عێراق هیچ کات نابێتە باڵی گوشار دژی وڵاتانی دیکە

وتەبێژی وەزارەتی دەرەوەی عێراق جەختی کرد کە لە پرسی گەمارۆکانی ئەمریکا لە دژی ئێران، عێراق نایەوێ بببێتە باڵی گوشار لە دژی لایەنێکیان.

بە ڕاپۆرتی ئاژانسی هەواڵی مێهر، ئەحمەد سەحاف وتەبێژی وەزارەتی دەرەوەی عێراق لە لێدوانێک بۆ رۆژنامەی سعوودیی "الحیاة" جەختی کرد: لە پرسی گەمارۆکانی ئەمریکا لە دژی ئێران، عێراق نایەوێ بببێتە باڵی گوشار لە دژی لایەنێکیان.

سەحاف بە ئاماژە بەوەی کە عێراق باوەڕی بە پەیوەندی لە گەڵ هەموو دراوسێکانیەتی، جەختیشی کرد: سەقامگیریی عێراق پەیوەستە بە سەقامگیریی ناوچە.

ئەو بەرپرسە عێراقییە بە بیرهێنانەوەی پاڵپشتی نەکردنی بەغدا لە سیاسەتی چەندتەوەری لە ناوچەدا، ڕایگەیاند: ئەو جۆرە سیاسەتانە پەرە دەدەن بە گرووپ‌سازیی فیرقەیی و سیاسەتی ئەمنیی تاکخوازانە بۆ هەندێک وڵات ساز دەدەن و دەبنە هۆی لە ناوچوونی پرێنسیپی بەرژەوەندیی هاوبەش.

سەحاف ئاماژەی بە پەیوەندیی نێوان بەغدا و دیمەشق سەبارەت بە پرسی تیرۆریزم و ئاڵوگۆڕکردنی کەسانی پێوشوێن‌گیراو دا و ڕاشیگەیاند: پلانی عێراق بۆ گەڕاندنەوەی سووریا بە یەکێتی عەرەبی، بەو پێیەیە کە ئاسایش و ئاشتیی نێودەوڵەتی بە ئاوارتەکردنی لایەنێکی ناوچەیی مسۆگەر نابێت.

ناوبراو بە ئاماژە بەوەی کە "ناهێڵین سەرزەوینی عێراق بکرێتە بنکە و ڕێڕەوگەیەک بۆ زیان گەیاندن بە لایەنەکانی ناوچەیی"، سەبارەت بە هەڵویستی عێراق هەمبەر بە گەمارۆکانی ئەمریکا لە دژی کۆماری ئیسلامی وتی: عێراق هەڵویستی خۆی هەمبەر بە گەمارۆکان بە ئاوردانەوە لە پرێنسیپی بەرژەوەندیی ناوخۆیی خۆی دیاری دەکات و ئێمە بە پێی ئەو ڕیسایە دەجووڵێینەوە و نامانەوێ بەشێک لە گوشاری دژی لایەنێک بین.

وتیشی: پلانە کارییەکانی دانیشتنی وێرشۆ ناڕوون بوو و پرسی فەلەستین کە پرسێکی ناوەندی و بنەماییە بۆ عێراق، لەو دانیشتنەدا باسی لێ نەکرا و بەو هۆیە بەغدا لە دانیشتنەکەدا بەشدار نەبوو.

ئەو بەرپرسە عێراقییە بە ئاماژە بە پاڵپشتیی عێراق لە ڕەوتی پێکهێنانی وڵاتی فەلەستین بە پایتەختی قودس، جەختیشی کرد: پێگەی عێراق و هەڵویستی بێ لایەنانەی ئەو وڵاتە هەمبەر بە پێکدادانە ناوچەییەکان بۆتە هۆی ئیدارە و چاودێریی بەغدا بە سەر وڵاتانی عەرەبی و ناوچەکە.

وتەبێژی وەزارەتی دەرەوەی عێراق لە کۆتاییدا پەیوەندییەکانی عێراق و عەرەبستانی ستراتژیک وەسف کرد و وتیشی: ئەو پەیوەندییانە چۆتە قۆناغی هاوئاهەنگیی باڵا و گۆرانکاریی گرینگ سەبارەت بە ئاوەدان کردنەوە و سەرمایەدانەری بە خۆوە دەبینێت.

News Code 25363

نیشانەکان

بۆچوونی ئێوە

You are replying to: .
  • 8 + 2 =