هەڵوەکانی شنگال لە هەرێمی کوردستان جیابوونەوە

بە پێی ڕاپۆرتی ئاژانسی هەواڵی مێهر، هێزی هەڵۆكانی شنگالی سەر بە وەزارەتی پێشمەرگە كۆتایی بە ئەركەكانی لە هەرێمی كوردستان هێنا و جیابوونەوەی خۆی لە دەسەڵاتی هەرێم ڕاگەیاند.

لە كۆنگرەیەكی ڕۆژنامەوانییدا لە شاری بەغداد، هێزی هەڵۆكانی شنگال، كە لە چوارچێوەی هێزەكانی 80ی پارتی دیموكراتی كوردستان لە وەزارەتی پێشمەرگەدان، ڕایگەیاند: لە 10 ساڵی ڕابردوودا ڕووبەڕووی ستەم و پەراوێزخستن بووینەوە، بۆیە دەستمان لە كار كێشایەوە و ئەركی سەربازییمان لە سنوورەكانی هەرێمی كوردستان جێهێشت.

ئەو هێزە سەر بە لیوای چوارە و یەزیدیین، وەك خۆیان دەڵێن ژمارەیان 1200 كەس دەبێت، ڕایگەیاند: بڕیارمان دا ئەركەكەمان لە سنووری هەرێمی كوردستان جێبهێڵین و لە سەرجەم پەیوەستییە حزبی و سەربازییەكان دەست لەكار بكێشینەوە.

ئەو هێزە داوای لە محەممەد شیاع سودانی سەرۆكوەزیرانی فیدڕاڵیش كرد بیانخاتە سەر هێزەكانی وەزارەتی بەرگریی فیدڕاڵی، ڕایگەیاند: ئێش و ژانی پێكهاتەی یەزیدی بۆ ئامانج و بەدەستهێنانی حزبی و سیاسی بەكار هێنراوە.

بەپێی ئەوەی لە ڕاگەیەنراوەكەدا هاتووە "لە ساڵی 2021ـەوە ئەفسەران و پلەدارانی یەزیدی لە پلەبەرزكردنەوە بێبەش كراون و لەمساڵیشدا كە فیرقەی نوێی سەربازیی پێك هێنراوە، ئەوان بە قسەی خۆیان جارێكی دیكە پەراوێز خراون".

ئەوان داواش دەكەن هەژموونی پارتی دیموكراتی كوردستان بەسەر بڕیاری یەزیدییەكانەوە كۆتایی پێ بهێنرێت.