نەخشه‌ گڵینه‌ لە کوردستاندا غەریبە/خەڵک ناتوانن ئاسەواری هونەری بکڕن

هونەرمەندی پەیکەرەتاش و گرافیستی لاوی کوردستانی پێیوایە کە سەرەڕای بابەتی فەرهەنگی و گشتگیر نەبوونی فەرهەنگی کڕینی بەرهەمی هونەرمەندان، زۆربەی خەڵکی ئێران و بە تایبەت پارێزگا بێ بەشەکان، بە هۆی کێشەی ئابووری و بژێوی ژیانەوە،بۆیان نالوێت بەرهەمی هونەری بکڕن.

فوئاد نگەهدار، گرافیست و پەیکەرە تاشی سنەیی، کە لەم ڕۆژانەدا پیشانگایەکی بۆ نمایش دانی بەرهەم و ئاسەوارە هونەرییەکانی لە بواری پەیکەرەتاشی و هەڵکۆڵینی نەخش لەسەر قۆڕ و گەچ لە گالری سوورەی سنە کردبووەوە لە دیمانیەک لەگەڵ بەشی هونەر و فەرهەنگی مێهر باسی لە بەرهەمەکانی و کێشەکانی بەردەم هونەرمەندان کرد.

 فوئاد نگەهدار نەیشاردەوە کە بۆ ئاسانکاری لە کارەکانی خۆی و دابەزاندنی تێچووی کارەکانی داهێنانێکی کردووە.

 نگەهدار لە دایکبووی ۱۳۶۵ە لە سنە و دەرچووی زانکۆی هونەر و کارناسی گرافیکە کە پێشتر چەندین پیشانگای گرووپی لە بواری گرافیک و وێنەدا بەڕێوەبردووە و بۆ یەکەم جار پیشانگای بەرهەمی هونەری نەخش بەرجەستەی .

ئەو نێزیک بە یەک ساڵە بە شێوەی بەردەوام و پسپۆڕانە خەریکی هونەری پەیکەرە تاشیە لە سەر بنەڕەتی گەچی .بەڵام بە هۆی گرانی و دەست نەکەوتنی کەرەستە و ئامێرەکانی پەیکەرەتاشی بە گەچ و گڵ وقوڕی پێویستی بیر لە داهێنانێک دەکاتەوە.

فوئاد لەمبارەوە دەڵێت: ماک و پێکهاته‌ی به‌کارهێنراو له‌ به‌رهه‌مه‌کانم دا قوڕ و گه‌چه‌ هه‌ڵبه‌ت گه‌چی ئاسایی نه‌. جۆرێک گه‌چه‌ که‌ خۆم چه‌ند جۆر ماترێاڵی تازه‌م پی زیاد کردووه‌ و هه‌ویرێکی نوێم داهێناوه‌ که‌ ده‌توانێ جێگره‌وه‌یه‌کی باش بێت و زۆریش هه‌رزانتره‌ له‌ هه‌ویری ئێستای په‌یکه‌ره‌سازی و ئه‌م داهێنانه‌شم له‌ ڕێکخراوی پشتیوانی له‌ داهێنه‌رانی لاوی ئێرانیدا تۆمار کردووه‌.

وتیشی: چونکوو له‌ زۆربه‌ی پارێزگاکانی وڵات و ته‌نانه‌ت له‌ تارانیش، به‌ دژواری و به‌ نرخی زۆر گران ئامێر و که‌ره‌سه‌ و هه‌ویری په‌یکه‌ره‌ تاشی ده‌ست ده‌که‌وێت،هه‌ندێ جاریش ده‌ست ناکه‌وێت. به‌ڵام به‌کار هێنانی ئه‌م گه‌چه‌ نوێیه‌ زۆر هه‌رزانتره‌ و کوالێتی باشتریشی هه‌یه‌.

 ئه‌م هونه‌رمه‌نده‌ به‌ ئاماژه‌ به‌وه‌ی که‌ که‌س له‌باری داراییه‌وه‌ پشتی نه‌گرتووه‌ وتی داوام له‌ حه‌وزه‌ی هونه‌ری کوردستان یان ڕێکخراوی میراتی فه‌رهه‌نگی و پیشه‌ی گشتی کردووه‌ لانی که‌م ژوورێکم پێ بده‌ن بۆ ئه‌وه‌ی بیکه‌م به‌ کارگا و شوێنی وانه‌ وتنه‌وه‌ی هونرخی نه‌خشه‌ گڵینه‌.

به‌ وته‌ی ئه‌و "هونه‌ری نه‌خشه‌ گڵینه‌ هونه‌رێکی تازه‌یه‌ به‌م شێوه که‌ ئێستا‌ من کارم کردووه‌ و پێویستیشی به‌ ئامێر زۆر و که‌ره‌سی دژوار و سوورکردنه‌وه‌ له‌ کووره‌ نییه‌ و ته‌نیا به‌ تێکه‌ڵ کردنی هونه‌ر له‌گه‌ڵ گڵدا ده‌توانین ئاسه‌واری باش و سه‌ره‌نجڕاکێش بخولقێنین.

وتیشی: ئه‌وانه‌ی سه‌ردانی پیشانگای هونه‌ری له‌م چه‌شنه‌ ده‌که‌ن زۆربه‌یان ئه‌م هونه‌ره‌ و هه‌ندێ دیکه‌ش له‌ هونه‌ره‌کان باس ناناسن و به‌سه‌ریدا ده‌چن ئه‌مه‌ش نیشانی ده‌دات که‌ پێویسته‌ به‌رپرسانی په‌یوه‌ندی داری بواری فه‌رهه‌نگ هه‌وڵ بده‌ن هونه‌ره‌کانی وه‌ک نه‌خشه‌ گڵینه‌ زیاد به‌ خه‌ڵک بناسێنن با له‌مه‌ زیاتر له‌ ناو خه‌ڵکدا به‌ تایبه‌ت خه‌ڵکی کوردستان غه‌ریب نه‌که‌وێت.

وتیشی: به‌رپرسان ده‌بێ ئاوڕ له‌م بابه‌ته‌ بده‌نه‌وه‌ که‌ هونه‌ر له‌ کوردستاندا ته‌نیا مۆسیقا و هه‌ڵپه‌ڕکی نییه‌ و جێگای زۆر به‌رنامه‌ی ته‌له‌فزیۆنیی و فستیڤاڵی هونه‌ره‌کانی دیکه‌ش چۆڵه‌.ئه‌گه‌ر چی مۆسیقا به‌شیکی گه‌وره‌ و سه‌ره‌کیه‌ له‌ فه‌رهه‌نگ و هونه‌ری ئێمه‌دا.

داواشی له‌ به‌رپرسان کرد که‌ پشتیوانی زیاتری هونه‌ر بکه‌ن و ڕایگه‌یاند که‌ چونکوو خه‌ڵک له‌باری ئابووریه‌وه‌ کێشه‌یان هه‌یه‌ و ناتوانن به‌رهه‌می هونه‌ری بکڕن ده‌بێ به‌رپرسان یارمه‌تی زیاتری هونه‌رمه‌ندان بده‌ن.

فوئاد نگه‌هدار جه‌ختی له‌وه‌ش کرده‌وه‌ که‌ هه‌موو هه‌وڵێکی داوه‌ که‌ کاره‌کانی جوان و هونه‌رمه‌ندانه‌ بێت به‌و شێوه‌ که‌ له‌ شانی ناوی کوردستاندا بێت چونکوو ئه‌و بڕوای به‌وه‌ هه‌یه‌ که‌ پارێزگای کوردستان ئاخێزگای هونه‌ر و هونه‌رمه‌ندی گه‌وره بووه‌ و ئێستاش هونه‌رمه‌ندی ناوداری تێدایه‌.

ئه‌وه‌شی وت که‌ زیاتر ئایدیای نه‌خش کێشانه‌کانی له‌ وێنه‌گران و نیگارکێشانی گه‌وره‌ی ئێران و کوردستان ده‌گرێت و پێیوایه‌ ده‌بێ به‌رهه‌می هونه‌ری قسه‌ی بۆ وتن هه‌بێت و که‌ سسه‌یری ده‌که‌ی دنیاییه‌ک قسه‌ بکات و دات بگرێ.

News Code 4572

نیشانەکان

بۆچوونی ئێوە

You are replying to: .
  • 5 + 4 =