کتێبی مه‌حموود خانی دزڵی ڕه‌وانه‌ی بازاڕ کرا

کتێبی مه‌حموود خانی دزڵی دوای وه‌رگێڕان بۆ سه‌ر زمانی فارسی له‌ لایه‌ن بڵاڤگه‌ی "ئه‌وین"ه‌وه‌ ڕه‌وانه‌ی بازاڕی کتێب کرا.

به‌ ڕاپۆرتی ئاژانسی مێهر، کتێبی مه‌حموود خانی دزڵی له‌ نووسینی عومه‌ر مه‌عروف به‌رزه‌نجی و وه‌رگێڕانی جه‌ماڵ شاسواری به‌ زمانی فارسی ڕه‌وانه‌ی بازاڕی کتێبی ئێران کرا.

به‌ پێی ئه‌م ڕاپۆرته‌، ئه‌م کتێبه‌ له‌ لایه‌ن بڵاوڤگه‌ی ئه‌وین له‌ چاپ دراوه‌ و له‌ سه‌رتانسه‌ری ئێران بڵاو کراوه‌ته‌وه‌، کتێبه‌کە ژیانامه‌ی مه‌حموود خانی دزڵییه‌.

مه‌حمود خانی دزڵی، یه‌كێک له‌ ناوه‌ دیاره‌كانی بزووتنه‌وه‌ی‌ كوردی، ۹۷ ساڵ له‌مه‌وبه‌ر توانی شاری سلێمانی له‌ ژێر چنگی بریتانییه‌کان ئازاد بکات.

مه‌حمود خان دوای ئه‌وه‌ی‌ شێخ مه‌حمود داوای هاوكاریی لێكرد، بۆ ڕزگارکردنی سلێمانی به‌ ده‌یان هه‌زار چه‌کداره‌وه‌ چووه‌ شه‌ڕی بریتانیاییه‌کان.

خانی دزڵی له‌ ۲۰ی مه‌ی ۱۹۱۹دا كه‌ ده‌كاته‌ ۹۷ ساڵ له‌مه‌وبه‌ر، به‌و كاره‌ی‌ ناوی خۆی وه‌كو پاڵه‌وان بۆ مێژوو جێهێشت، چونكه‌ ئازاد كردنه‌وه‌ی‌ سلێمانی‌ و شكاندنی بریتانیاییه‌کان قۆناغێكی تایبه‌ت بوو له‌ ناوچه‌ و هه‌رێمی کوردستان.

مه‌حمود خانی دزڵی، كوڕی عه‌زیز خان، ساڵی ۱۸۷۰ له‌ گوندی (دزڵی)ی ناوچه‌ی هه‌ورامانی ته‌خت له‌ کوردستانی ئێران له‌ دایک بووه‌.

بنه‌ماڵه‌كه‌ی‌ یه‌كێک بوون له‌ بنه‌ماڵه‌ سه‌ردار و ده‌ستڕۆیشتووه‌كانی ئه‌وكاته‌، كه‌ دوای مردنی عه‌زیز خانی باوكی، مه‌حمود خانی كوڕی بووته‌ جێنشینی‌ و به‌ ماوه‌یه‌كی كه‌م‌ و له‌ ئه‌نجامی توانا و لێهاتوویی خۆیدا ده‌سه‌ڵاتی به‌سه‌ر ناوچه‌ی دزڵی‌ و ده‌وروبه‌ری هه‌وراماندا بڵاو كردۆته‌وه‌.

ناوبانگی مه‌حمود خانی دزڵی، له‌ سه‌ردارێكی به‌ده‌سه‌ڵاته‌وه‌ گۆڕا بۆ "پاڵه‌وان"، دوای ئه‌وه‌ی‌ ۹۷ ساڵ پێش ئێستا له‌ ئازاد كردنی شاری سلێمانی له‌ ده‌ست هێزه‌كانی بریتانیا رۆڵی سه‌ره‌كیی بینی، ره‌فیق حیلمی له‌ ساڵی‌ ۱۹۲۲ راوێژكاری‌ رامیاری‌ شێخ مه‌حمود بووه‌، دوای ئه‌و قاره‌مانێتییه‌ و چه‌ند نه‌به‌ردییه‌كی‌تر به‌ "پاڵه‌وانی شۆڕشه‌كه‌ی‌ شێخ مه‌حمود"، ناوی لێ ده‌بات.

ئه‌حمه‌دی خواجه‌، كوڕی عه‌زیز عوسمان ئاغای ئه‌رده‌لانی، كه‌ له‌ ساڵی ۱۹۲۲ یه‌كێك بوو له‌ باش كاتبه‌كانی شێخ مه‌حمود، له‌ كتێبه‌كه‌یدا (چیم دی)، ده‌ڵێت شێخ مه‌حمود بۆ ئه‌وه‌ی به‌رامبه‌ر به‌كرده‌وه‌ توندوتیژ و ناشیرینه‌كانی ژنراڵ مێجه‌رسۆن، حاكمی سیاسی بریتانیایی ئه‌وكاتی شاری سلێمانی بوه‌ستێته‌وه‌، داوای له‌مه‌حمود خانی دزڵی کرد تاکوو یارمه‌تی بدات و ئه‌ویش ده‌ست به‌جێ هاته‌ هانای شێخ مه‌حموود و به‌ سه‌ختی بریتانیاییه‌کانی شکست دا.

News Code 16685

نیشانەکان

بۆچوونی ئێوە

You are replying to: .
  • 2 + 12 =