سەرۆکی نوێی توێژینگەی کوردستانناسی زانکۆی کوردستان ناسێندرا

لە ڕێوڕەسمێک بە ئامادەبوونی مامۆستایان و توێژەرانی زانکۆیی، وێرای نرخاندنی ٥ ساڵ هەوڵ و چالاکی دوکتۆر ئۆمید قادر زادە سەرۆکی پێشووی توێژینگەی کوردستانناسی زانکۆی کوردستان، دوکتۆر بێهرووز چەمەن ئارا بە سەرۆکایەتی ئەو توێژینگە ناسێندرا.

بە ڕاپۆرتی ئاژانسی هەواڵی مێهر، دوکتۆر فەردین ئەخلاقیان سەرۆکی زانکۆی کوردستان لە سەرەتای ئەو ڕێوڕەسمە بە داکۆکی لە پێگە و گرینگیی توێژینگەی کوردستانناسی، لە کرانەوەی بینایەکی نوێ بۆ ئەو توێژینگەیە هەواڵی دا و وتی: بۆ کردنەوەی ئەو ناوەندە کە لە زەوییەک بە ڕووبەری دوو هەزار مەتری دووجا چێ دەکرێت، لە هەنگاوی یەکەمدا ٥٠٠ ملیۆن تەمەن گۆژمە ڕەچاو گیراوە.

ئەخلاقیان وتیشی: لە ماوەی ساڵانی ڕابردوو هەنگاوی باش و گونجاو لە توێژینگەی کوردستانناسیدا هەڵگیراوە و بە پێی دەفرایەتی و بەربڵاوێتی بەستێنی توێژینگە چاوەروانیی چالاکی بەرزتر و مسۆگەر کردنی ئامانجی گەورەتری لێ دەکرێت.

لە درێژەدا دوکتۆر ئۆمید قادر زادە سەرۆکی پێشووی توێژینگەی کوردستانناسی ئاماژەی بە ٥ ساڵ چالاکیی خۆی لەو توێژینگەیە کرد و ڕایگەیاند: لە سەرەتای وەرگرتنی ئەو پۆستە توێژینگە تەنیا کتێبخانەیەکی سەڵت بە بێ هیچ پلان و نەخشەرێیەکی تایبەتی بوو و ئێمە هەوڵمان دا وێرای بە لیست کردنی کتێبەکان و بەکارهێنانی نەرم ئامێری کتێبخانەیی، سامانێکی نوێ بە کتێبخانەکە ببەخشین.

ناوبراو بە ئاماژە بە زیادکردنی ٧ هەزار و ٥٠٠ کتێب و ٢٠ هەزار سەرچاوەی ئەلەکترۆنی و کۆکردنەوەی ٦ هەزار رێکۆردی زانیاری بۆ توێژەران لە ماوەی چالاکی خۆی لە توێژینگەی کوردستانی، ڕاشیگەیاند: لەو ماوەیە زیاتر لە هەزار بەرگ زانیاری و  ڕاپۆرتی چالاکیگەلی کوردستانناسی کۆکراوەتەوە و بە زمانەکانی کوردی، فارسی و ئینگلیزی وەرگێڕدراوەتەوە و ڕادەستی لایەنگرانی بواری توێژینەوە لەو ناوەندە کراوە.

قادر زادە لە کۆتاییشدا ئاماژەی بە ٢٠ دانیشتن و کۆڕبەندی تایبەتی، ڕێوڕەسمی وەرگرتنی خوێندکار لە لقی زمان و ئەدەبی کوردی لە زانکۆی کوردستان، ناساندنی پێگەی ناوەندی کوردستانناسی لە گوتاری گەشە لە پارێزگا و بەرزکردنەوەی پێگەی ناوەند و جێکردنی لە گوتار و کەڵکەڵەی دەزگاگەلی بەرپرسی گەشەی کوردستان و تۆکمەی هێزی مرۆیی لەو ناوەندە وەک چالاکییە بەرچاوەکانی توێژینگەی کوردستانناسی کرد.

News Code 22974

نیشانەکان

بۆچوونی ئێوە

You are replying to: .
  • 1 + 1 =