وته‌بێژی وه‌زاره‌تی ده‌ره‌وه‌ی ئێران:

ئێران له‌ ده‌ره‌وه‌ی سنوور به‌ره‌نگاری تیرۆریزم نه‌بێته‌وه‌ شه‌ڕ دێته‌ ناو وڵات

ناسەی هەواڵ: 4235378 -
وته‌بێژی وه‌زاره‌تی ده‌ره‌وه‌ی ئێران جه‌ختی کرد که‌ ئه‌گه‌ر ئێران له‌ ده‌ره‌وه‌ی سنووره‌کانی خۆی به‌ره‌نگاری تیرۆریزم نه‌بێته‌وه‌، بێ گومان ده‌بێت له‌ ناوخۆی وڵاته‌دا شه‌ڕی تیرۆریزم بکات.

به‌هرام قاسمی ، وته‌بێژی وه‌زاره‌تی ده‌ره‌وه‌ی ئێران له‌ دیمانه‌ له‌گه‌ڵ هه‌واڵنێری مێهر، وڵامی پرسیارێکی سه‌باره‌ت به‌ هه‌ندێ لێدوانی دژبه‌رانی نیزامی کۆماری ئیسلامی ئێران، سه‌باره‌ت به‌وه‌ی که‌  ئێران ئه‌و تێچووه‌ی بۆ یارمه‌تیدانی وڵاتانی سته‌م لێکراوی ناوچه‌که‌ سه‌رفی ده‌کات بۆ خه‌ڵکی وڵاته‌که‌ی بۆ ته‌رخان ناکات، داوه‌ته‌وه‌.

 قاسمی ده‌ڵێت: ئه‌م بابه‌ته‌ ده‌بێ له‌ ئاستی گه‌وره‌ و به‌ربڵاودا لێکبدرێته‌وه‌، چونکوو هه‌ر گۆڕانکارییه‌ک که‌ له‌ ناوچه‌که‌ له‌ وڵاتانی دراوسێ و وڵاتانی ده‌روبه‌ری ئێوه‌دا ڕووده‌دات ده‌توانێ خه‌سار له‌ ئێوه‌ش بدات و کاریگه‌ری له‌سه‌ر ئاسایش و ئه‌منییه‌ت و ته‌نانه‌ت ئابووری ئێوه‌ دابنێت و ببێته‌ پرسی گه‌لی ئێران و پرسێکی ناوخۆیی.

ئه‌وه‌شی وتووه‌ که‌ که‌ ئێمه‌ له‌ ناوچه‌که‌ له‌گه‌ڵ دیارده‌گه‌لی وا به‌ره‌و ڕوو بووینه‌ته‌وه‌ که‌ هێزه‌ بیانه‌کان و هه‌ندێ نه‌یاری ناوچه‌یی و ژماره‌یه‌ک وڵاتی تایبه‌تی دیکه‌ش ڕۆڵیان تێدا بووه‌ که‌ هه‌وڵیان داوه‌ به‌ جۆرێک ئاسایش و پاوه‌جێی ئێران تێک بده‌ن  به‌ کاری وا که‌ بۆیان نه‌ده‌کرا له‌ ناوخۆی ئێراندا ئه‌نجامی بده‌ن.

قاسمی جه‌ختی کردووه‌: ئه‌گه‌ر ئێمه‌ له‌ سووریاداین له‌ سه‌ر داخوازیی ده‌وڵه‌تی سووریایه‌. هێزه‌ بیانییه‌کان له‌ سووریا هه‌ندێ ڕووداویان خولقاند. سووریا ئامانجی سه‌ره‌تایی ئه‌وان بوو. ئه‌وان ده‌یانه‌ویست له‌ قۆناغی دواتر دا عێراق و پاشان هێرش بکه‌نه‌ سه‌ر ئێران که‌ پاوه‌جێی ئێران بشێوێنن.

 ئه‌وه‌شی وت که‌ بۆ یارمه‌تیدانی پاراستنی ئاسایشی ناوچه‌که‌  و له‌ پێناو ڕێبازی کۆماری ئیسلامی بۆ دژایه‌تی تیرۆریزم و هه‌روه‌ها ڕێگری له‌ په‌ره‌سه‌ندنی توندڕه‌وی و تیرۆریزم له‌ ناوچه‌که‌ ئێران وه‌ک ڕاوێژکار له‌ سووریادایه‌.

دووپاتیشی کرده‌وه‌ که‌  ئه‌گه‌ر ئێران له‌ ده‌ره‌وه‌ی سنووره‌کانی خۆی به‌ره‌نگاری تیرۆریزم نه‌بێته‌وه‌، بێ گومان ده‌بێت له‌ ناوخۆی وڵاته‌دا شه‌ڕی تیرۆریزم بکات و ئه‌مه‌ش تێچووی ئابووری و مه‌عنه‌وی زۆر قورستر ده‌بێت.

ناردنی بۆچوون

3 + 8 =