ئاژانسی هەواڵی مێهر، بەشی نێودەوڵەتی: لەچوارچێوەی ڕێککەوتنی ئەمنی تاران، بەغدا و هەولێر، کۆمەڵێک لە ئەندامانی حزبە کوردییەکانی بەرهەڵستکارەکانی ئێران، بارەگاکانیان لە ناوچەی "زڕگوێز، زەرگوێزڵە و بانە گەورە" لە شاری سلێمانی چۆڵکرد و گواسترانەوە بۆ کەمپی سوورداش لە شاری دوکان.
ڕۆژی شەممە 20ی گوڵان، هێزە ئەمنییەکانی سلێمانی کۆمەڵێک ئەندامی حزبە کوردییەکانی دژبەری ئێرانیان لە سێ بارەگای زڕگوێز چۆڵکرد و گواسترانەوە بۆ کەمپی سورداش.
حیزبە کوردە دژبەرەکانی ئێران لەوان کۆمەڵەی زەحمەتکێشان، کۆمەڵەی شۆڕشگێڕی کوردستان، و کۆمەڵەی ڕێکخراوەی کۆمۆنیستی ئێران، ئیتر بۆیان نییە لە بارەگاکانیان لە نزیک سنووری ئێران ئامادەبن و دەبێ تا کەمپی سورداش لە قووڵایی شاری سلێمانی پاشەکشە بکەن.
ئەو لایەنانە پێشتر بەتەواوی چەکی قورس و نیمچە قورسیان لێسەندراوەتەوە، ئەمەش بەگوێرەی ڕێککەوتنی ئەمنی ئێران و عێراق و هەرێمی کوردستان.
مانگی ڕابردوو دەزگای ئەمنیی سلێمانی وادەی دە ڕۆژی دا بە پارتە کوردییەکانی ئێران بۆ گواستنەوەی سەرجەم خێزان و ئەندامەکانیان بۆ کەمپی سورداش.
لە ناوەڕاستی ساڵی 2023، ئێران ڕێککەوتنێکی ئەمنی لەگەڵ حکومەتی عێراق و هەرێمی کوردستان واژۆ کرد کە ئامانج لێی چەکداماڵینی حزبە کوردییەکانی دژبەری ئێران و دوور خستنەوەیان لە سنووری ئێران و ڕادەست کردنەوەی سەرکردەکانیان بوو. ئێستا دوو قۆناغی سەرەتایی جێبەجێ کراوە بەڵام هێشتا هیچ سەرکردە و داواکراوێک لەوانە ڕادەستی ئێران نەبووەتەوە.
شیاوی ئاماژەیە شەش مانگ دوای هێرشی مووشەکی و درۆنی سپای پاسداران بۆ سەر بنکەی پارتە کوردییە ئێرانییەکان لە هەرێم، ڕێککەوتننامەی ئەمنیەتی نێوان تاران و بەغدا بۆ چەک داماڵینی ئەو حزبانە لە ڕەشەممەی ساڵی 1401ی هەتاوی واتا سێ ساڵ لەمەوپێش واژۆ کرا.
بە پێی ئەو ڕێککەوتننە ئێران تا 28 ی خەرمانانی ساڵی 1402 مۆڵەتی دایە عێراق کە حزبە کوردییە ئێرانییەکانی جێگیر لە هەرێم کە هەڕەشەی ئەمنیەتی بۆ کۆماری ئیسلامی ئێرانن، چەکەکانیان دابنێن و کەمپەکانیان دابخرێت بەڵام ئەو ڕێککەوتننە تا ئێستا بەتواوەتی جێبەجێ نەکرابوو. کە دوێنێ بەشێکی دیکەی جێبەجێ کرا.
پێشتر هەموو ئەندامان و بنەماڵەی سێ لقی کۆمەڵەی کوردستانی ئێران، کۆمەڵەی زەحمەتکێشانی کوردستان و کۆمەڵەی لقی ڕێکخراوی حزبی کۆمۆنیستی ئێران، کەمپەکانیان لە سلێمانی لە ناوچەکانی زڕگوێز، زڕگوێزەڵە و بانەگەورە چۆڵ کرد و سەرجەم چەکە قورس و نیوەقورسەکان و جیهازاتی لۆجستیکی خۆیان ڕادەستی یەکێتی نیشتمانی کردووە.
ئێستا هەموو ئەو ئەندامان و لایەنگران و بنەماڵەکانیان کە لە بنکەکانیان لە زڕگوێز بەجێمابوون بە تەواوەتی گواستراونەتەوە و بنکەکانیان دوای چەند دەیە، چۆڵ کرا و هێزی ئەمنی یەکێتی نیشتیمانی کوردستان کۆنتڕۆڵی کرد و تێیدا جێگیر دەبێت.
ئەندامانی کۆمەڵە لە چەند قۆناغدا لە نزیک سنوورەکانی ئێرانەوە بۆ کەمپی سورداش لە نزیکی شاری دوکان و لە 40 کیلۆمەتری قووڵایی سلێمانی گواستراونەتەوە بۆ هاتوچۆ بۆ نێو شارەکان ئەبێ مۆڵەتی یاسایی وەربگرن.
پێش لە گواستنەوەی ئەندامانی کۆمەڵە لە نزیکی سنوورەکانی ئێران ، هێزە ئەمنییەکانی هەرێم، ئەندامانی حزبی دیمۆکراتی کوردستانی ئێران (حدکا)یان لە بنکەی سەرەکیەکان لە کۆیە ناسراو بە قەڵای دیمۆکرات لە گردەچاڵە بۆ کەمپێک گواستەوە و چەکەکانی ئەوانیش رادەستی پارتی دیمۆکرات کرا.
Your Comment