هێزه‌ عێراقییه‌کان ڕایانگه‌یاند؛

۹۵ له‌ سه‌دی ڕۆژهه‌ڵاتی موسڵ له‌ داعش پاک کراوه‌ته‌وه‌

ناسەی هەواڵ: 3874979 -
هێزه‌ عێراقییه‌کان له‌ دوایین هێرشه‌ سه‌ربازییه‌کانی خۆیاندا توانیویانه‌ زۆربه‌ی گه‌ڕه‌کانی ڕۆژهه‌ڵاتی موسڵ ئازاد بکه‌ن.

به‌ ڕاپۆرتی ئاژانسی مێهر له‌ ئه‌لنه‌هره‌ین، حیسام عه‌بار ئه‌ندامی پارێزگای نه‌ینه‌وا وتی: هێزه‌کانی سوپای عێراق ئاماده‌ی ئه‌وه‌ن که‌ هێرش بکه‌نه‌ سه‌ر زانکۆی موسڵ و ئه‌م زانکۆیه‌یان له‌ هه‌موو لایه‌که‌وه‌ گه‌ماڕۆ داوه‌.

ئه‌و زیادی کرد: له‌ ئێستادا زۆربه‌ی گه‌ڕه‌که‌کانی ڕۆژهه‌ڵاتی موسڵ ئازاد بووه‌ که‌ بریتین له‌ ۹۵ له‌ سه‌دی ڕۆژهه‌ڵاتی ئه‌م شاره‌. به‌ ئه‌گه‌ری زۆریش تاکوو چه‌ند ڕۆژی دیکه‌ هه‌موو ڕۆژهه‌ڵاتی موسڵ به‌ ته‌واوی ئازاد ده‌کرێت.

عه‌بار وتی: له‌ ئێستادا هێزه‌کانی داعش گورزی زۆر کوشه‌نده‌یان به‌ر که‌وتووه‌ و له‌ زۆربه‌ی بیناکانی شاری موسڵ ئاڵای عێراق به‌رزکراوه‌ته‌وه‌ و تیپی ۷۳ی سوپای عێراق به‌ ته‌واوی له‌ ناو شه‌قامه‌کانی موسڵدا جێگیر بوون.

هه‌روه‌ها سه‌رچاوه‌یه‌کی ئه‌منی له‌ نه‌ینه‌وا ڕایگه‌یاند که‌ هێزه‌کانی عێراق گه‌یشتوونه‌ته‌ ۲۰۰ مه‌تری مه‌زاری یونسی پێغه‌مبه‌ر(د.خ) له‌ باکووری شاری موسڵ و ئه‌مه‌ش ئه‌وه‌نده‌ی دیکه‌ بازنه‌ی گه‌ماڕۆدانی داعشی ته‌نگ تر کردووه‌ته‌وه‌.

ئه‌و زیادی کرد: هێزه‌ عێراقییه‌کان ئێسته‌ گه‌ڕه‌کی ئه‌مالییه‌یان له‌ ۲۰۰ مه‌تری مزگه‌وت و مه‌زاری حه‌زره‌تی یونس  له‌ باکووری موسڵ کۆنترۆڵ کردووه‌.

ئه‌و جه‌ختی کرد که‌ هێزه‌کانی داعش چی دیکه‌ وره‌یان نه‌ماوه‌ و به‌رده‌وام له‌ به‌ره‌کانی شه‌ڕ هه‌ڵدێن.

شایانی باسه‌ که‌ بۆ زیاتر له‌ ۷۰ ڕۆژه‌ که‌ ئۆپراسیۆنی ئازاد کردنی موسڵ به‌ فه‌رمانی حه‌یده‌ر عه‌بادی ده‌ستی پێ کردووه‌ و له‌م ماوه‌دا به‌ ده‌یان گوند له‌ تیرۆریسته‌کانی داعش پاک کراوه‌ته‌وه‌.

ناردنی بۆچوون

5 + 10 =