ئه‌مینداری گشتی ناتۆ هۆشداریی به‌ تورکیا دا

ئه‌مینداری گشتی ناتۆ هاوکات له‌گه‌ڵ ئیدانه‌ کردنی کوده‌تای سه‌ربازی له‌ تورکیا، جه‌ختی کرد: ڕێز گرتن له‌ دیموکڕاسی و ڕچاو کردنی یاسا و ئازادییه‌کان له‌ دوای کوده‌تا شکست خواردووه‌که‌ کارێکی پێویسته‌.

به‌ ڕاپۆرتی ئاژانسی مێهر له‌ ڕاشا توده‌ی، یه‌نس ستۆلێتنبرگ، ئه‌مینداری گشتی ڕێکخراوی ناتۆ له‌ په‌یوه‌ندی ته‌له‌فۆنی له‌گه‌ڵ ڕه‌جه‌ب ته‌یب ئه‌ردۆغان، سه‌رۆک کۆماری تورکیا کوده‌تاکه‌ی ئه‌م وڵاته‌ی ئیدانه‌ کرد و ڕایگه‌یاند که‌ ناتۆ پشتیوانی له‌ تورکیا ده‌کات.

ئه‌مینداری گشتی هه‌روه‌ها جه‌ختی کرد که‌ ڕێز گرتن له‌ دیموکڕاسی و یاسا و ئازادی له‌ دوای کوده‌تاکه‌ کارێکی پێویسته‌.

هه‌روه‌ها جان کری و فدریکا موگرینی له‌ ڕاگه‌یه‌ندراوێکی هاوبه‌شدا جه‌ختیان کردووه‌ که‌ ده‌بێت له‌ تورکیا یاسا سه‌روه‌ر بێت.

شایانی باسه‌ که‌ تورکیا دووهه‌مین ئه‌ندامی گه‌وره‌ی ناتۆیه‌ و بنکه‌ی ئاسمانی ئه‌نجرلیک له‌م وڵاته‌ له‌ لایه‌ن ئه‌مریکا و هاوپه‌یمانه‌کانی بۆ هێرشی ئاسمانی له‌ دژی گرووپی تیرۆریستی داعش که‌ڵکی لێ ده‌برێت.

به‌ پێی ڕاپۆرتی ڕۆژنامه‌ی بریتانیایی ئیدیپێندێنت، وه‌زیری ده‌ره‌وه‌ی ئه‌مریکا سه‌باره‌ت به‌ دادگه‌یی کردنی به‌رپرسانی کوده‌تاکه‌ی تورکیا هۆشداری داوه‌ و ڕایگه‌یاندووه‌ که‌ ئه‌م محاکمانه‌ ده‌بێت به‌ پێی یاسای بنه‌ڕه‌تی تورکیا ئه‌نجام ببێت.

وه‌زیری ده‌ره‌وه‌ی تورکیاش له‌ کاردانه‌وه‌ به‌ قسه‌کانی هاوتا ئه‌مریکاییه‌که‌ی خۆی وتی که‌ ده‌وڵه‌تی تورکیا پێبه‌نده‌ به‌ بنه‌ماکانی دیموکڕاسی و مل که‌چی یاساکانه‌.

شایانی باسه‌ که‌ سه‌رۆک کۆماری تورکیا ڕۆژی یه‌کشه‌مه‌ له‌ کۆبوونه‌وه‌ی لاینگره‌کانی خۆی ڕایگه‌یاند که‌ ئه‌نقه‌ره‌ دیسان سزای له‌ سێداره‌دان ده‌ست پێده‌کاته‌وه‌، ئه‌م سزایه‌ له‌ ساڵی ۲۰۰۴ له‌ تورکیا سڕایه‌وه‌. ئه‌گه‌رچی بینالی یه‌لدریم ڕایگه‌یاند که‌ بۆ جێبه‌جێ کردنه‌وه‌ی ئه‌م یاسایه‌ هیچ په‌له‌یه‌کمان نییه‌.

ئه‌مه‌ له‌ حاڵێک دایه‌ که‌ یه‌کێتی ئه‌ورووپاش به‌ توندی ئیدانه‌ی ئه‌م کاره‌ی کردووه‌ و ڕایگه‌یاندووه‌ که‌ سزای له‌ سێداره‌دان ده‌بێته‌ هۆی ئه‌وه‌ی که‌ تورکیا به‌ ته‌واوی مافی به‌ ئه‌ندام بوون له‌ یه‌کێتی ئه‌ورووپا له‌ کیسی بچێت.

News Code 4384

نیشانەکان

بۆچوونی ئێوە

You are replying to: .
  • 9 + 5 =