هەرێمی کوردستان نابێتە قوربانیی ململانێکانی ئێران و ئەمریکا/ پەیوەندی باشمان لەگەڵ ئێران هەیە

بەرپرسی فەرمانگەی پەیوەندییەکانی دەرەوەی هەرێمی کوردستان دەڵێت: هەرێم ناکەنە قوربانیی ململانێکانی ئێران و ئەمریکا.

بە ڕاپۆرتی ئاژانسی هەواڵی مێهر، سەفین دزەیی، لە هەڤپەیڤینێکی تایبەت لەگەڵ نووسینگەی رووداو لە نیویۆرک رایگەیاند: هەرێمی کوردستان پەیوەندییە دیپلۆماسییەکانی فراوانتر دەکات.

دزەیی لە وڵامی پرسیارێکدا سەبارەت بە ناوەڕۆکی کۆبوونەوەی شاندی عێراق لەگەڵ سەرۆکی ئەمریکا دۆناڵد ترامپ دەڵێت: تەوەرە سەرەکییەکان بەگشتی سەبارەت بە بارودۆخی ناوچەکە و ئەو گرژیانەی لە رۆژهەڵاتی ناوەڕاست بە گشتی هاتوونەتە پێشەوە بوو بە تایبەتی ئەو کێشانەی کە کاریگەری راستەوخۆی لەسەر عێراق هەیە.

وتیشی باس لەوە کراوە کە رۆڵی عێراقیش لەو هاوکێشەیەدا چی دەبێت؟... هاوکات پەیوەندی دوو لایەنەی نێوان ئەمریکا و عێراق و بەردەوامبوونی سەقامگیری و پشتگیری ئەمریکا بۆ عێراق و هێنانەکایەی سەقامگیری و پەرەپێدانی لایەنی ئابووری تەوەری سەرەکی بوون لە گفتوگۆیەکان.

سەفین دزەیی سەبارەت بەوەی کە فشار هەیە لەسەر عێراق و هەرێمی کوردستان هەم لەلایەن ئێران و هەم لەلایەن ئەمریکاوە، کە لەو لووتکەیە لەگەڵ هەردوولادا هەبوو، هیچ فشارێک هەبوو بۆ ئەوەی لایەنگیری یەکێک لەو دوو لایەنە بکەن؟ یان نا، ڕایگەیاند: لەڕاستیدا عێراق لە چەند ساڵی رابردوو دووچاری کۆمەڵێک کێشە و شەڕ و پێکدادان و ئابڵۆقە و نەهامەتی بووەتەوە، بۆیە بارودۆخی عێراق زیاتر لەوە بەرگە ناگرێت ببێتە گۆڕەپانی چارەسەرکردنی ململانێی.

ڕاشیگەیاند کە لە هەموو کۆبوونەوەکاندا ئاماژە بەوە دراوە عێراق نابێت ببێتە گۆڕەپانی ململانێ.. بە تایبەتیش بە نیسبەت هەرێمی کوردستانیشەوە، بەڕاستی ئەو بەشەی عێراق کە تا راددەیەکی زۆر لەڕووی ئەمنی و گەشەسەندنی ئابووری پێشکەوتن بەخۆیەوە دەبینێت، ناکرێت بیکەینە قوربانی.

جەختیشی کرد: ئێمە پەیوەندییەکی باشمان لەگەڵ ئێران هەیە بە حکومی ئەوەی دراوسێین، لەڕووی پەیوەندی مێژوویی و کۆمەڵایەتییەوە، ئەو پەیوەندیانە دێرینن و حەز دەکەین بەردەوام بێت.

ئەوەشی وت کە بە هەمانشێوە ئەمریکا وڵاتێکی هاوپەیمانە، هاوکارمان بووە لە رۆژانی تەنگانە، بۆیە پێویستە ئەو بەڵانسە رابگیرێت و عێراق نەبێتە شوێنی ململانێ.

لەبارەی پەیوەندییەکانی بەغدا و هەولێریشەوە ئەوەی وتووە کە بڕیار وابوو لەو ۶ مانگەدا گفتوگۆیەکی چڕ هەبێت لەسەر چارەسەرکردنی مەلەفی نەوت و رادەستکردنی ئەو ۲۵۰ هەزار بەرمیلەی کە بە‌غدا باسی لێوە دەکات بەو هەموو پابەندیانەی کە حکومەتی هەرێمی کوردستان هەیەتی نەک تەنها نەوتەکەی.

زیادیشی کرد: دانوستاندن دەستیپێکردووە، هەرچەندە درەنگ دەستیپێکرد، بەڵام ئێستا دانوستاندنێکی جیدی لەنێوان هەولێر و بەغدا هەیە لە ئاستی جیا جیا، لە ئاستی وەزیر و شاندی تەکنیکی. هەوڵیش دەدرێت لەو مانگەدا بەر لەوەی گفتوگۆ لەسەر پرۆژەیاسای بودجەی ۲۰۲۰ لە پەرلەمان بکرێت، ئەو بابەتە چارەسەر بکرێت. هەمووشمان دەزانین یاسای بودجە بۆ ساڵێکە، واتە ئەوەی ئێستا لە ئارادایە تاوەکو ۳۱-۱۲-۲۰۱۹ کاری پێدەکرێت. ئەوەی دیکە لە ساڵی داهاتوو دەکەوێتە بواری جێبەجێکردن.

News Code 28545

نیشانەکان

بۆچوونی ئێوە

You are replying to: .
  • 2 + 11 =