هەولێر و بەغدا لە ڕێککەوتنی کۆتایی و چارەسەریی کێشەکان نزیک بوونەتەوە

بە پێی ڕاپۆرتی ئاژانسی هەواڵی مێهر, بەشیر حەداد، جێگری دوەمی سەرۆکی پەرلەمانی عێراق لەراگەیەنراوێکدا ئاماژە بەوەکراوە، حکومەتی هەرێم لەگفتوگۆکانی چەند رۆژی رابردوودا لەبەغداد جەختیکردوەتەوە لەوەی ئامادەیە پابەندی ئەرکە دەستورییەکانی بێت و لەبەرامبەردا حکومەتی فیدڕاڵیش ئەرکەکانی خۆی بەرامبەر هەرێم جێبەجێبکات.

ئاماژەی بەوەشکردوە، بەپێویستی دەزانن گفتوگۆکان چڕبکرێنەوە و هەردولا ناکۆکییەکان تێپەڕێنن، ئەوەش بەئامانجی تێپەڕاندنی ئەم قۆناغە سەختەی کە وڵات پێیدا تێپەڕدەبێت.

جێگری دوەمی سەرۆکی پەرلەمانی عێراق ئاشکرای دەکات کە گفتوگۆکانی هەولێر و بەغداد گەیشتونەتە قۆناغی کۆتایی و هیوادارن هەردوولا رێککەوتنێکی دادپەروەرانە بکەن و پابەندی رێککەوتنەکەش بن.

12ی ئەم مانگە نوسینگەی مستەفا كازمی، سەرۆك وەزیرانی عێراق بڵاویکردەوە، لەكۆبونەوەی شاندی هەرێمی کوردستان بەسەرۆكایەتی قوباد تاڵەبانی، جێگری سەرۆكی حكومەتی هەرێم و سەرۆكایەتییەكانی وەزیران و پەرلەمانی عێراق، پرسی پڕكردنەوەی كورتهێنانی دارایی و ئەو شێوازانە تاوتوێكران كە پارەی تەرخانكراو و دادپەروەرانە بەسەر هەموو ناوچەكانی عێراقدا دابەش بكرێت.
پێویستە هەرێم رۆژانەی 250 هەزار بەرمیل نەوت و نیوەی داهاتی ناوخۆ رادەست بکات
بەپێی یاسای پڕكردنەوەی كورتهێنانی بودجە كە مانگی رابردوو پەرلەمانی عێراق پەسەندی كرد و كورد دەنگی پێنەدا، ناردنی شایستە داراییەكانی هەرێم لەلایەن بەغداوە بەستراوەتەوە بەپابەندبوونی هەرێم بەرادەستكردنی رۆژانەی 250 هەزار بەرمیل نەوت و نیوەی داهاتی ناوخۆ.