هیچ وڵاتێک مافی ئه‌وه‌ی نییه‌ وڵاتێکی تر به‌ که‌یفی خۆی سزا بدات

وه‌زیری ده‌ره‌وه‌ی ئێران له‌ میانه‌ی گفتوگۆیه‌کی ته‌له‌فوونی له‌گه‌ڵ هاوتا بریتانیاییه‌که‌ی خۆی وتی: هیچ وڵاتێک مافی ئه‌وه‌ی نییه‌ که‌ یه‌کلایه‌نه‌ و له‌ ده‌ره‌وه‌ی بازنه‌ی یاسا نێونه‌ته‌وه‌ییه‌کان وڵاتێکی دیکه‌ سزا بدات.

به‌ ڕاپۆرتی ئاژانسی مێهر له‌ ماڵپه‌ڕی وه‌زاره‌تی ده‌روه‌ی ئێران، بوریس جانسۆن له‌گه‌ڵ محه‌مه‌د جه‌واد زه‌ریف، وه‌زیری ده‌ره‌وه‌ی ئێران سه‌رباره‌ت به‌ به‌شداری کردنی بریتانیا له‌ هێرشه‌ مووشه‌کییه‌که‌ی سه‌ر سووریا په‌یوه‌ندی ته‌له‌فوونیان ئه‌نجام دا.

وه‌زیری ده‌ره‌وه‌ی ئیران ئه‌م هێرشه‌ یه‌کلایه‌نه‌ی ئیدانه‌ کرد و جه‌ختیشی کرد که‌ ئێران دژی به‌ کارهێنانی چه‌کی کیمیایی به‌ هه‌ر شێوه‌یه‌که‌. ئه‌و ئاماژه‌ی دا که‌ ئێران خۆی سه‌رده‌مێک قوربانی چه‌کی کیمیایی سه‌دام حسه‌ین بووه‌ و هه‌رگیز له‌م جۆره‌ چه‌کانه‌ پشتیوانی ناکات.

زه‌ریف هه‌روه‌ها وتی: ئه‌م هێرشه‌ به‌ر له‌وه‌ی لێکۆڵه‌ره‌کانی نه‌ته‌وه‌ یه‌کگرتووه‌کان بچنه‌ سووریا جێگه‌ی گومانه‌. هه‌ر دوو هێرشه‌ کیمیاییه‌که‌ ڕاست له‌و کاته‌دا ئه‌نجام بووه‌ که‌ سوپای سووریا به‌هێز بووه‌ و پێویستی به‌م کاره‌ نه‌بووه‌.

ئه‌و زیادی کرد: ئێمه‌ هه‌ر له‌ سه‌ره‌تاشه‌وه‌ ڕامانگه‌یاند که‌ ئه‌م هێرشه‌ کیمیاییه‌ کاری خودی گرووپه‌ تیرۆریستییه‌کانه‌ به‌ڵام که‌س گوێ نه‌گرت.

زه‌ریف هه‌روه‌ها جه‌ختی کرد: ئێمه‌ دژی هه‌نگاوی یه‌کلایه‌نه‌ین و هیچ وڵاتێک مافی ئه‌وه‌ی نییه‌ که‌ یه‌کلایه‌نه‌ و له‌ ده‌ره‌وه‌ی بازنه‌ی یاسا نێونه‌ته‌وه‌ییه‌کان وڵاتێکی دیکه‌ سزا بدات.

News Code 18099

نیشانەکان

بۆچوونی ئێوە

You are replying to: .
  • 9 + 0 =