ساڵی داهاتوو بشێوی لە هەرێمی کوردستان دروست دەبێت

پەرلەمانتارانی مانگرتوو دەڵێن: خەڵكی كوردستان دڵنیا دەكەنەوە، ئەگەر ئەم دۆخە لە حكومڕانی ئێستا بەردەوامبێت، دڵنیاین ساڵی داهاتوو بشێوی دروست دەبێت.

بەپێی ڕاپۆرتی ئاژانسی هەواڵی مێهر, پەرلەمانتارانی مانگرتو لە پەرلەمانی هەرێمی كوردستان، لەبەردەم باڵەخانەی پەرلەماندا كۆنگرەیەكی رۆژنامەوانیان سازكرد.

ئاماژەیان بەوەكرد، پشتیوانی هەمو خەباتێك دەكەن بۆ چونەدەرەوە لەم دۆخەی مەترسی گەورەی دروستكردوە.

لەبەردەم باڵەخانەی پەرلەمانی كوردستان، ئەمڕۆ هەینی پەرلەمانتارانی مانگرتو كۆنگرەیەكی رۆژنامەوانیان سازكرد، عەلی حەمەساڵح، پەرلەمانتاری فراكسیۆنی گۆڕان لە كۆنگرەكەدا رایگەیاند "لە سۆنگەی بەرپرسیارییەتیمان بەرامبەر دۆخی قەیراناوی ئێستا بڕیاری مانگرتنمانداوە".
ئاماژەی بەوەشكرد، لە سەروی هەمو ئامانجەكانمانەوە، ئەنجامدانی دانیشتنێكی پەرلەمان هەبو بۆ رێگرتن لە خوێنڕشتن، بۆ ئەوەی چیتر قوت و موچەی خەڵك بەم دەردەی ئێستا نەبرێت و چاكسازی ریشەیی لە دۆسییەكانی نەوت و خاڵە سنورییەكاندا بكرێت.

سەبارەت بە خۆپیشاندانەكانیش رونیكردەوە، پشتیوانیدەكەین و بەشێك دەبین لە هەمو خەباتێكی مەدەنی، چ لەرێگەی خۆپیشاندان لەسەر شەقامەكان، چ لە پەرلەمان چ لە ماڵەكان بێت.

لە وتەكانیدا باسی لەوەكرد، دەیانەوێت خەڵكی كوردستان دڵنیاكەنەوە، ئەگەر ئەم دۆخە لە حكومڕانی ئێستا بەردەوامبێت، دڵنیابن 2021 ساڵێكی ئێجگار سەخت دەبێت و پشێوی لە كوردستاندا دروستدەبێت، هەموشمان دۆڕاودەبین.

وتیشی، "بۆ گەیشتن بەو ئامانجانە دو بژاردەمان هەبو، یەكەمیان كۆكردنەوەی 37 واژۆ بو بەپێی بڕگەی یەكەم لە ماددەی هەشت لە پێڕەوی ناوخۆ راستەوخۆ بانگەوازی دانیشتنی پەرلەمان بكەین، بەڵام بەداخەوە تا ئەم ساتە 29 واژۆمان كۆكردوەتەوە.

راشیگەیاند ئەو واژۆیانە تایبەتن بە پەرلەمانتارانی كۆمەڵی ئیسلامی، یەكگرتوی ئیسلامی، بزوتنەوەی گۆڕان و پەرلەمانتارە سەربەخۆكان، داواكارین لەو پەرلەمانتارانەی یەكێتی و نەوەی نوێ بەشداربن بۆ واژۆكردن بۆ دانیشتنی پەرلەمان لەسەر پرسی موچە.

سەبارەت بە چارەسەری دۆخەكە راشیگەیاند، گەر دەسەڵاتدارانی هەرێم لە خەمی چارەسەردان، دەبێت سەرەتا لەگەڵ بەغدا رێككەوتن بكرێت و بە راشگاوی رابگەیەندرێت 250 هەزار بەرمیل نەوت و لەسەدا 50ی داهاتی فیدرالی رادەستبكرێت بەرامبەر موچە.

دوەمین خاڵیش لەو كۆنگرەیەدا بۆ چارەسەری دۆخەكە بریتییە لە كۆتاییهێنان بە نارۆشنی و گەندەڵی لە دۆسییەی نەوتدا و خاڵی سێیەمیش كۆتاییهێنانە بە تاڵانیی خاڵە سنورییەكان.

جەختیشیانكردەوە، چونكە مەترسییەكە ئێستا زۆر زیاترە، خەڵك بەجێناهێڵن و پشتیوانی هەمو خەباتێكی مەدەنی دەكەن، لەئێستاشدا پێكەوە لە هەوڵدا دەبن بۆ دانانی پلانێكی چارەساز بۆ دۆخی ئێستای هەرێم.

News Code 35169

نیشانەکان

بۆچوونی ئێوە

You are replying to: .
  • captcha