هه‌ولێر پشتیوانی ده‌وڵه‌تی به‌غدایه‌ له‌ شه‌ڕی دژه‌ تیرۆریزمدا

سەرۆكایەتی هەرێمی كوردستان پشتیوانی بۆ حكومەتی عێراق دەردەبڕێت لە شەڕی دژه‌ تیرۆردا.

به‌ ڕاپۆرتی ئاژانسی هه‌واڵی مێهر، سەرۆكایەتی هەرێمی كوردستان لە پەیامێكدا هێرشكردنە سەر مەزارگەی سەید محەممەد کوڕی ئیمام هادی لە شارۆچكەی بەلەد ئیدانە کرد.

سەرلەبەیانی دوێنێ هەینی  هێرشکرایە سەر مەزارگەی سەید محەممەد کوڕی ئیمام هادی لە شارۆچكەی بەلەد لە باکووری سەڵاحەدین و زیاتر لە ۸۰ کوژراو و برینداری لێکەوتەوە.

 هێرشەکە بە تۆپبارانکردن دەستیپێکردووە و دواتر سێ خۆکوژ لە مەزارگەکە خۆیان تەقاندووەتەوە، بەپێی ئامارەكان ۳۰ کوژراو و ۵۰ برینداری لێكەوتووەتەوە.

له‌و په‌یامه‌دا سه‌رۆکایه‌تی هه‌رێمی کوردستان وێڕای سەرەخۆشیكردن لە كەس و كاری قوربانیان و هیوای زوو چاكبوونەوە خواستن بۆ برینداران، رایدەگەیێنێت "پەلاماردانی شوێن و مەزارگە پیرۆزەكان و تەقاندنەوەیان، نیشانەی ئەوپەڕی بەدڕەوشتیی تیرۆریستانی دوژمنی خودا و مرۆڤایەتییە".

لە پەیامەكەدا جەختیش کراوه‌ که‌ "تیرۆریستان دوژمنی هاوبەشی هەموو پێكهاتە ئایینی و نەتەوەییەكانن و هەر لەو سۆنگەیشەوە گەلی كوردستان كە خۆی قوربانیی دەستی تیرۆریستان بووە، هاوسۆز و هاوخەمی قوربانیانی كردەوە تیرۆریستییەكانی شارەكانی عێراقە".

سەرۆكایەتی هەرێمی كوردستان ئه‌وه‌شی ڕاگه‌یاندووه‌ که‌ بەهەموو توانایەك لە شەڕی تیرۆریستاندا هەماهەنگ و پشتیوانی حكومەتی عێراقی دەبن و لەم شەڕەدا هەردوولا لە یەك سەنگەری هاوبەش دان.

News Code 4202

نیشانەکان

بۆچوونی ئێوە

You are replying to: .
  • 5 + 10 =