مەسعوود بارزانی: ویژدانی كۆمەڵی نێودەوڵەتی بەخەبەر بێت

ڕێبەری پارتی دیمۆکراتی کوردستانی عێراق لە ساڵڕۆژی کارەساتی ئەنفالی بارزانییەکان لە لایەن ڕژێمی بەعس، ڕایگەیاند: ویژدانی كۆمەڵی نێودەوڵەتی بەخەبەر بێت ئەو هەموو زوڵمەمان لێکرا و ئەوان بێدەنگ بوون.

بە ڕاپۆرتی ئاژانسی هەواڵی مێهر، مەسعوود بارزانی لە پەیامێکدا یادی ئەنفالی هەشت هەزار بارزانی کردەوە.
لەو پەیامەدا هاتووە: "ئەمڕۆ یادی ڕۆژێكی تاریكە لە مێژووی گەلەكەماندا. بەر لە سی و شەس ساڵ ڕژێمی بەعس بەشێوەیەكی دڕندانە هەشت هەزار پیاوی پیر و گەنجی بارزانیی، هەر لە تەمەنی نۆ ساڵی هەتا بەساڵاچووی نەوەد ساڵە، ڕاپێچی بیابانەكانی باشووری عێراق كرد و بەشێوەیەكی نامرۆڤانە كۆمەڵكوژی كردن."
ئاماژەش دراوە کە " ئەو تاوانە ئەڵقەیەك بوو لەو زنجیرە كارەسات و قوربانیدانانەی بەسەر ڕۆڵەكانی گەلی كوردستاندا هاتووە، هەر لە بێسەروشوێنكردنی دوازدەهەزار گەنجی فەیلی و ئەنفالی گەرمیان و كیمیابارانكردنی هەڵەبجە بگرە هەتا تەعریب و ڕاگواستن و پەلاماری تیرۆریستان و تاوان لەدژی خوشك و برا ئێزیدییەكانمان."
بارزانی وتوویەتی: "بەداخەوە، لەكاتێكدا سی و شەش ساڵ بەسەر ئەو تاوانە گەورەیەدا تێدەپەڕێت، ئێستاش ناوە ناوە ڕەنگداوەی بیری شۆڤینی و ئەنفالچی لە ھەڵسوكەوت و ڕەفتاری ھەندێ كەس و لایەندا دەبینین، كە ئەوە كێشەی سەرەكیی گەلی ئێمە بووە لەگەڵ حكوومەتە یەك لەدوای یەكەكانی بەغدا."
مەسعوود بارزانی لە کۆتاییدا دەڵێت: "لەیادی ئەنفالی بارزانییەكاندا، دەمەوێ جەخت بكەمەوە كە یادكردنەوە تەنھا بۆ وەبیرھێنانەوەی ئازارەكان نییە. بۆ ئەوەیە ھەموو تواناكان بۆ ڕیشەكێشكردنی ئەو ھزرەی ئێمەی ئەنفال كرد بخرێتە گەڕ. بۆ ئەوەیە ویژدانی كۆمەڵی نێودەوڵەتی بەخەبەر بێت و كاتێك تازە وا گۆڕی بە كۆمەڵی ئازیزانمان لە بیابانەكانی عێراق دەدۆزرێنەوە، شەرم لە گەلی ئێمە بكەن و بزانن چ زوڵمێكمان لێ كرا و ئەوان بێدەنگ بوون."

News Code 27692

نیشانەکان

بۆچوونی ئێوە

You are replying to: .
  • 2 + 0 =