەی هەرێمە

سەفاری نەتەنزی زیادی کرد: ڕژیمی زایۆنی دەتوانێ قازانجێکی زۆر لە ڕیفراندۆم و سەربەخۆیی هەرێمی کوردستان و دابەشکردنی وڵاتانی ناوچە و لەوان لە وەبەرهێنانی سەرچاوە نەوتی و وزەکانی هەرێمی کوردستان ببات.

ناوبراو بە ئاماژە بەوەی کە هیچ وڵاتێکدان بەو ڕیفراندۆمەدا ناهێنێت، بیری هێنایەوە: ئەگەر هەرێمی کوردستان بیەوێ بە ڕیفراندۆمە سەربەخۆیی ڕاگەیێنێت دەبێ دوو لە سێی ئەندامانی ڕێکخراوی نەتەوە یەکگرتووەکانی لە پشت بێت، لە کاتێکدا کە نە ئێستا و نە لە داهاتوودا ئەو هەلەی بۆ ناڕەخسێت.

ئەندامی کۆمیسیۆنی ئاسایشی نیشتمانی و سیاسەتی دەرەکیی مەجلیس سەبارەت بە سیاسەتی داهاتووی کۆماری ئیسلامی ئێران هەمبەر بە بەرپرسانی هەرێمی کوردستان ڕاشیگەیاند: ئێمە دۆژمنایەتیمان لە گەڵ کەسدا نییە، بەڵام ئەو سیاسەتەی هەرێم داهاتوویەکی پڕ لە ئاژاوەی بە دواوەیە و تەنانەت بۆ گەلی کوردیش ململانێ‌هێنەر و ترسێنەرە.

سەفاری نەتەنزی جەختی لەوەش کردەوە: ئەگەر پرسی سەربەخۆیی ئاژاوە و کێشەی بە دواوە بێت، ئەوا گەلی کورد یەکەمین قوربانیانی ئەو دۆخە دەبن.

News Code 13250

نیشانەکان

بۆچوونی ئێوە

You are replying to: .
  • 1 + 1 =