زنجیره‌ درامای شه‌هرزاد کرایه‌ کوردی

زنجیره‌ درامای شه‌هرزاد که‌ درامایه‌کی به‌ ناوبانگی ئێرانییه‌ کراوه‌ته‌ کوردی و له‌م هه‌فته‌وه‌ له‌ کاناڵی کوردستان بڵاو ده‌بێته‌وه‌.

ئاژانسی مێهر؛ ڕاپۆرتی به‌شی نێونه‌ته‌وه‌یی: زنجیره‌ درامای شه‌هرزاد که‌ درامایه‌کی به‌ ناوبانگی ئێرانییه‌ کراوه‌ته‌ کوردی و له‌م هه‌فته‌وه‌ له‌ کاناڵی کوردستان بڵاو ده‌بێته‌وه‌.

ئه‌م زنجیره‌ درامایه‌ له‌ نێوان ساڵانی ۳۹۴–۱۳۹۳ی هه‌تاوی له‌ ئێران و له‌ ۲۸ ئاڵقه‌دا به‌رهه‌م هاتووه‌ و هه‌ر ئاڵقه‌یه‌کی ۶۰ خوله‌که‌ و ده‌رهێنه‌ری ئه‌م زنجیره‌ درامایه‌ هونه‌رمه‌ندی سینه‌ماکاری ئێرانی "حه‌سه‌ن فه‌تحی"یه‌، حه‌سه‌ن فه‌تحی یه‌کێکه‌ له‌ ناسراوترین سینه‌ماکاره‌کانی ئێران که‌ چه‌ندین زنجیره‌ درامای ناوداری له‌ ئێران تاکوو ئێسته‌ به‌رهه‌م هاوردووه‌.

سه‌ره‌تا بڕیار بوو ئه‌م درامایه‌ ناوی "ڕۆژێک له‌ ڕۆژانی عاشق بوون" بێت، به‌ڵام دواجار به‌ هۆی نادیاره‌وه‌ ناوه‌که‌ی بۆ شه‌هرزاد گۆڕدرا. ئه‌م چیرۆکه‌ بۆ ۶۰ ساڵ پێش له‌ ئێران ده‌گه‌ڕێته‌وه‌ و چیرۆکێکی عاشقانه‌یه‌. خاتوو نه‌غمه‌ سه‌مینی ئه‌م زنجیره‌ درامایه‌ی نووسیوه‌. ته‌رانه‌ عه‌لدیدوستی، شه‌هاب حسه‌ینی، مسته‌فا زه‌مانی و عه‌لی نه‌سیریان له‌م زنجیره‌ درامایه‌دا ڕۆڵ ده‌گێڕن. 

شه‌هرزاد (ته‌رانه‌ عه‌لیدوستی) خوێندکارێکی خولی پزشکییه‌ که‌ بڕیاری داوه‌ هاوسه‌گیری له‌گه‌ڵ کوڕێک به‌ ناوی فه‌رهاد (مسته‌فا زه‌مانی) بکات، فه‌رهاد یه‌کێکه‌ له‌ هه‌ڵسوڕاوه‌ سیاسییه‌کانی سه‌رده‌می خۆی، باوکی هه‌ر دوو کچ و کوڕه‌که‌ له‌ ژێر کاریگه‌ری که‌سایه‌تییه‌کی دیکه‌ به‌ ناوی کاکه‌ گه‌وره‌ن (عه‌لی نه‌سیریان). 

به‌ هۆی گۆڕان کارییه‌کانی ساڵی ۱۳۳۲ هه‌تاوی له‌ ئیێران بزووتنه‌وه‌یه‌کی ناسیۆناڵیستی سه‌ر هه‌ڵده‌دات و فه‌رهاد به‌ هۆی کاری ڕۆژنامه‌وانیه‌وه‌ له‌م بزوتنه‌وه‌ تێوه‌ده‌گلێت، دواجار شانشینی ئێران تۆمه‌تی کوشتن ده‌خاته‌ پاڵی و ده‌یه‌وێت به‌م تۆمه‌ته‌ له‌ سێداره‌ی بده‌ن، به‌ڵام کاکه‌ گه‌وره‌ به‌ هۆی ده‌ستڕۆشتووی له‌ نێو حکوومه‌تی شانشینی ئێران له‌ سێداره‌ ڕزگاری ده‌کات. 

دوای ڕزگار بوونی فه‌رهاد له‌ سێداره‌، شه‌هرزاد و فه‌رهاد بڕیار ده‌ده‌ن که‌ له‌ سیاسه‌ت دوور که‌ونه‌وه‌ و ژیانێکی هاوسه‌رگیری باش بۆ خۆیان پێکبهێنن، به‌ڵام له‌ ئان و ساتی ماره‌بڕیندا، کاکه‌ گه‌وره‌ که‌ ئازادی به‌ ژیانی ئه‌م دوو که‌سه‌ به‌خشیوه‌ ئه‌مجاره‌یان ده‌بێته‌ نه‌گه‌بتی بۆ ژیانیان و ڕێوڕه‌سمی زه‌ماونده‌که‌یان لێ تاڵ ده‌کات.

کاکه‌ گه‌وره‌ ته‌نیا کچێکی هه‌یه‌ و دوکتوره‌کان پێی ڕاده‌گه‌یه‌نن که‌ کچه‌که‌ت سک ناکات و نه‌زێیه‌، کاکه‌ گه‌وره‌ له‌ دوای ئه‌وه‌یه‌ که‌ که‌سێک ببێته‌ میرات خۆری ماڵ و مڵکه‌که‌ی، هه‌ر بۆیه‌ له‌گه‌ڵ زاواکه‌ی خۆی (شه‌هاب حوسه‌ینی) پیلان داده‌ڕێژی که‌ شه‌هرزاد له‌ زاواکه‌ی ماره‌ بکات و دوای ئه‌وه‌ی منداڵێکی لێبوو، ئه‌و منداڵه‌ به‌ کچه‌که‌ ئه‌و ببه‌خشێت تاکوو ئه‌و گه‌وره‌ی بکات و دواجار ببێته‌ میرات خۆری کاکه‌ گه‌وره‌.

ئه‌م نه‌گبه‌تییه‌ نوێیه‌ هه‌ر هه‌موو ژیانی شه‌هرزاد و فه‌رهاد ده‌خاته‌ ژێر کاریگه‌ری سه‌ختی خۆیی و له‌ سه‌رده‌می به‌ندیخانه‌ ژیانیان تاڵ‌تر ده‌کات، واتا ئه‌وه‌ی سه‌رده‌مێک ژیانی ئه‌م دوو عاشقه‌ ڕزگار ده‌کات و خۆشیان بۆ دێنێت، دواجار خۆی ده‌بێته‌ نه‌گه‌به‌تی بۆ سه‌ر ژیانی هه‌ر دووکیان.

زنجیره‌ درامای شه‌هرزاد به‌ هۆی ئه‌وه‌ی که‌ ئه‌کته‌ری زۆر ناوداری ئێرانی تێدایه‌ و به‌ کوالێتییه‌کی زۆر باشه‌وه‌ به‌رهه‌م هاتووه‌، له‌ لایه‌ن خه‌ڵکی ئێرانه‌وه‌ پێشوازییه‌کی زۆر باشی لێکراوه‌ و بڕیار وایه‌ که‌ به‌شی دووهه‌می ئه‌م زنجیره‌ درامایه‌ به‌م زوانه‌ دروست بکرێت.

شایانی باسه‌ که‌ ئه‌کته‌ری ڕۆڵی فه‌رهاد هه‌مان ئه‌کته‌ره‌که‌ی زنجیره‌ درامای یوزالسیف یان هه‌مان حه‌زره‌تی یوسفه‌.

News Code 4353

نیشانەکان

بۆچوونی ئێوە

You are replying to: .
  • 2 + 3 =