شەپۆلی بەربڵاوی دەستگیرییەکان لە لۆس‌ئانجلیس؛ هێزی دەریایی ئەمریکاش لە ئاژاوە وەردرا

بە ڕاپۆرتی ئاژانسی هەواڵی مێهر بە گێڕانەوە لە ڕۆیتێرز، کارێن باس، شارەوانی لۆس‌ئانجلیس لە دانانی ڕێوشوێنی توندی هاتوچۆ بە مەبەستی هێورکردنەوەی شەقامەکانی ئەو شارە لە پاش ناڕەزایەتییە بەربڵاو و توندئاژۆکان لە دژی سیاسەتگەلی دژی کۆچبەریی دۆناڵد ترامپی سەرۆک کۆماری ئەمریکا هەواڵی دا و وتی: بە هاتنی 700 چەکداری هێزی دەریایی بۆ ئەو شارە، هەر لە یەکەم کاتژمێرەکانی ڕێوشوێنی ئەمنی، دەستگیریی بەربڵاوی خۆپیشاندەران دەستی پێکردووە و هەر شەوی ڕابردوو 197 کەس قۆڵبەست کراون.

بەەوەشەوە ڕاپۆرتەکان باس لە تەشەنەسەندنی خۆپیشاندان و گردبوونەوەی زیاتر لەو شارە و چەندین شاری دیکەی ئەمریکا لە پاش ڕەوانەکرانی گاردی نیشتمانی و چەکدارانی هێزی دەریایی بۆ شاری لۆس‌ئانجلیس دەکەن؛ خۆپیشاندانێک کە لە کارادنەوە بە ئۆپەراسیۆنی دژە کۆچبەریی هێزەکانی ئیدارەی گۆمرۆکی ئەمریکا دەستی پێکرد و ئەوڕۆ هەنگاو دەنێتە ناو پێنجەمین ڕۆژی خۆی.

لەمناوە سەرکردەکانی پارتی دیموکراتی ئەمریکا سەبارەت بە قەیرانی نیشتمانی و تەشەنەدارتربوونی ڕووداوەکان لە ئەنجامی داپەڕە دژە کۆچبەرییەکانی ترامپ و هەروەها بایکۆتی ناڕازییانی سەرشەقام، نیگەرانن و گاوین نیوسامی فەرمانداری کالیفۆڕنیا لە گرتەیەکی ڤیدئۆییدا، ئەو هەڵمەتەی بە "کەڵک‌ئاوەژوویی ئاشکرای سەرۆک کۆماری ئەمریکا لە دەسەڵات" ناو لێ ناوە و دەڵێ: دۆخەکە لە ئەنجامی کارەکانی ترامپ ئامادەی تەشەنەسەندنە و خەڵک، ئەفسەران و تەنانەت گاردی نیشتمانی کەوتوونەتە مەترسییەوە و ئێمەی بە ئاراستەی نشیوی ڕووخاندا دەبا. کەچی ئەو(ترامپ) لەو دۆخەدا دیسان ئاژاوە و زەخت و ئاکاری نمایشی گرتۆتە بەر و ئەمەش واتە "دەستدرێژی بۆ سەر دیموکراسی".

دەسپێکی ئەم ئاژاوەیە کە پەیوەستە بە بەڵێنی ترامپ بۆ دەرکردنی بەربڵاوی کۆچبەرانی نایاسایی لە خاکی ئەمریکا، کاتێک لە ڕاپۆرتی دەستگیریی ڕۆژانەی 2 هەزار کۆچبەری نایاسایی لە لایەن ئیدارەی گومرۆک و کۆچبەریی ئەمریکا ڕەنگی دایەوە، بووە هۆی تووڕەبوون و هەڵچوونی خەڵکی ناڕازیی بەو بڕیارە و خۆپیساندەران لە هاوخەمی لەگەڵ کۆچبەرانی دەستگیرکراوە لە زنجیرە هێرشێکی بەربڵاودا لە شاری لۆس‌ئانجلێس بە ئاڵای مەکزیک و وڵاتانی تر ڕژانە سەر شەقام.

تەشەنەسەندنی ناڕەزایەتییەکان و پەلاماردانی ناڕازییان بۆ سەر ناوەندی و داراییە گشتییەکان، دۆخەکەی لە پێنج ڕۆژی رابردووەوە بە ئاراستەی توندئاژۆییدا برد و بەو پێیە، وەک شارەوانی لوس‌ئانجلێس دەڵێ، دەوڵەت بە ناچار ڕێوشوێنی توندی ئەمنیی لە ناوچەیەک بە ڕووبەری 2.5 کیلۆمەتری دووجا و لە ماوەی کاتژمێری 20 تا 6ی بەیانی لەو شارەدا گرتۆتە بەر. کەچی وەک ڕۆیتێرز دەڵێ، بەوەشەوە ناڕازییان هێشتاش لە شەقامەکاندا ماونەتەوە و دروشمی "ناڕەزایەتیی ئاشتی‌خوازانە" هەڵدەدەن.