بە پێی ڕاپۆرتی ئاژانسی هەواڵی مێهر، ئەردۆغان لە کاتی گەڕانەوەی لە کۆبوونەوەی کۆمەڵگەی سیاسیی ئەورووپا لە تیرانا، لە وتووێژێکدا لەگەڵ ڕۆژنامەنووسان لە فڕۆکەکەدا کاردانەوەی بەرامبەر ڕاگەیاندنی هەڵوەشاندنەوەی گرووپی پەکەکە نیشان دا و جەختی لەسەر پێویستی سڕانەوەی پەکەکە کردەوە کە "بەبێ مەرج چەکەکانی خۆی ڕادەست بکات".
ئەردۆغان لە وەڵامی پرسیارێکدا سەبارەت بە گرنگی بڕیارەکەی ئەم دواییەی پەکەکە بۆ کۆتاییهێنان بە شەڕی چەکداری، وتی: تورکیایەکی بێ تیرۆر خەون نییە، بەڵکوو ئامانجێکە لێی نزیک دەبینەوە.
وتیشی: ئەم ئامانجه تەنیا بەدی دێت که تاقمی تیرۆریستی به تەواوی چەکەکانی خۆی دابنێت و پێکهاتەکەی هەڵوەشێنێتەوه و ڕێبازی نایاسایی خۆی به جێبهێڵێت.
ڕاشیگەیاند: "ئێمە هەنگاو بە هەنگاو بەدواداچوون بۆ جێبەجێکردنی ورد و تەواوەتی ئەم بڕیارە دەکەین".
ناوبراو بە ئاماژەدان بە خۆشی خەڵک لە ناوچەکانی باشووری ڕۆژهەڵاتی تورکیا، دەشڵێت: کاتێک گەلەکەمان لە دیاربەکر و هەکاری و ئیغدر ئاهەنگ دەگێڕن و لە شەقامەکاندا سەما دەکەن، ئەوە نیشان دەدات کە میللەتەکەمان ئەم گۆڕانکارییە قبووڵ دەکات و بە هی خۆی دەزانێت.
Your Comment