ئاماده‌یی پۆلیسی ئاڵمانیا به‌ هۆی خۆپیشاندانی لاینگرانی کورد و تورک

به‌ هۆی هێرشی داگیرکاری تورکیا بۆ سه‌ر عه‌فرین و به‌ڕێوه‌ چوونی ڕێپێوانی گه‌وره‌ له‌ شاره‌کانی ئاڵمانیا، وه‌زاره‌تی ناوخۆی ئه‌م وڵاته‌ حاڵه‌تی ئاماده‌باشی ڕاگه‌یاند.

به‌ ڕاپۆرتی ئاژانسی مێهر له‌ ڕۆیترز، له‌ سه‌ره‌تای ئه‌م حه‌فته‌وه‌ ڕێپێوانی کورده‌کان له‌ شاره‌کانی ئاڵمانیا بۆ دژایه‌تی کردنی هێرشی سه‌ربازی تورکیا بۆ سه‌ر عه‌فرین ده‌ستی پێ کردووه‌.

به‌ پێی ئه‌م ڕاپۆرته‌، ڕێپێوانه‌کان له‌ وڵاتانی دیکه‌ش وه‌ک به‌لژیک و فه‌ڕه‌نسا و بریتانیا و چه‌ند وڵاتێکی دیکه‌ ئه‌نجام بووه‌ و ئه‌مه‌ش بووه‌ته‌ مایه‌ی نیگه‌رانی پۆلیسی ئه‌م وڵاتانه‌.

له‌ ئاڵمانیا زیاترین شارۆمه‌ندی کورد و تورک نیشته‌جێن و ئه‌مه‌ش ده‌توانێت ببێته‌ هۆی شه‌ڕی سه‌ر شه‌قامه‌کانی لاینگرانی تورکیا و کوردی سووریا.

له‌ حه‌فته‌ی ڕابردوو چه‌ند مزگه‌وتی تورکه‌کان له‌ ئاڵمانیا ئاگریان تێبه‌ردراوه‌ که‌ لایه‌نی تورک پاگه‌نده‌ی کردووه‌ که‌ کوردی ئاڵمانیا ئه‌م کاره‌ی ئه‌نجام داوه‌ و لێکۆڵینه‌وه‌ له‌مباره‌وه‌ له‌ لایه‌ن پۆلیسی ئاڵمانیاوه‌ درێژه‌ی هه‌یه‌.

هه‌ر به‌م بۆنه‌وه‌ وه‌زاره‌تی ناوخۆی ئاڵمانیا به‌ مه‌به‌ستی به‌ر گرتن به‌ شه‌ڕی کورد و تورک له‌ وڵاته‌که‌ی له‌ چه‌ند شاری وه‌ک ستۆتگارد و به‌رلین حاڵه‌تی ئاماده‌باشی به‌ پۆلیس داوه‌.

عه‌لی ئه‌رتان که‌ کوردێکی دانیشتووی ئاڵمانیایه‌ و سه‌ره‌په‌ره‌شتی ڕێپێوانه‌کانی ئاڵمانیا ده‌کات ڕایگه‌یاند: ئێمه‌ دژی تووندوتیژین چ له‌ لایه‌نی که‌سانی سه‌ر به‌ میتی تورکیا له‌ ئاڵمانیا بێت چ له‌ لایه‌ن لاینگرانی په‌که‌که‌وه‌، ئێمه‌ داوای ڕێپێوانی هێمنانه‌ ده‌که‌ین و هه‌ر جۆره‌ ده‌مارگرژییه‌ک ڕه‌ت ده‌که‌ینه‌وه‌.

News Code 17499

نیشانەکان

بۆچوونی ئێوە

You are replying to: .
  • 8 + 2 =