به‌رپرسێکی ئێرانی:

ئێران ۱۸مین هێزی ئابووریی جیهانه‌

ناسەی هەواڵ: 4222809 -
وته‌بێژی ده‌وڵه‌تی حه‌سه‌ن ڕۆحانی وتی: سه‌ندووقی نێونه‌ته‌وه‌یی دراو ڕایگه‌یاندووه‌ که‌ ئێران ۱۸مین هێزی ئابووری گه‌وره‌ی جیهانه‌ و ئه‌مه‌ش ده‌سه‌ڵاتی ئێران له‌ ئاستی جیهان نیشان ده‌دات.

به‌ ڕاپۆرتی ئاژانسی مێهر، محه‌مه‌د باقر نه‌وبه‌خت، وته‌بێژی ده‌وڵه‌تی حه‌سه‌ن ڕۆحانی له‌ میانه‌ی ڕۆژانی سه‌رکه‌وتنی شۆڕشی ئیسلامیدا وتی: ئێمه‌ له‌ ئێران له‌ دوای شۆڕشی ئیسلامییه‌وه‌ جیاوازی ڕاو بۆچوونی زۆرمان هه‌یه‌ و ده‌بێت له‌ دوای چاره‌سه‌ر کردنی کێشه‌ی خه‌ڵک بین. دوژمنانیش به‌رده‌وام پیلانگێڕی ده‌که‌ن و نایانه‌وێت ئێمه‌ سه‌ر بکه‌وین به‌ڵام ئه‌وان به‌رده‌وام شکستیان هێناوه‌.

نه‌وبه‌خت زیادی کرد: ئێمام خومه‌ینی (ره‌) به‌ پشتیوانی خه‌ڵک هاته‌وه‌ بۆ ئێران و هه‌ر له‌ هه‌مان سه‌ره‌تاوه‌ وتیان که‌ خه‌ڵک ده‌نگ نه‌ده‌ن و کۆماری ئیسلامیان نه‌گه‌ره‌ک بێت، ئه‌وه‌ ده‌وڵه‌تیش دروست نابێت. هه‌ر بۆیه‌ بڕیاری دا که‌ ۱۲ ی خاکه‌لێوه‌ خه‌ڵک له‌ میانه‌ی ڕفراندۆمێکدا ده‌نگ بده‌ن به‌ کۆماری ئیسلامی یان نا.

وتیشی: هه‌ر له‌ سه‌ره‌تاوه‌ بۆ ئه‌م بڕیاره‌ی خه‌ڵکی ئێران کێشه‌ی زۆریان دروست کرد، تیرۆره‌کان ده‌ستی پێ کرد و به‌ په‌له‌ سه‌دامیان کرد به‌ گژی ئێران و شه‌ڕێکی ۸ ساڵه‌یان پێفرۆشتین. به‌ڵام بۆ ۳۹ ساڵه‌ خه‌ڵک خۆڕاگری ده‌کات و ئێمه‌ش سه‌رکه‌وتووانه‌ له‌ سه‌ر پێی خۆمان ڕاوه‌ستاوین. 

نه‌وبه‌خت سه‌باره‌ت به‌ نائارمییه‌کانی ئه‌م دواییه‌ی ئێران وتی: بڕێک بێ عه‌قڵ دڵیان به‌ نائارامییه‌کانی ئه‌م دواییه‌ خۆش کردووه‌، به‌ڵام ئێران ده‌توانێت له‌ کێشه‌ ئابوورییه‌کانیشی تێپه‌ڕێت. ئێمه‌ کێشه‌ی ئابووریمان هه‌یه‌ و هه‌وڵ ده‌ده‌ین بۆ چاره‌سه‌ر کردنیشی. به‌ڵام هه‌ر له‌م دواییه‌ سه‌ندووقی دراوی جیهانی ڕایگه‌یاند که‌ ئێران ۱۸مین هێزی ئابووری جیهانه‌، ئایا ئه‌مه‌ ده‌ستکه‌وت نییه‌ بۆ ئێمه‌، هاوکات کێشه‌ ئابوورییه‌کانی خه‌ڵکی ئێرانیش پشت گوێ ناخه‌ین.

له‌ کۆتایدا جه‌ختیشی کرد: سه‌ندووقی دراوی نێونه‌ته‌وه‌یی ڕایگه‌یاندووه‌ که‌ ئێران له‌ ساڵی ڕابردوو زیاتر له‌ ۸۳ ملیار دۆلار داهاتی زیاد بووه‌ و ئه‌مساڵ ده‌گات به‌ ۹۴ ملیار دۆلار. کاری زۆر هه‌یه‌ که‌ ده‌بێت ورده‌ ورده‌  هه‌موویان ئه‌نجام بده‌ین و به‌ دڵنیایشه‌وه‌ له‌ کێشه‌کان تێده‌په‌ڕین.

ناردنی بۆچوون

6 + 8 =