حزبی دیمۆکرات سەرۆک کۆماری نوێی عێراقی قبووڵ نییە و هاوکاری ناکات

بە پێی ڕاپۆرتی ئاژانسی هەواڵی مێهر، لەگەڵ هەڵبژاردنی نزار ئامێدی بۆ سەرۆک کۆماری نوێی عێراق دوای چەند مانگێک لە بنبەستی سیاسی، ناکۆکییەکانی نێوان لایەنە سەرەکییە کوردستانییەکان چووەتە قۆناغێکی نوێ؛ وەک پارتی دیموکراتی کوردستان ڕایگەیاند کە هاوکاری سەرۆک کۆماری نوێ ناکات و پڕۆسەی هەڵبژاردنەکەی بە نایاسایی دەزانێت.
نزار ئامێدی، کەسایەتییەکی نزیک لە یەکێتی نیشتمانیی کوردستان، دوای بەدەستهێنانی ٢٢٧ دەنگی لە کۆی ٢٤٩ دەنگی پەرلەمانی عێراق، وەک سەرۆکی وڵات سوێندی یاسایی خوارد؛ هەڵبژاردنێک کە کۆتایی بە پێنج مانگ ململانێی سیاسی هێنا، بەڵام لە هەمان کاتدا کەلێنی نێوان لایەنە کوردییەکانی قووڵتر کردەوە.
هەر لەو پێوەندییەدا بەرپرسانی پارتی دیموکراتی کوردستان لە چاوپێکەوتنێکدا لەگەڵ ڕۆژنامەی نیشتیمانی، پڕۆسەی دەنگدانیان خستە ژێر پرسیارەوە. بەرپرسێکی حزبی ڕایگەیاند: ئێمە ئەم پرۆسەیە قبوڵ ناکەین، چونکە سەرۆکی نوێ لەلایەن زۆرینەی شیعەکانەوە هەڵبژێردرا؛ بۆیە نوێنەرایەتی کورد ناکات، بەڵکوو نوێنەرایەتی ئەو گروپانە دەکات”. ئەو بەرپرسه جەختی لەوە کردەوە که تا هەڵبژاردنی نوێ بەڕێوەبچێت، پارتی دیموکرات له گەڵ سەرۆکی ئێستای عێراق کار ناکات.
بەرپرسێکی دیکەی حزبەکە لە چاوپێکەوتنێکدا لەگەڵ ڕۆژنامەی ناشناڵ ڕەخنەی لە میکانیزمی هەڵبژاردنی سەرۆکایەتی گرت و وتی: هەڵوێستی پارتی دیموکرات لەسەر بنەمایەکی جێگیرە؛ هەر پێکهاتەیەک لە عێراقدا دەبێت نوێنەری خۆی لەسەر بنەمای قورسایی دیموکراسی و ئیرادەی گەلەکەی هەڵبژێرێت. بە وتەی ئەو، هەروەک چۆن شیعە و سوننە لەسەر هەڵوێستەکانیان دەگەنە کۆدەنگی ناوخۆیی، پێویستە کورد هەمان مۆدێل پەیڕەو بکەن.
ئەمەش لەکاتێکدایە یەکێتی کاندیدەکەی بردە پەرلەمان بەبێ ئەوەی لەگەڵ ڕکابەرە کۆنەکەیدا ڕێکبکەوێت و بە پشتبەستن بە پشتیوانی هاوپەیمانییە سیاسییەکان، لەنێویاندا چوارچێوەی هەماهەنگی، سەرکەوتوو بوو لە بەدەستهێنانی کورسی سەرۆکایەتی. لەم کێبڕکێیەدا، کاندیدی پشتیوانی حیزبی دێموکرات، فوئاد حسێن، شکستی هێنا.
لەو چوارچێوەیەدا، ڕێناد مەنسور، بەڕێوەبەری دەستپێشخەریی عێراق لە دامەزراوەی بیرکردنەوەی چاتام هاوس، بە ڕۆژنامەی (The National)ی ڕاگەیاند، پارتی دیموکرات لە ڕێگەی بایکۆتکردنی دانیشتنی پەرلەمانەوە هەوڵی ڕێگریکردن لە دەنگدان دەدات، چونکە لەگەڵ یەکێتی نەگەیشتبووە ڕێککەوتن لەسەر کاندیدێکی سەرۆکایەتی کۆمار. بە وتەی ناوبراو، لە ڕوانگەی پارتی دیموکراتەوە، پێویستە سەرەتا هەڵبژاردنی سەرۆکی عێراق لە چوارچێوەی گفتوگۆی ناوخۆیی هەرێمی کوردستان ئەنجام بدرێت و دواتر ڕەوانەی پەرلەمان بکرێت.
ڕێناد مەنسور ئاماژەی بەوەشکرد، هەنگاوی تاکلایەنەی یەکێتی بۆ پێشخستنی ئەم پرۆسەیە ئەوە دەردەخات کە حزبەکە پەیوەندییەکانی لەگەڵ ئەکتەرە سیاسییەکانی دیکەی بەغدا بەکارهێناوە بۆ چەسپاندنی پێگەی خۆی.
بەپێی بیچمی دابەشکردنی دەسەڵات لە عێراق، سەرۆکایەتی کۆمار تایبەتە بە کورد و سەرۆک وەزیران بۆ شیعە و سەرۆکی پەرلەمان بۆ سوننە. هەرچەندە ئەم پۆستە تا ڕادەیەکی زۆر فورماڵیتەیە، بەڵام سەرۆک ڕۆڵی سەرەکی دەبینێت لە ناساندنی کاندید بۆ پێکهێنانی حکومەت.
لەم چوارچێوەیەدا ئێستا نزار ئامێدی ١٥ ڕۆژی لەبەردەمدایە بۆ ناساندنی کاندیدێک بۆ سەرۆک وەزیران؛ هەڵوێستێک کە دەوترێت پێدەچێت بچێتە سەر نووری مالیکی. لەهەمان کاتدا محەمەد شیعە ئەلسودانی پیرۆزبایی هەڵبژاردنی سەرۆک کۆماری نوێی کرد و جەختی لەسەر خێراترکردنی پێکهێنانی حکومەت کردەوە.
بەڵام بەردەوامبوونی ناکۆکییەکانی نێوان لایەنه کوردییەکان دەتوانێت لێکەوتەکانی له دەرەوەی ناوچەکه هەبێت و کاریگەری له سەر پڕۆسەی گشتی پێکهێنانی حکوومەت و سەقامگیری سیاسی له عێراقدا هەبێت.