ئەگەری سەرهەڵدانی کوودەتا لە عێراق

کارناسێکی عێراقی لای وایە کە ئەمریکییەکان ڕۆڵێکی بەرچاویان بووە لە هێرشی ئەمدواییە بۆ سەر بنکەی هێزەکانی حەشدی شەعبی لە باشووری بەغدا.

"عەلی فاهم" کارناس و نووسەری عێراقی لە لێدوانێکی تایبەتی بۆ هەواڵنێری ئاژانسی مێهر بە ئاماژە بە ڕۆڵی گرینگی حەشدی شەعبی لە تێکشکاندنی تیرۆریستان و گۆڕانی ئاراستەی شەڕ لە بەرژەوەندیی هێزەکانی عێراق لە دوای ساڵی ٢٠١٤ و هەوڵی دوژمنان بۆ لاواز کردنی عێراق و چۆڵ کردنی لە هێزەکانی بەرخۆدان و پیلانی میدیایی لە دژی ئێران، ڕایگەیاند: بێ گومان هەڵدانی دروشمی ساختە لە پێناو بەرژەوەندیی دوژمنانی کۆماری ئیسلامی ئێران و بەچەواشە بردنی ڕەوتی دژە گەندەڵی لە عێراق، بە مەبەستی لاوازکردنی مەرجەعیەتی ئایینی ئەنجام دەدرێ و کەسانێکی گومان لێکراو کە پەیوەندیان بە سیستەمگەلی هەواڵگری بیانییەوە هەیە، ئەو کارانە ڕادەپەڕێنن.

ئەو کارناسە بە ئاماژە بە هەوڵی دوژمنانی ئەمریکی، زایۆنی و عەرەبی بۆ دابەشکردنی حەشدی شەعبی بە حەشدی ئێرانی، حەشدی مەرجەعی، حەشدی عێراقی … ڕاشیگەیاند: ئەو هەوڵانە پێشەکییەکن بۆ وەلاوەنانی ئەو هێزانە لە هاوکێشەگەلی عێراق و چۆڵ‌کردنی گۆرەپانەکان لە هەر جۆرە هێزێکی دژە ئەمریکی. ئەگەرچی ئاگاداری ئەوەشن کە کۆتایی هێنان بە پڕۆژەی حەشدی شەعبی لە عێراقدا نامومکینە، چونکە حەشدی شەعبی پێگەیەکی بەربڵاوی جەماوەری و نیشتمانی و ئایینی لە عێراقدا هەیە.

ناوبراو هەروەها بیری هێنایەوە کە قۆڵبەستکرانی چەند فەرماندەی هێزەکانی کەتیبەی ٤٥ی حەشدی شەعبی لە لایەن هێزەکانی بەرەنگاربوونەوەی تیرۆریزم بە فەرمانی ئەمریکا ئەنجام دراوە و جەختی کرد: ئامانج لەو کارە دوژمنی و ئاژاوەنانەوە لە نێوان حەشدی شەعبی و هێزەکانی ئاسایش و تەریکخستنەوەی حەشدی شەعبی و هەڵگیرساندنی ئاگری شەڕ لە نێوان ڕەوتەکانی شیعە و سوننە بووە کە ئەوەش دەبێتە هۆی لاوازبوونی هێزە نیشتمانییەکان و لاوازی وڵات. لەو ڕووەوە دوژمن بە تیرێک دوو نیشان دەپێکێت.

عەلی فاهم وێرای ئاماژە بە کێشەگەلی ئابووریی بەربڵاوی ئیستای عێراق و لەوان کەمایەسیی بوودجە و قەرزی نێودەوڵەتی لە پەنای تەشەنەی بەربڵاوی نەخۆشیی کۆرۆنا و ناکارامەیی دەوڵەتی عێراق لە هەمبەر ئەو کێشانە، وتی: پێدەچێ خەوشەدارکردنی پێگە و ڕۆخساری حەشدی شەعبی لە قۆناغی ئێستادا، ئامانجێکی دیکەشی لە پشت بێت و ئەویش بەچەواشەبردنی ڕای گشتی عێراق و لەبیربردنەوەی ئاستەنگەکانی ئێستای ئەو وڵاتەیە.

ئەو کارناسە هەروەها سەبارەت بە کەوتنە مەترسیی ڕەوتی سیاسی و دیموکراسی عێراق و ئەگەری سەرهەڵدانی کوودەتای سەربازی هوشداری دا و وتیشی: ڕۆڵی ئەمریکا لەو هەڵمەتەدا تەواو بەرچاوە، چونکە فەرمانی هێرشی بە باڵی دژە تیرۆر داوە و دیارە زۆر فەرماندەی ئەو هێزەش دارەدەستی ئەمریکییەکانن.

News Code 33013

نیشانەکان

بۆچوونی ئێوە

You are replying to: .
  • 7 + 4 =