بە پێی ڕاپۆرتی ئاژانسی هەواڵی مێهر، حاجی کەندۆر پەرلەمانتاری پێشوی ئەنجومەنی نوێنەران لەسەر پێکهاتەی ئێزدییەکان بەپێگەی "مەعلومە"ی وتووە: "گوێ بیستی ئەوەبوین کە ڕێککەوتنێک هەیە بۆئەوەی چەند لیوایەکی هێزەکانی پێشمەرگە بخرێنەسەر وەزارەتی بەرگری عێراق بۆئەوەی لە شەنگال بڵاوەیان پێبکرێت، بەڵام ئێمە بەهەموو شێوەیەک ئەوە ڕەتدەکەینەوەو ڕێگە بەجێبەجێکردنی نادەین".
جەختیشی کردۆتەوە کە "ئەو ڕێککەوتنە پێچەوانەی خواستی خەڵکی شەنگالە کە ڕێگە بەگەڕانەوەی ئەو هێزانە نادەن کە لەدۆخە هەستیارەکاندا دەستبەرداریان بون، بۆیە قبوڵناکرێت بازرگانیی سیاسیی بەئێزدییەکان‌و خەڵکی شنگالەوە بکرێت".
هەر لەو چوارچێوەیەدا، نوێنەرانی هەردوو پێکهاتەی عەرەب‌و تورکمان لەکۆنگرەیەکی ڕۆژنامەوانیدا لەکەرکوک ڕایانگەیاند: "پێکهێنانی هێزی هاوبەش لەنێوان پێشمەرگەو سوپای عێراق ڕەتدەکەینەوەو قبوڵی ناکەن بەمەبەستی بڵاوەپێکردنیان لەناوچە کێشەلەسەرەکان، لیواکانی پێشمەرگە بخرێنەسەر وەزارەتی بەرگری".
نوێنەرانی پێکهاتەی عەرەب‌و تورکمانی کەرکوک داوایان لەفەرماندەی گشتیی هێزە چەکدارەکانی عێراق کردوە لەو هەنگاوە پاشگەزبێتەوە کە بەوتەی ئەوان مەترسیی بۆسەر سەقامگیریی و پێکەوەژیانی ئاشتیانەی دانیشتوانی کەرکوک دروست دەکات.
هەروەک داوایانکردوە دۆسیەی ئەمنیی کەرکوک‌و سەڵاحەدین‌و نەینەواو دیالە بەتەنها لەدەستی حکومەتی فیدراڵیدا بمێنێتەوە.