ڕێپێوانی ڕۆژی جیهانیی قودس لە ئێران بە دروشمی "علی العهد یا قدس"

بە پێی ڕاپۆرتی ئاژانسی هەواڵی مێهر، هەموو ساڵێک لە دوایین هەینی مانگی ڕەمەزان کە لە لایەن ئیمام خومەینی بە ڕۆژی جیهانیی پشتیوانی لە قودس ناونراوە، خەڵکی موسڵمان و هەموو ئازادیخوازانی جیهان دژی ئیسڕائیل ڕێپێوان دەکەن و دەڕژێنە سەر شەقامەکان و دروشم دەڵێنەوە.

ئەمساڵ لە دووەم ساڵی شەڕی غەززە و شەهید و بریندار بوونی هەزاران کەس لە خەڵکی غەززە و فەلەستین بە هۆی هێرشەکانی ئیسڕائیل بۆ سەر غەزە و کەرتی ڕۆژاوا لە دوای ئۆپراسیۆنی گەردەلوولی ئەقسا، ڕێپێوانی ڕۆژی قودس بە خرۆشێکی زیاترەوە بەڕێوە دەچێت.

ئەمساڵ دروشمی ڕۆژی جیهانیی قودس بە علی العهد یا قدس دانراوە و خەڵک لە ڕێپێواندا بە دروشمدان و ئاواتی مەرگ و نەمان بۆ ڕژێمی زایۆنی و ئەمریکا لە سەرانسەری ئێران و دەیان وڵاتی جیهان هاتوونە سەر شەقام.

خەڵک بە ڕەخنە و بێزکردنەوە لە درۆی مافی مرۆڤی جیهانی وێنەی شەهیدان و منداڵانی ئاوارە و برینداری فەلەستینیان بەرز کردۆتەوە و ڕۆژاوا و ئەمریکا بە تێوەگلاو لەم تاوانە دڕندانە ڕادەگەیێنن.

ئەمساڵ ڕێبەری باڵای ئێران بە هۆی گرینگی ڕۆژی قودس و دەربڕینی ڕق و قینی جیهانی بەرانبەڕ ڕژێمی زایۆنیستی بە هۆی ئەو تاوانە دڕندانەی دژی خەڵکی بێ تاوانی غەزە کردوویەتی، ڕایگەیاندبوو کە ڕێپێوانی ڕوژی قودس ئەمجارە گرینگترە لە هەموو ساڵانی تر.