۷۰۰ ئاڵزایمری له‌ ئێراندا هه‌یه‌/۱۹ پارێزگا له‌ قۆناغی پیریدان

سه‌رۆکی ده‌بیرخانه‌ی به‌ساڵاچووه‌کان به‌ ئاماژه‌ به‌ بوونی ۷۰۰ هه‌زار نه‌خۆشی ئاڵزایمری له‌ ئێران، وتی: لێکۆڵینه‌وه‌کان نیشانی ده‌دات که‌ ئه‌م نه‌وه‌ نوێیه‌ سه‌رپه‌ره‌شتی دایک و باوکه‌ پیره‌کانیان ناکه‌ن.

فه‌رید به‌راتی سه‌ده‌ له‌ گفتوگۆ له‌گه‌ڵ هه‌واڵنێری مێهر، به‌ ئاماژه‌ به‌وه‌ی که‌ ۲۰ ساڵ پێش ئێستا هێماکانی پیر بوونی کۆمه‌ڵگای ئێران خۆی نیشان دا، وتی: ئێمه‌ هه‌ر له‌و کاته‌وه‌ سه‌باره‌ت به‌م پیر بوونه‌ هۆشداریمان دا، به‌ڵام که‌س گوێی پێنه‌داین.

ئه‌و درێژه‌ی دا: به‌ پێی لێکۆڵینه‌وه‌ ئه‌نجام دراوه‌کان، نه‌وه‌ی ئه‌مڕۆ و منداڵه‌کانی ئێمه‌ هیچ دڵیان پێوه‌ نییه‌ که‌ دایک و باوکه‌ به‌ساڵاچووه‌کانی خۆیان له‌ لای خۆیانه‌وه‌ ڕابگرن و هه‌ر بۆیه‌ ئێمه‌ ده‌بێت بۆ ئه‌م کێشه‌ نوێیه‌ پلانی باش دابڕێژین.

سه‌رۆکی ده‌بیرخانه‌ی به‌ساڵاچووه‌کانی ئێران جه‌ختی کرد: پیربوونی کۆمه‌ڵگا و به‌ساڵاچوون کێشه‌یه‌کی نوێیه‌ و له‌ ئێستادا زۆربه‌ی وڵاتان هه‌یانه‌ و له‌ چیندا ۲۰ له‌ سه‌دی کۆمه‌لگا پیره، له‌ ئێستادا له‌ ئێران ۸ له‌ سه‌دی کۆمه‌لگا پیره، به‌ڵام ئێمه‌ به‌ خێرایی به‌ره‌و ئه‌م دیارده‌ ده‌ڕۆین و ده‌بێت خۆمانی بۆ ئاماده‌ بکه‌ین.

به‌راتی وتی: له‌ ئێستادا له‌ ئێران ۱۹ پارێزگا گه‌یشتوونه‌ته‌ قۆناغی پیر بوون و ئه‌مه‌ش ئه‌م پارێزگانه‌ی له‌ قه‌یرانی پیری نزیک کردووه‌ته‌وه.

ئه‌و زیادی کرد: له‌ ئێستادا ۷۰۰ هه‌زار نه‌خۆشی ئاڵزایمری له‌ ئێراندا هه‌یه، واتا له‌ هه‌ر ۱۰ که‌س یه‌ک که‌س له‌ ئێران تووشی نه‌خۆشی ئاڵزایمر بووه، ئه‌مه‌ له‌ حاڵێک دایه‌ که‌ هیچ ناوه‌ند یان دام و ده‌زگایه‌ک بۆ یارمه‌تی گه‌یاندن و ڕاهێنان له‌باره‌ی ئه‌م نه‌خۆشیه‌وه‌ بوونی نییه‌ و هه‌ر وا وێڵ کراون.

ئه‌نجومه‌نی ئاڵزایمری ئێران ده‌ڵێت که‌ زیاتر له‌ ۵ هه‌زار نه‌خۆشی له‌ ژێر چه‌تری خۆیدا کۆ کردووه‌ته‌وه، به‌ڵام ئه‌مه‌ ته‌نیا ئاماره‌کانی شاری تارانه‌ و ڕوون نییه‌ که‌ له‌ شاره‌کانی دیکه‌ی ئێران چۆن چاودێڕی بۆ ئه‌م نه‌خۆشانه‌ ده‌کرێت.

ئه‌و له‌ کۆتاییدا وتی: خودی بوونی به‌ساڵاچووکان و پلان دانان بۆ به‌ڕێوه‌ بردنی ئه‌م کێشه‌یه‌ ده‌توانێت ببێته‌ سه‌رچاوه‌ی ڕه‌خساندنی هه‌لی کار بۆ لاوه‌کان که‌ هیوادارم سیسته‌می ده‌رون ناسی له‌ ئێران بتوانێت له‌گه‌ڵ کۆمه‌ڵگای خوێندکاری ئێرانی په‌یوه‌ندی باش دروست بکات و پێکه‌وه‌ چاره‌سه‌ری بۆ ئه‌م کێشه‌یه‌ بدۆزنه‌وه.

News Code 4278

نیشانەکان

بۆچوونی ئێوە

You are replying to: .
  • 3 + 1 =