بە ڕاپۆرتی ئاژانسی هەواڵی مێهر، سەید عەباس عێراقچی، وەزیری دەرەوەی ئێران لە لێدوانێک بۆ ماڵپەڕی هەواڵی "الفرات"، هەڵبژاردنی عێراق وەک یەکەم ئامانجی سەفەری سەرۆک کۆماری نوێی ئێرانی بە نیشانەی پێوەندیی قووڵ و برایانەی نێوان دوو وڵات زانی و وتی: بڕیارە لەم سەفەرەدا چەندین ڕێککەوتننامەی ئەمنی و ئابووری لە نێوان ئێران و عێراقدا واژۆ بکرێن.
ناوبراو هەروەها ئاماژەی بەوەدا کە مەسعوود پزشکیان لە سەفەری چوارشەممەی بۆ عێراق وێڕای سەردانی شاری بەغدا، سەردانی بەسرە و هەولێر و هەروەها شارە زیارەتییەکانی نەجەف و کەربەلاش دەکات.
وەزیری دەرەوەی ئێران لە درێژەدا جەختی لە ڕێککەوتنی ئەمنیی تاران و بەغدا کرد و ڕاشیگەیاند: ئێمە دڵخۆشین بە هەنگاوەکانی عێراق دژی گرووپە دژبەرەکانی خاکی ئێران و بەردەوام لەگەڵ لایەنی عێراقی سەبارەت بە ڕاپەڕاندنی گونجاوی مژارەکانی ئەو ڕێککەوتننامەیە لە دانوستانداین.
عێراقچی هەروەها بڕیاری پەرلەمانی عێراق بۆ کشانەوەی سەربازانی ئەمریکی لە خاکی ئەو وڵاتەی بە بڕیارێکی ژیرانە زانی و جەختی کرد: هاوڕێیانام لە عێراق ئاگاداری پاشهاتە نەگریسە و پڕ مەترسییەکانی مانەوەی ئەمریکا لە ناوچەدان و هیوادارین ئەم بڕیارە بە دروستی ڕاپەڕێندرێت.
Your Comment