بە پێی ڕاپۆرتی ئاژانسی هەواڵی مێهر، سی و هەشتەمین کۆنفرانسی نێودەوڵەتی یەکگرتوویی ئیسلامی بە بڵاوکردنەوەی بەیاننامەی کۆتایی بە کارەکانی هێنا.
ئەم کۆنفرانسە لە دۆخێکدا بەڕێوەدەچێت کە جیهانی ئیسلامی بە هۆی تاوانە دڕندانەکانێ ڕژێمی قۆرخکاری زایۆنیستی پڕە لە خەم و پەژارە.
تیرۆری بەربڵاوی سەرکردە و فەرماندەکانی بەرخۆدان و کۆمەڵکوژی دڕندانەی گەلی ستەملێکراوی فەلەستین لە لایەک و پشتیوانی یەکلاکەرەوەی وڵاتانی ڕۆژئاوا بۆ تاوانەکانی ئەم ڕژیمە، هاوکاریی وڵاتان و ئوممەتی ئیسلامی بۆ بەدیهێنانی بەها و ئامانجە هاوبەشەکان، زیاتر لە جاران، پێویستە.
ڕژێمی قۆرخکاری زایۆنیستی بە پشتیوانی چەوسێنەریی جیهانی بە ڕێبەرایەتی ئەمریکا و وڵاتانی ڕۆژئاوایی، دوو بەرنامەی بنەڕەتی پەیڕەو دەکات:
یەکەم: داگیرکردنی هەموو نیستمان و خاکی فەلەستینییەکان بە کوشتنی خەڵکی بێتاوان، لەوانەش منداڵان، ژن و بەساڵاچووان، هەروەها گەمارۆدان و ڕێگریکردن لە ناردنی یارمەتییە مرۆییەکان، بڕینی ئاو و کارەبا، و پێداویستییە سەرەتاییەکان؛ و ئاوارەکردنی نزیکەی ٢ ملیۆن هاووڵاتی مەدەنی.
دووەم: شەرعیەتدان بە ناسنامەی ساختەی خۆی بە ئاساییکردنەوەی پەیوەندییەکان لەگەڵ وڵاتانی ئیسلامی.
هیوادارین وڵاتانی ئیسلامی بتوانن لە ڕێگەی هاوکاری و یەکدەنگیەوە پێش بە بەدیهێنانی ئامانجە خراپەکانی دوژمنانی ئیسلام بگرن.
زانایانی بەشدار لەم کۆنفرانسە جەخت دەکەنەوە کە تەنیا ڕێگای ڕاگرتنی تاوانەکانی ڕژێمی قۆرخکاری زایۆنیستی، یەکگرتوویی جیهانی ئیسلام و ڕێوشوێنی کردەیی و یەکگرتووە لە بەرامبەر ئەم ڕژیمە تاوانبارە. هاوپەیمانی لەگەڵ ڕژێمی قۆرخکاری زایۆنیستی هەرگیز سوودی بۆ جیهانی ئیسلام نابێت، چونکە ئەم ڕژێمە پابەند نییە بە هیچ پەیمانێکەوە و هەمیشە بەدوای وێرانکاری و تیرۆر و ململانێ لە جیهانی ئیسلامیدا دەگەڕێت و ئێستا ئەم ڕژێمە لە لاوازترین ئاستیدایە.