شەڕ لە گەڵ ئێران، دایکی هەموو شەڕەکانە / دانوستان لە گەڵ جەنایەتکار ناکەین

سەرۆک کۆمار بە ئاماژە بەوەی کە شەڕ و ئاشتی لە گەڵ ئێران دایکی هەموو شەڕ و ئاشتییەکانە، وتی: ئەمریکییەکان ناتوانن ئاسایشی ئێمە بشێوێنن و چاوەروانی ئاسایش بن.

بە ڕاپۆرتی ئاژانسی هەواڵی مێهر، حوجەتولئیسلام حەسەن ڕۆحانی ئەمڕۆ (سێ شەممە) بە ئامادەبوون لە وەزارەتی دەرەوەی ئێران و دیدار لە گەڵ محەمەد جەواد زەریف وەزیری دەرەوە، ڕایگەیاند: ئەمریکا پێی وایە دەتوانێ بە گەمارۆ و گوشار نیزامی ئێمە بگۆڕێت و خەڵکی بە ئاراستەی دژی نیزام ببات.

ڕۆحانی هەروەها ئاماژەی بە هەندێک لە سەرکەوتنەکانی بەرجام و لەوان سەرکەوتنی یاسایی، سیاسی و ئەخلاقی کرد و ڕاشیگەیاند: ئەو ڕێککەوتنە کە لە سای هەوڵی هەموو بەرپرسان بە تایبەت وەزارەتی دەرەوە و بەڕێز زەریف مسۆگەر بوو، وەیشوومەیەک بوو بۆ دوژمنان. بۆ وێنە خەوی ئیسرائیلییەکانی زڕاند و تەنانەت بینیمان کە ترامپیش دانی بەوەدا نا کە ئەو ڕێککەوتنە یەک لایەنە و لە بەرژەوەندیی ئێرانە.

سەرۆک کۆمار بە ئاماژە بە دزێویی بێ هاوتای دەسەڵاتدارانی ئێستای کۆشکی سپی، وتی: شانازیی ئێمە تەریک خستنی ئەمریکا لە کۆمەڵگای جیهانییە و ئێستاش پاش ساڵێک و سێ مانگ لە کشانەوەی ئەمریکا لە بەرجام، تەنانەت وڵاتێکیش نەبووە ئەو هەنگاوەی ئەمریکا پەسن بکات. بۆ وێنە کاتێک سەرۆک کۆماری ئەمریکا لە کۆمەڵەی گشتیی ڕێکخراوی نەتەوە یەکگرتووەکان دەبێتە مایەی گاڵتەجاری هەمووان و یان ل ئەنجومەنی ئاسایش بە تەنیا دەبێت، نیشان دەدات کە ئێمە لە بڕیار و هەنگاوەکانماندا سەرکەوتوو بووین.

ناوبراو هەروەها ئاماژەی بە پرسی دانوستان لە گەڵ واشنتۆن کرد و وتیشی: ئەوان دەڵێن کە ئامادەین بێ هیچ پێشمەرجێک لە گەڵ ئێران دانوستان بکەین، بەڵام هاوکاتی ئەو قسەیە رێبەرییان خستە لیستی گەمارۆوە. ئەوە لە کاتێکدایە کە ئێمە نامانەوێ دانوستانتان لە گەڵدا بکەین و گەر رۆژێکیش بمانەوێ ئەو کارە بکەین، با بزانن بە بێ ڕەزامەندی و ویستی رێبەری باڵا هیچ دانوستانێک مومکین نییە.

سەرۆک کۆمار ئاوری لە گەمارۆدرانی وەزیری دەرەوەی ئێران لە لایەن وەزارەتی خەزێنەی ئەمریکا،  دایەوە و بیری هێنایەوە: ئێستا بڕیارە کێ دانوستانتان لە گەڵ بکات؟ بەرپرسی دانوستانکاری ئێمە وەزیری دەرەوەیە و ئەگەر بڕیار بە دانوستان لە گەڵ ئەمریکا بێت، ئەوا دەبێ ئەو پرسەکە جارەسەر بکات. هەر بۆیە ڕوون نییە چ سیاسەتێک لە ئەمریکادا پێڕەو دەکرێت.

ڕۆحانی ڕوو لە دەوڵەتی ئەمریکا جەختی کرد: کۆماری ئیسلامی ئێران بە دوای دانوستان و گفتوگۆیە و ئەگەر ئەمریکا بە ڕاست پەیجۆری دانوستانە، دەبێ پێشتر هەموو گەمارۆکانی هەڵگرێت. ئێمە ناتوانین لە گەڵ جەنایتەکار و پیاوکوژران لە سەر میزی دانوستان دانیشین.

بیریشی هێنایەوە: گەلی ئێمە بەخشندەیە و بەو مەرجە ئێوە تۆبە بکەن. شەڕ و ئاشتی لە گەڵ ئێران دایکی هەموو شەڕ و ئاشتییەکانە. ئەگەر ئێوە و سەربازانتان ئاسایشتان دەوێ، دەبێ بزانن کە ئاسایش بە ئاسایش دەستەبەر دەبێت. ئێوە ناتوانن ئاسایشی ئێمە خەوشەدار بکەن و چاوەروانی ئاسایش بن.

ڕۆحانی بە داکۆکی لە ئاشتی لە بەرامبەر ئاشتی و نەوت لە بەرامبەر نەوت، وتی: ئێمە بەردەوامین لە دانوستان کردن لە گەڵ جیهان، ئەگەر بە ئەنجام گەیشتین کە هیچ، ئەگەر نا رێگەی دیکەمان بۆ درێژەدان هەیە.

News Code 27784

نیشانەکان

بۆچوونی ئێوە

You are replying to: .
  • 9 + 5 =