له‌ قوروه‌ شانۆی سه‌رشه‌قام به‌ڕێوه‌ ده‌چێت

ئێواره‌ی سێ شه‌مه‌ له‌ پارکی ڕزوانی قوروه‌ شانۆی سه‌ر شه‌قامی "بوون یان نه‌بوون، کێشه‌که‌ ئه‌مه‌یه‌؟" به‌ڕێوه‌ چوو.

به‌ ڕاپۆرتی ئاژانسی مێهر، ئێواره‌ی سێ شه‌مه‌ له‌ پارکی ڕزوانی قوروه‌ شانۆی سه‌ر شه‌قامی "بوون یان نه‌بوون، کێشه‌که‌ ئه‌مه‌یه‌؟" له‌ ده‌رهێنه‌ری بێزاد فه‌رمانی به‌ڕێوه‌ چوو.

ئه‌م شانۆیه‌ له‌ لایه‌ن گرووپی "په‌یدا"وه‌ کاری بۆ کراوه‌ و شانۆیه‌کی کۆمیک-نۆستالژیکه‌ و له‌ دوو که‌سایه‌تی ناوداری کۆمیکی جیهان، واتا "په‌ت و مه‌ت" بۆ نووسینی شانۆ که‌ڵک براوه‌. په‌ت و مه‌ت که‌ دوو که‌سایه‌تی ناسراوی جیهانین له‌م شانۆه‌یه‌دا به‌ زمانێکی کۆمیک باسی ئازاره‌ کۆمه‌ڵایه‌تییه‌کان ده‌که‌ن و هه‌ر به‌م هۆیه‌شه‌وه‌ تاکوو ئێسته‌ شانۆکه‌ پێشوازییه‌کی باشی لێکراوه‌ و خه‌ڵکی قوروه‌ له‌ منداڵه‌وه‌ بیگره‌ تاکوو پیر بۆ سه‌یر کردنی شانۆکه‌ ده‌ڕۆن.

بێهزاد فه‌رمانی، ده‌رهێنه‌ری شانۆی "بوون یان نه‌بوون، کێشه‌که‌ ئه‌مه‌یه‌؟"، هونه‌رمه‌ندێکی ۲۹ ساڵانی قوروه‌ییه‌ و تاکوو ئێسته‌ کاری زۆر باشی له‌ که‌رتی شانۆدا پێشکه‌ش کردووه‌ و له‌ ۱۴ ساڵیه‌وه‌ ته‌ڤڵی هونه‌ری شانۆ و شانۆکاری بووه‌.

فه‌رمانی سه‌باره‌ت به‌م شانۆیه‌ به‌ مێهر وتی: ئامانجی سه‌ره‌کیم له‌ ده‌رهێنانی ئه‌م شانۆیه‌ ئاشت کردنه‌وه‌ی خه‌ڵک له‌گه‌ڵ شانۆ بووه‌، ئێمه‌ چون له‌ قوروه‌ هۆڵی باش و گونجاومان بۆ کاری شانۆ نییه‌، خه‌ڵکی شاره‌که‌ زۆر به‌ شانۆ گرنگی ناده‌ن، هه‌ر بۆیه‌ دیم گه‌ر شانۆیه‌کی سه‌ر شه‌قام به‌ڕێوه‌ ببه‌م ڕه‌نگه‌ کاریگه‌ری باشی له‌ ڕاکێشانی خه‌ڵکدا هه‌بێت.

ئه‌و زیادی: من بۆ ئه‌م کاره‌ له‌ دوو که‌سایه‌تی په‌ت و مه‌ت که‌ڵکم برد، چون دوو که‌سایه‌تی کۆمیکی ناسراوی جیهانین و خه‌ڵکی باشتر په‌یوه‌ندیان پێوه‌ ده‌که‌ن، هه‌ڵبه‌ت ئه‌مه‌ش بێژم که‌ شانۆکه‌ دیالۆگی نییه‌ و به‌ پانتۆمیم ئه‌نجام ده‌بێت.

فه‌رمانی درێژه‌ی دا: کێشه‌یه‌کی دیکه‌ که‌ ئێمه‌ له‌ سه‌رده‌مه‌دا هه‌مانه‌ ئه‌وه‌یه‌ که‌ بابه‌ته‌کان زۆر دووباره‌ کراونه‌ته‌وه‌، هه‌ر بۆیه‌ خه‌ڵکی زۆر به‌دیار شانۆکانه‌وه‌ ڕاناوه‌ستن، به‌ڵام ئه‌وه‌ی گرنگه‌ ئه‌مه‌یه‌ که‌ ئێمه‌ چۆن ده‌توانین وردتر و له‌ ڕوانگه‌یه‌کی دیکه‌وه‌ کێشه‌کان و ئازاره‌ کۆمه‌ڵایه‌تییه‌کان جاریکی دیکه‌ بخه‌ینه‌وه‌ به‌رده‌ست بینه‌ر تاکوو خه‌ڵکی هه‌مدیسان بیر بکه‌نه‌وه‌ له‌ خۆیان.

ئه‌و سه‌باره‌ت به‌ شانۆی سه‌ر شه‌قام له‌ قوروه‌ ده‌ڵێت: چه‌ند ساڵێکه‌ که‌ شانۆی سه‌رشه‌قام له‌ قوروه‌ ده‌ستی پێکردووه‌ و به‌ باشێش خه‌ڵکی به‌ لای خۆیدا ڕاکێشاوه‌ و کاریگه‌ری باشیشی هه‌بووه‌ و ئێسته‌ش وه‌ک ده‌یبینن خه‌ڵکێکی زۆر سه‌رقاڵی دیتنی شانۆکه‌ن.

ئه‌و سه‌باره‌ت به‌ کێشه‌کانی شانۆی سه‌رشه‌قام ده‌ڵێت: وه‌ک خۆتان ده‌زانن کورده‌واری ناوچه‌یه‌کی سارده‌ و له‌ زستاندا ناتوانین وه‌ک هاوین و به‌هار کاری شانۆی سه‌رشه‌قام بکه‌ین، ئه‌مه‌ش بینه‌ری شانۆ که‌م ده‌کاته‌وه‌، ده‌بێت به‌رپرسانی شاره‌که‌ هۆڵێکی گونجاو بۆ شانۆ له‌ شاری قوروه‌ دروست بکه‌ن.

ئه‌و زیادی کرد: هه‌ڵبه‌ت سه‌ره‌ڕای ئه‌مانه‌ش هونه‌رمه‌نده‌کان هه‌ر کاری خۆیان کردووه‌ چون هونه‌رمه‌ند ده‌بێت بزانێت که‌ چۆن له‌ هه‌موو هه‌ل و مه‌رجێکدا کار بکات و شانۆ بباته‌ سه‌ر سێن.

فه‌رمانی ڕوو له‌ به‌رپرسان وتی: به‌داخه‌وه‌ هه‌موویان به‌ قسه‌ له‌گه‌ڵ هونه‌ر و هونه‌رمه‌ندن، به‌ڵام له‌ کرده‌وه‌دا هه‌ر هه‌موویان پشتی هونه‌ر چۆڵ ده‌که‌ن، ئه‌ویش به‌ بیانۆی ئه‌وه‌ی که‌ بودجه‌ نییه‌ و نانی خه‌ڵک گرنگتره‌. ئه‌مه‌ له‌ حاڵێک دایه‌ که‌ هونه‌ر باشترین ڕێگه‌ بۆ ده‌ربڕینی کێشه‌کان و دۆزینه‌وه‌ی ڕێگه‌ چاره‌کانه‌.

هه‌ر له‌مباره‌وه‌ یونس سه‌حراڕوو، به‌رپرسی ئه‌نجومه‌نی شانۆی قوروه‌ به‌ هه‌واڵنێری مێهر وتی: نه‌بوونی هۆڵێکی گونجاو کێشه‌ی سه‌ره‌کی شانۆکارانی شاری قوروه‌یه‌ و هیوادارین ئه‌م کێشه‌یه‌ چاره‌سه‌ر بکرێت.

ئه‌و له‌ کۆتایدا جه‌ختی کرد: سه‌ره‌ڕای ئه‌مه‌ش شانۆکارانی قوروه‌ له‌ فستیڤاڵه‌کاندا به‌رده‌وام ئاماده‌ بوون و کاری باشیان پێشکه‌ش کردووه‌ و ئێسته‌ش وه‌ک ده‌یبینن شانۆی "بوون یان نه‌بوون، کێشه‌که‌ ئه‌مه‌یه‌؟" پێشوازییه‌کی زۆر باشی لێکراوه‌ و ئه‌مه‌ش بۆ توانی شانۆکارانی شاره‌که‌ ده‌گه‌ڕێته‌وه‌.

شایانی باسه‌ که‌ چه‌ند ساڵێکه‌ به‌ڕێوه‌ چوونی شانۆی سه‌رشه‌قام له‌ شاره‌کانی پارێزگای کوردستان له‌ ئێران بڕه‌وێکی زۆری هه‌بووه‌ و خه‌ڵکی پێشوازییه‌کی باشی لێده‌که‌ن.

News Code 4629

نیشانەکان

بۆچوونی ئێوە

You are replying to: .
  • 8 + 2 =