ڕەنگدانەوەی شەهادەتی سەرۆک کۆمار و بەرپرسانی باڵای ئێران لە میدیاکانی جیهاندا

بە پێی ڕاپۆرتی ئاژانسی هەواڵی مێهر،ئێوارەی ڕۆژی یەکشەممە ئایەتوڵڵا سەید ئیبراهیم ڕەئیسی سەرۆک کۆماری ئێران لە ڕووداوی کەوتنەخوارەوەی هەلیکۆپتەرەکەدا شەهید بوو.

ڕەئیسی بۆ کردنەوەی بەنداوی سنووری "قز قەڵاسی" گەشتێکی بۆ ئازەربایجانی ڕۆژهەڵات کردبوو و ئەو هەلیکۆپتەرەی کە خۆی و هاوەڵەکانی هەڵگرتبوو، لە ڕێگای گەڕانەوەدا لە "کێوی دیزمار" لە ناوچەی گشتی نێوان وەرزەقان و جۆلفا لە پارێزگای ئازەربایجانی ڕۆژهەڵات تووشی ڕووداوێک بوو.

ئایەتوڵڵا ئەلی هاشم، پێش نوێژی هەینی تەورێز، حسێن ئەمیرعەبدوڵڵاهیان، وەزیری دەرەوە، مالیک ڕەحمەتی، پارێزگاری ئازەربایجانی ڕۆژهەڵات و چەند کەسێکی دیکە کە یاوەری سەرۆک کۆمار لەم هەلیکۆپتەرەدا لە شەهیدانی ئەم ڕووداوەن.

ئاژانسی هەواڵی "سپۆتنیک"ی ڕووسی وێڕای ڕاگەیاندنی هەواڵی شەهیدبوونی سەرۆک کۆمار و وەزیری دەرەوە و شاندی یاوەری ، ژیاننامەی شەهید ئایەتوڵڵا سەید ئیبراهیم ڕەئیسی بڵاوکردەوە.

ئاژانسی هەواڵی ڕۆیتەرزی ئینگلیزیش ئەم هەواڵەی بە گێڕانەوەی بەرپرسانی ئێران و میدیا فەرمییەکانی ئێران بڵاوکردەوە، چەند خولەکێک دوای ڕاگەیاندنی فەرمی شەهیدبوونی سەرۆک کۆماری وڵاتەکەمان و شاندی یاوەری.

ماڵپەری تۆڕی ئەلمەیادین: ئیبراهیم ڕەئیسی سەرۆک کۆماری ئێران و حوسێن ئەمیر عەبدوڵڵاهیان وەزیری دەرەوەی ئێران لە کەوتنەخوارەوەی ئەو کۆپتەرە شەهید بوون.

هەروەها پێگەی هەواڵی ئەلنەشرە لە هەواڵێکی بەپەلەدا لە زاری ئاژانسی هەواڵی مێهرەوە بڵاوی کردەوە: سەرۆک کۆماری ئێران و هاوڕێیەکانی بە هۆی کەوتنەخوارەوەی هەلیکۆپتەرێکەوە گیانیان لەدەستدا.

بەشی عەرەبی سی ئێن ئێن: هیچ نیشانەیەکی ژیانی لە شوێنی ڕووداوەکە بۆ کۆپتەرەکەی سەرۆک کۆماری ئێران و وەزیری دەرەوەی ئێران نەدۆزراوەتەوە. ئەم هەلیکۆپتەرە لە کاتی سەردانێکی سەرۆکایەتی بۆ ناوچەیەکی باکوور و ڕێوڕەسمی کردنەوەی بەنداوێکی هاوبەش لەسەر سنووری نێوان ئێران و کۆماری ئازەربایجان تووشی ڕووداوێک بوو.

ماڵپەڕی تۆڕی ئەلعەرەبییە: وێنە بڵاوکراوەکانی کۆپتەرە سووتاوەکە دەریدەخات کە ئەم کۆپتەرە کە سەرۆککۆمار و وەزیری دەرەوەی ئێرانی هەڵگرتبوو، خۆی کێشاوە بە شاخەکەدا. ئەم ڕووداوە بەهۆی خراپی کەش و هەوا بەسەر ناوچەیەکی دوورەدەست لە نزیک سنوورەکانی ئێران و ئازەربایجان ڕوویدا.

ماڵپەری سکای نیوز: سەرۆککۆمار و وەزیری دەرەوەی ئێران بەهۆی کەوتنەخوارەوەی ئەو کۆپتەرەی کە هەڵیانیگرتبوو لە باکووری ڕۆژهەڵاتی وڵات گیانیان لەدەستدا. هەروەها ئەم سایتە ڤیدیۆ کلیپێکی ژیانی سیاسی سەرۆکی کۆچکردووی وڵاتەکەمانی بڵاوکردەوە و وێنەی ئامادەبوونی لە کۆبوونەوە گشتییەکاندا بڵاوکردەوە.