بە ڕاپۆرتی ئاژانسی هەواڵی مێهر، سەید عەباس عێراقچی، وەزیری دەرەوەی ئێران لە میانەی سەفەری بۆ لوبنان، ئاماژەی بە هەڕەشەکانی ڕژیمی زایۆنی بۆ سەر ناوچەکە کرد و وتی: لە دوو ساڵی ڕابردوودا حەوت وڵاتی ناوچە و لەوان ئێران و لوبنان کەوتنە بەر شاڵاوی هێرشەکانی ڕژیمی زایۆنی و هێشتاش بەشێک لە خاکی لوبنان لە لایەن زایۆنییەکانەوە داگیر کراوە و ئەو ڕژیمە لە ماوەی ساڵی ڕابردوو پابەندی هیچکام لە ڕێککەوتنەکانی بۆ ئاگربڕ نەبووە.
عێراقچی هەروەها جەختی لە پاراستنی تەواوەتی سەرزەوینیی لوبنان کرد و وتیشی: کۆماری ئیسلامی ئێران داکۆکی لە تەواوەتی سەرزەوینی، یەکگرتوویی نیشتمانی و سەربەخۆیی لوبنان دەکات و سیاسەتی کۆماری ئیسلامی بەردەوام هەر ئەوە بووە و ئێمە بەدوای پەرەدان بە پەیوەندییەکان بەپێی ڕێزنانی بەرامبەر و بۆ بەرژەوەندیی بەرامبەرەوەین.
وەزیری دەرەوەی ئێران لە بەشێکی تر لە لێدوانەکانی ڕوانییە پرسی دانوستانی ئێران و ئەمریکا، ڕایگەیاند: ئەمریکا و ئیسرائیل جارێک هێرشکردنە سەر ئێرانیان تاقی کردەوە و شکستیان هێنا و لە داهاتووشدا بیانەوێ لەوبارەوە خۆیان تاقی بکەنەوە، بێگومان بە ئەنجامێکی هاوشیوە دەگەن. ئێمە بۆ هەر دۆخێک ئامادەین؛ هەم بۆ شەڕ و هەمیش بۆ دانوستان. بەڵام دانوستانێک کە بەپێی بەرژەوەندی و ڕێزنانی بەرامبەر بێت.
جەختیشی کرد: هەر کات ئەمریکاییەکان قبووڵیان کرد کە دانوستان جیاوازە لە داسەپاندن، ئەوا دەتوانێ دانوستانێکی مانادار دەست پێبکات و ئەنجامێکی جیاوازی هەبێت.
Your Comment